Read Mizo_Old_version RORELTUTE 19 Bible Online

RORELTUTE 19 - Mizo_Old_version bible

RORELTUTE 19

¹Tin, heti hi a ni a, chûng laia Israel rama lal an awm loh lai chuan Levi chi mi pakhat hi Ephraim tlâng ram tâwp lamah a awm a, Bethlehem-judai rama mi hmeiah a nei a.

²Tin, a hmei chuan a uiresan a; tichuan, Bethlehem-judai rama a pa hnênah a tlânsan a, chutah chuan thla li zet a awm a.

³Tin, a pasal chu a tho va, a chhiahhlawh leh sabengtung pahnih hruaiin tlang taka va thlêma, lungawia hruai haw leh tumin a va ûm zui a. Tin, ani chuan a pa inah chuan a lo hruai lût a; tin, nula pa chuan a hmuh chuan a lo lâwm hle mai a.

⁴Tin, a pu, nula pa chuan a hnêna awm tûrin a lo chelh a; a hnênah chuan ni thum a awm a. Tichuan, an eiin an in tlâng a, chutah chuan a thleng a.

⁵Tin, heti hi a ni a, a ni li ni chuan zîng takah an tho va, ani chu chhuah tumin a tho va; tin, nula pa chuan a mâkpa hnênah chuan, “Chhang tlêm tal eiin i thinlung chu tiharh rih la, chumi hnuah chuan in la kal ang chu maw le,” a ti a.

⁶Chutichuan, an ṭhu a, an pahnih chuan an eiin an in dûn a. Tin, nula pa chuan chu mi hnênah chuan, “Lungawi takin riak hrâm rawh khai, i thinlung chu hlim takin awm rawh se,” a ti a.

⁷Tin, chu mi chu chhuah tumin a han tho va; nimahsela, a pu chuan a thlêm chiam a; tichuan, a riak leh ta a.

⁸Tin, a ni nga tûk zîng takah chuan chhuah tumin a tho va; tin, nula pa chuan, “I thinlung chu tiharh rih la maw le, tlai ni nêm hun thleng tal chuan awm rih rawh khai,” a ti a; tin, an pahnih chuan chaw te an ei dûn leh ta a.

⁹Tin, chu mi chu a hmei nên, a chhiahhlawh nên chhuah tuma a han thawh chuan a pu, nula pa chuan a hnênah, “Ngai teh, hei khua pawh a tlai tawh a, zânin chu riak leh rih hrâm rawh khai. Ngai teh, khua pawh a thim hnai mai tawh alâwm; hetah hian riak leh la, i thinlung chu hlim taka a awm theih nân; tichuan, naktûk zîng takah i tho vang a, i haw mai tûr alâwm,” a ti a.

¹⁰Nimahsela, chu mi chuan chumi zân chuan riah a duh ta lo va, a tho va, a chhuak ta a, Jebus khaw zâwn a va thleng a (chu chu Jerusalem khua a ni), sabengtung pahnih thuam sa a hruai a; a hmei pawh chu a tel ve a.

¹¹Jebus khaw kiang an thlen chuan khua a tlai hle tawh a; tin, chhiahhlawh chuan a pu hnênah, “Hawh teh, he Jebus-ho khawpuiah hian i lût mai ang khai, i riak teh ang u,” a ti a.

¹²Tin, a pu chuan a hnênah, “Israela thlahte ni si lo hnam dang khuaah te chuan lût lo ve; Gibea khaw lam i pan zêl zâwk ang u,” a ti a.

¹³Tin, a chhiahhlawh hnênah, “Hawh, hêng hmun khawii zâwk emaw hi i pan ang; Gibea khuaah emaw, Rama khuaah emaw kan riak dâwn nia,” a ti a.

¹⁴Chutichuan, an kal leh ta zêl a; Benjamin-ho Gibea khaw kiang an thlen chuan ni a tla ta a.

¹⁵Tin, Gibea khuaa riak tûr chuan an lût ta a. Tin, a lût a, chu khawpui khawlaiah chuan a ṭhu a, tu mah thleng peih rêng rêng an awm lo va.

¹⁶Tin, ngai teh, putar pakhat hi tlaiah chuan a feh a lo hâwng a; chu mi chu Ephraim tlâng rama mi a ni a, Gibea khuaah chuan a va awm rih lawk a ni; chumi hmuna mite erawh chu Benjamina chite an ni.

¹⁷Tin, a han hawi a, khawlaia mikhualpa chu a han hmu a; tin, putar chuan, “Khawiah nge i kal dâwn le? Khawi aṭanga lo kal nge i nih?” a ti a.

¹⁸Tin, ani chuan a hnênah, “Bethlehem-judai ram aṭanga Ephraim tlâng tâwp ram lama kal tum ka ni; chuta awm chu ka ni. Bethlehem-judai ramah ka va kal a; tûnah hian LALPA inah kal ka tum a ni. Mahse, tu mah mi thleng peih an awm lo a ni.

¹⁹Kan sabengtung tân phei chuan buhpâwl leh ran chawte zawng kan nei a; tin, kei leh, i bâwihnu leh, i chhiahhlawhte hnêna awm ve tlangvâl tân te pawh hian chhang leh uain a awm bawk a; eng mah tlâkchham zawng kan nei hauh lo ve,” a ti a.

²⁰Tin, putar chuan, “Thlamuang takin awm rawh khai! I mamawh zawng zawng chu keiman ka tum vek ang e; khawlaiah zawng riak lul suh ang che,” a ti a.

²¹Chutichuan, a inah a hruai lût a, sabengtungte chu chaw a pe a. Tin, an kete an sil a, an eiin an in ta a.

²²Chutia hlim leh lâwm taka an awm lai chuan, ngai teh, chumi khuaa mi, Beliala fapa ṭhenkhat chuan in chu an rawn hual vêl ta hlawm a, kawngkhâr an rawn chhu dawt dawt a. In neitupa putar hnênah chuan, “I ina lo thlengpa kha han hruai chhuak rawh, kan lo pâwl teh ang,” an ti a.

²³Tin, in neitupa chu an hnênah a va chhuak a, an hnênah chuan, “Ni lo ve, ka unaute u! Chuti êma sual chu ti lul suh u khai! He mi hi ka mikhual a nih hi, hetiang thil âtthlâk tak zawng ti lo ve.

²⁴Ngai teh u, hetah hian ka fanu nula leh a hmei an awm a; anni chu ka rawn hruai chhuak ang a, anni chu tlâwm ula, ṭha in tih ang apiangin an chungah ti nâng che u; he mi chungah erawh hi chuan chutiang thil âtthlâk chu ti suh ang che u,” a ti a.

²⁵Nimahsela, chu mite chuan a thu an pawm duh lo va. Chutichuan, mi chuan a hmei chu a hruai a, an hnênah chuan a va hruai chhuak ta a. Tin, anni chuan an lo pâwl a, khawvâr hma loh chuan zankhuain an sawisa hrep a; tin, khua a lo vâr veleh an chhuah ta a.

²⁶Chutichuan, hmeichhia chu khua a lo vâr veleh a kal a, a hotupa thlen inpa kawngka bulah chuan a tlu thlawp a, khaw ên hnu thlengin a awm ta reng a.

²⁷Tin, a hotupa chu zîngah chuan a han tho va, kawngkate chu a han hawng a, kal tumin a va chhuak a; ngai teh, a hmeinu chu kawngka bulah chuan rahkaah a lo tlu zangphar dêr mai a.

²⁸Tin, ani chuan a hnênah, “Tho rawh, i kal ang,” a han ti a; nimahsela, a chhâng ta hauh lo mai a. Tichuan, a sabengtung chungah a hlâng a; tin, a tho va, a hmun lamah chuan a kal ta a.

²⁹Tin, in a va thlen chuan chemtê a la a, a hmei chu a fûke hmun sâwm leh hmun hnihah a chan sawm a, Israel ram zawng zawngah a thawn darh a.

³⁰Tin, heti hi a ni a, a lo hmu apiang chuan, “Israela thlahte Aigupta ram ata an lo chhuah achin hetiang thiltih rêng rêng hi tûn thleng hian a la awm ngaiin hmuh a la ni ngai hauh lo mai. Ngaihtuah ula, inrâwn ula, sawi teh u,” an ti a.