Read Mizo_Old_version RORELTUTE 18 Bible Online

RORELTUTE 18 - Mizo_Old_version bible

RORELTUTE 18

¹Chûng lai chuan Israel ramah lal an awm lo va: tin, chûng lai chuan Dan chite chuan ram luah tûr an zawng a; chutih lai pawh chuan Israel chite zîngah ram luah tûr an la chang ve si lo va.

²Tin, Dana thlahte chuan an hnam pum pui zînga mi, pasalṭha panga, Zora leh Estaol khua aṭangin ram va enthla tûr leh va thlîthlai tûrin an tîr a; an hnênah chuan, “Va kal ta ula, ram chu va thlîthlai teh u,” an ti a; tichuan, Ephraim tlâng rama Mika in chu an va thleng a, chutah chuan an riak ta a.

³Mika in kianga an awm lai chuan Levi chi tlangvâl aw chu an hria a, chu lam chu an va pan a, a hnênah, “Tuin nge hetah hian hruai che? He hmunah hian eng nge maw i tih le? Engtin nge hetah hian i khawsak?” an ti a.

⁴Tin, ani chuan an hnênah, “Mika hian heti hian mi lo siam ta a, mi ruai a, a puithiamah hian ka awm a ni,” a ti a.

⁵Tin, anni chuan a hnênah, “Kan kalna tûrah hian kan hmuingîl dâwn nge dâwn lo tih kan hriat theih nân Pathian min râwnsak teh ang che,” an ti a.

⁶Tin, puithiam chuan an hnênah, “Thlamuang takin kal tawh u. In kalna tûr chu LALPAN a hriatpui zêl a che u,” a ti a.

⁷Chutichuan, mi pangate chu an chhuak ta a, Lais khuaah an va lût a, chuta mite chu Zidon mite ang bawka râlmuang tak leh thlamuang taka an awm hle hlezia an va hmu a; chumi ramah chuan eng maha han intichhe thei tûra thuneitu lêm chuang tu mah an awm lo va, Zidon-hote nên lah an inhlat a, inhmanna rêng rêng an nei si lo.

⁸Tin, Zora leh Estaol khuaa an unaute hnên lamah chuan an haw ta a; tin, an unaute chuan an hnênah, “Engtin nge ni le?” an ti a.

⁹Tin, anni chuan, “Tho rawh u khai, i han bei ang u. Ram chu kan han hmu ta ngei mai a; ngai teh u, a ṭha hle a nia. In chechâng na nge? Chumi rama han lûta, han luah tûr chuan muang suh u khai.

¹⁰In han kal chuan râlmuanga awm mite a nia in han hmuh ang ni, ram lah chu a zau si a. Pathianin a pe tawh che u a nia, leia thil awmah zawng eng mah tlâkchham tûr awm hauh lohna hmun a nia,” an ti a.

¹¹Tichuan, Zora leh Estaol khua aṭang chuan Dan hnamte chu indona thuam inbelin mi zaruk an chhuak ta a.

¹²Tin, an han chho va, Judai ram Kiriath-jearim khuaah awmhmun an han khuar a; chuvângin, chumi hmun chu tûn thlengin Mahane-dan an la ti a ni. Ngai teh, Kiriath-jearim thlang lama awm a ni.

¹³Chuta ṭang chuan Ephraim tlâng ram lam an pan a, Mika in chu an han thleng a.

¹⁴Chutichuan, Lais ram enthla tûra mi panga chhuakte chuan an chhâng a, an unaute hnênah chuan, “Hêng inahte hian ephod te, milem te, milem siam chawp te, milem chhûn chawpte a awm tih in hria em? Chutichuan, engtin nge in tih dâwn ngaihtuah rawh u,” an ti a.

¹⁵Tin, chuta ta chu an pêng a, Levi chi tlangvâl awmna Mika in ngei chu an va thleng a, a chungchâng thu an zâwt a.

¹⁶Dana thlah, mi zaruk indona thuam inbelte chu kulh kawngka bulah an ding a.

¹⁷Tin, mi panga, ram enthlatute chu an han chho va, an han lût a, milem siam chawp te, ephod te, milem te, milem chhûn chawpte chu an la a. Puithiam chu mi zaruk, indona thuam inbelte zîngah kulh kawngka bulah chuan a ding ve a.

¹⁸Chûngte chu Mika ina an han luha, milem siam chawp te, ephod te, milem te, milem chhûn chawpte an han lâk chuan, puithiam chuan an hnênah, “Eng nge maw in tih chu le?” a ti a.

¹⁹Tin, anni chuan, “Ngawi rawh, i kutin i hmui kha hup la, kan hnênah lo kal ve la, kan paah leh puithiamah lo awm rawh. I tân hian chhûng khat chauh puithiama awm nge ṭha zâwk Israel zînga chi khat leh hnam khat puithiama awm?” an ti a.

²⁰Tin, puithiam rilru chu a lâwm ta hle mai a; tichuan, ephod te, milem te, milem siam chawpte chu a la a, mipuiho zîngah chuan a tel ve ta a.

²¹Chutichuan, an kal chhuak ta a, an fanau tê tête, rante, bungruate chu an hmachhawm zêl a.

²²Mika in aṭanga thui fe an kal hnu chuan Mika ṭhenawmte chu an inpun khâwm a, Dana thlahteho chu an va ûmpha ta a.

²³Tin, Dana thlahteho chu an han au va. Tin, anni chu an lo lehhawi a, Mika hnênah chuan, “Eng i ti nge ni le, mi khati zozai i rawn kalpui mai?” an ti a.

²⁴Tin, ani chuan, “Ka pathian siamte leh puithiam chu in kalpui a, in kal ta daih mai a, eng nge neih ka neih tâk ni? Eng titiha, ‘Eng i ti nge ni le?’ mi ti mai nge in nih chu le?” a ti a.

²⁵Tin, Dana thlahteho chuan a hnênah, “Kan zîngah hian ṭawng mai mai suh khai; chuti lo zawng, mi thinchhe kut i tuar mai ang a, i chhûngte nên hian in nun in chân mai tûr a nia,” an ti a.

²⁶Tichuan, Dana thlahteho chu an kal ta a. Tin, Mika chuan beih ngam rual niin a hre si lo va, a in lamah a haw leh ta a.

²⁷Tin, Mika thil siam leh a puithiam neih chu an kalpui ta a, Lais khua, râlmuanga awm hle hlete hnên chu an han thleng a, khandaihin an han that a; tin, khua chu an hâl ta a.

²⁸Zidon aṭanga a hlat êm avângin a han chhanchhuaktu tûr lah tu mah an awm si lo va, tute nên mah inzawmna rêng rêng an nei lo bawk a. Chumi hmun chu Beth-rehob bul ruama awm a ni. Tin, khua chu an din leh a, chutah chuan an awm ta a.

²⁹Tin, a khaw hmingah chuan Israela fa, an thlahtu Dana chawiin Dan an vuah a. Amaherawhchu, a hma chuan chu khua chu Lais an ti ṭhîn a ni.

³⁰Tin, Dana thlahte chuan milem siam chawp chu anmahni tân an lo din ta a; tin, Mosia fa Gersoma fapa Jonathana leh a fapate chu, ram chu miin an lâk hma loh chuan Dan chite puithiamah an awm ta a.

³¹Chutichuan, Mika siam milem siam chawp chu Silo khuaa Pathian in a awm chhûng zawng chuan an din ta.