Read Mizo_Old_version RORELTUTE 2 Bible Online

RORELTUTE 2 - Mizo_Old_version bible

RORELTUTE 2

¹Tin, LALPA vântirhkoh Gilgal khua aṭangin Bokim khuaah a han chho va. Tin, ani chuan, “Aigupta ram ata kha ka chhuahtîr che u a, in thlahtute hnêna chhechhama ka lo tiam tâk ramah khân ka hruai lût che u a, ‘In hnêna thu ka thlun kha ka bawhchhe tawp lo vang.

²Tichuan, hêng rama awmhote nên hian thu thlung suh ula; an maichâmte tihchimsak ang che u,’ ka ti a. Nimahsela, ka thupêk in pawm lo va. Eng vângin nge hetianga in tih?

³Chuvângin, ‘Anni chu ka hnawh chhuahsak tawh lo vang che u, in nâkahte hlîng ang an ni zâwk ang a; tin, an pathiante chu in tân thang an ni ang,’ ka ti bawk a nih kha,” a ti a.

⁴Tin, heti hi a ni a, LALPA vântirhkohvin Israela thlahte zawng zawng hnênah chûng thu chu a han sawi chuan, mipuiho chu râwl chhuah meuhvin an ṭap ta hlawm a.

⁵Tin, chumi hmun hmingah chuan Bokim an vuah a; tin, chutah chuan LALPA hnênah an inthawi ta a.

⁶Josuan mipuite a ṭîn darhtîr hnu chuan, Israela thlahte chu mi tin mahni chanpual ṭheuh ram chu luah tûrin an kal ta a.

⁷Josua dam chhûng leh upaho Josua khûma damte, LALPAN Israel-te tâna thil ropui tak a tih zawng zawng hmu ṭhîntute dam chhûng chuan mipuiten LALPA rawng an bâwl ṭhîn a.

⁸Tichuan, Nuna fapa Josua, LALPA chhiahhlawh chu kum za leh kum sâwm miin a thi a.

⁹Tin, Gaas tlâng hmâr lampang, Ephraim tlâng rama ama chanpual ramri chhûng, Timnath-heres khuaah chuan an phûm ta a.

¹⁰Tin, chûng chhuan zawng zawngte pawh chu an thlahtute hnên lamah an kal khâwm zo ta a, chu mite hnuah chuan LALPA leh Israel-te tâna a thiltihte pawh hre lo chhuan dang an lo awm ta a.

¹¹Tin, Israela thlahte chuan LALPA mit hmuhin thil sual an lo ti a, Baal-hote rawng an bâwl ta a.

¹²LALPA, an thlahtute Pathian, Aigupta ram ata hruai chhuaktu kha an hawisan a; pathian dang, an kiang vêla awmho pathiante zînga mi chu an zui a, chibai an bûk ta a; tichuan, LALPA chu an tithinur ta a.

¹³Tin, LALPA chu an hawisan a, Baala leh Astarothi rawng an bâwl ta a.

¹⁴Chutichuan, LALPA thin chu Israel-te chungah chuan a ur ta a, anmahni rawk ṭhîntute kutah chuan a pe ta hlawm a, an hmêlma, an kiang vêla awmte hnênah chuan a hralh a; tichuan, an hmêlmate chu an chelh ta lo va.

¹⁵Khawiah pawh kal sela, LALPA kut chu an chungah a chhe lamin a tla zêl a, LALPAN a lo sawi tawh ang leh, LALPAN an hnêna chhechhama a lo sawi tawh ang khân. Tichuan, mangan namênin an mangang ta lo va.

¹⁶Tin, LALPAN rorêltute a siamsak a, chûngte chuan anmahni rawktute kut ata chu an rawn chhanchhuak ta a.

¹⁷Chuti chung pawhin an rorêltute thu chu an pawm lo va, pathian dangte lakah chuan an uirê a, chibai an lo bûk ta zâwk a. An thlahtuten LALPA thupêkte pawma an zawh ṭhin kawng chu an pênsan ta thuai mai a.

¹⁸Tin, LALPAN rorêltute a siamsak chuan, LALPA chu rorêltu hnênah chuan a awm a, rorêltu dam chhûng chuan an hmêlmate kut ata chu a chhanchhuak zêl a; anmahni hnehchhiah leh timangangtute avângin an rûm a; chuvângin, LALPA chu a inchhîr ta a.

¹⁹Nimahsela, heti hi a ni a, rorêltu chu a thih veleh an hnungtawlh leh ta a; pathian dangte rawng bâwla, chibai bûk thu-ah an thlahtute ai mahin an lo che chhe lehzual ta a. An thiltih ṭhinte leh an luhlulte pawh an bâng hek lo.

²⁰Tin, LALPA thin chu Israel-te chungah chuan a ur ta a; tichuan, “He hnam hian an thlahtute thu ka pêk, ka thuthlun chu an bawhchhia a, ka thu an pawm ta si lo va;

²¹chuvângin, kei pawhin tûn achinah zawng, Josua thih hmaa hnawh chhuah bâk hnamte hi ka hnawh chhuahsak tawh lo vang.

²²An thlahtute zawh ang khân LALPA dân an zawh dâwn nge dâwn lo tih Israel-hote fiah nân anmahni chu ka hmang ang,” a ti a.

²³Chutichuan, LALPAN chûng hnamte chu hnawt chhuak nghâl ta lovin a awmtîr ta a; Josua kutah pawh a pe ta hek lo.