Read Mizo_Old_version RORELTUTE 20 Bible Online

RORELTUTE 20 - Mizo_Old_version bible

RORELTUTE 20

¹Chutichuan, Israela thlahte zawng zawng chu an thawk ta chiam a, thu khat vuain Dan khua aṭanga Beer-seba khaw thlengin Gilead rama mite nên Mizpe khuaah LALPA hnênah an inkhâwm ta a.

²Tin, mi zawng zawng hotute, Israel chite zawng zawng lam pawh chu Pathian mite inkhâwmhonaah chuan an va tel a, sipai khandaih keng mi nuai li an ni a.

³(Benjamina thlahte chuan Israela thlahte chu Mizpe khuaah an han chho tih an lo hria a.) Tin, Israela thlahte chuan, “Engtiziaa hetianga suahsualna hi lo awm nge ni min hrilh teh u?” an ti a.

⁴Tin, Levi chi, hmeichhia an thaha pasal chuan, “Benjamin chite awmna Gibea khuaah ka hmei nên riah tumin kan va lût a.

⁵Tin, Gibea mite chuan min rawn bei ta mai a, zânah in an rawn hual a. Mi thah an tum a, ka hmei chu an sawisa hrep a, a thi ta a.

⁶Tichuan, ka hmei ruang chu ka la a, ka chan a, Israel-ho ram luah zawng zawngah ka thawn darh a; Israel ramah hian thil tenawm tak leh âtthlâk tak an lo ti ta si a.

⁷Nangni Israela thlahte u, in vai hian ngai teh u, in ngaih dân leh in remtih dân chu sawi rawh u khai,” a ti a.

⁸Tichuan, mipuiho zawng zawng chu thu khat vuain an tho ṭhup a, “Tu mah mahni puan in lamah kan haw hauh lo vang a, tu mah mahni inah kan lût hek lo vang.

⁹Gibea-ho kan tih dân tûr chu hetiang hi a ni: ṭhum kan vâwr ang a;

¹⁰Israel-hote chunga thil dik lo tak an tih ang zêla an tiha, Gibea hmuna Benjamin-ho kan han beihnaa mipuite ei tûr lo hlântu atân Israel hnam zawng zawng zînga mi zaah sâwm zêl, sângkhatah za zêl, sîngkhatah sâng zêl kan thlang chhuak ang,” an ti a.

¹¹Chutichuan, Israel mi zawng zawng chu thu khat vaw ṭhapin chu khawpui bei tûr chuan an pung khâwm ta a.

¹²Tin, Israel hnamte chuan Benjamin hnam zawng zawngte hnênah chuan, “In zînga hetiang suahsualna lo awm ta mai hi engtizia nge ni?

¹³Gibea khuaa mi Beliala fate chu rawn hruai rawh u; tichuan, Israel rama sual hi a reh theih nân kan lo tihlum ang e,” tiin mi an tîr a. Nimahsela, Benjamin chite chuan an unau Israela thlahte thusawi chu an pawm duh lo va.

¹⁴Tin, Benjamina thlahte chu Israela thlahte do tûrin khawpui atate an lo chhuak khâwm a, Gibea khuaah an lût chiam a.

¹⁵Tin, chumi nia Benjamina thlahte khawpui ata khandaih kenga chhuakho chu, Gibea khuaa mi zasarih thlan ṭhiau tiam lovin sînghnih leh sângruk an ni.

¹⁶Chûng zawng zawng zîngah chuan veikhawr zasarih, thlan ṭhiau an awm a; an vai chuan virvawma samzai tia pawh ṭhelh hlek lo mi an ni.

¹⁷Tin, Israel mite chu Benjamin mite tiam lovin khandaih keng mi ṭhiau nuai li an ni; chûngho zawng zawng chu indo mi vek an ni.

¹⁸Tin, Israela thlahte chu an tho va, Bethel-ah an han chho va, Pathian an han râwn a, “Benjamina thlahte chu tu nge han bei hmasa ang le?” an ti a. Tin, LALPAN, “Juda-ho han kal hmasa rawh se,” a ti a.

¹⁹Tichuan, Israela thlahte chu zîngah an tho va, Gibea khua chu an han hual a.

²⁰Tin, Israel mite chu Benjamin-ho bei tûr chuan an thawk a; tin, Israel mite chuan Gibea khuaah chuan anmahni bei tûrin ṭan an han siam a.

²¹Tin, Benjamina thlahte chu Gibea khua ata chu an lo chhuak a, chumi ni chuan Israel-hote zînga mi sînghnih leh sânghnih an rawn that ta buaih mai a.

²²Tin, mipuiho, Israel mite chu an han infuih leh a, an beih ṭan nia an beihna hmunah vêk chuan bei tûrin ṭan an han siam leh a.

²³(Tin, Israela thlahte chu an han chho va, Pathian hmaah tlai thlengin an han ṭap a, “Kan unau Benjamina thlahte hi bei tûrin kan han thawk leh dâwn em ni ang?” tin LALPA an zâwt a. Tin, LALPA chuan, “Han bei leh rawh u,” a ti a.)

²⁴Tin, a ni hnih ni chuan Israela thlahte chuan Benjamina thlahte chu an han hnaih a.

²⁵Tin, Benjamin-ho pawh chu a ni hnih ni chuan bei tûrin Gibea khua ata an chhuak ve a, Israela thlahte zînga mi sîngkhat leh sângriat an rawn that leh ta buaih mai a, chûng zawng zawng chu khandaih keng mi an ni.

²⁶Chutichuan, Israela thlahte zawng zawng leh mipuiho zawng zawng chu an han chho va, Bethel-ah an han kal a, an ṭap a, LALPA hmaah an ṭhu a, chumi ni chuan tlai thlengin chaw an nghei a; tin, LALPA hnênah hâlral thilhlan leh remna thilhlante an hlân a.

²⁷Tin, Israela thlahte chuan LALPA an râwn a (chûng lai chuan chutah chuan Pathian thuthlung bâwm chu a awm a;

²⁸tin, chûng lai chuan Arona fa Eleazara fapa Phinehasa chuan a rawng a bâwl ṭhîn a ni a), “Kan unau Benjamina thlahte chu kan han bei leh ang nge kan bânsan tawh mai ang?” tiin. Tin, LALPAN, “Han chho rawh u, naktûkah zawng in kutah ka pe tawh dâwn e,” a ti a.

²⁹Tin, Israel-hote chuan Gibea khaw vêlah chuan chângtu an indah ru ta a.

³⁰Tin, Israela thlahte chu Benjamina thlahte bei tûrin a ni thum ni chuan an han thawk leh a, ni dang ang bawk khân Gibea khaw bei tûr chuan ṭan an han siam leh a.

³¹Tin, Benjamina thlahte chu mite bei tûr chuan an va chhuak a, khua chu an chhuahsan a; tichuan, ni dang ang bawk khân mite chu beiin an that ṭan leh ta mai a, phûl faia Bethel khaw chhohna leh Gibea khaw kawng lamlianahte chuan Israel-hote chu sawmthum an that a.

³²Tin, Benjamina thlahte chuan, “A hma ang bawk khân kan hmaah an tlâwm leh ta le,” an ti a. Israela thlahte erawh chuan, “I tlân ang u khai, khawpui ata hi lamlian lamah i tawlh chhuahtîr ang u,” an ti a.

³³Tichuan, Israel-ho zawng zawng chuan an ṭanhmun chu an chhuahsan a, Baal-tamar hmunah ṭanhmun an siam a. Tin, Israel-ho, lo châng rutute kha an chânna hmun Maaregeba hmun ata an lo chhuak a.

³⁴Tin, Israel-ho zawng zawng zînga thlan ṭhiau sîngkhatin Gibea khua chu an bei a, an inbei chu a nasa ngei mai. Nimahsela, Benjamin-ho chuan an chan a chhe dâwn ta ngei mai tih zawng an hre lo.

³⁵Tin, LALPAN Benjamin-ho chu Israel-hote hmaah chuan a tihlum chiam a. Israela thlahte chuan chumi ni chuan Benjamin-ho chu mi sînghnih leh sângnga leh za an that a; chûngho zawng zawng chu khandaih keng mi vek an ni.

³⁶Chutichuan, Benjamina thlahte chuan an tlâwm ta tih an lo inhre ta a. Israela thlahte chuan Gibea khaw bei tûra a rûka chângtute an dah kha an rin avângin Benjamin-ho chu an han hnungtawlhsan a ni.

³⁷Tin, a rûka chângtute chuan Gibea khua chu an bawh ta thut a; tichuan, a rûka chângtute chu an inzâr darh a, khuaa mi zawng zawng chu khandaihin an bei ta chiam a.

³⁸Israel-hote leh a rûka chângtute khân an intiamna chu khawpui chhûnga mei tihkhûk ngut ngut a ni.

³⁹Tin, Israel-hote chu an han tawlh rih a; tichuan, Benjamin-ho chuan an han bei ṭan a, Israel mite chu sawmthum lai an that a, “Kan inbeih tirh ni ang bawk khân kan hmaah an tlâwm leh ta ngei mai le,” an ti a.

⁴⁰Nimahsela, khawpui chhûngah chuan meikhu a lo din tâk luah veleh Benjamin-ho chu an han lehhawi a; tin, ngai teh, khawpui chu a pumin vân lamah a khu chho ta ngut ngut mai a.

⁴¹Tichuan, Israel-hote chu an rawn inher leh ta a; Benjamin-ho chuan mak an ti hle a, an chan a chhe dâwn tih an hre ta si a.

⁴²Chuvângin, Israel-hote hmaah chuan thlalêr lamah an tlânchhe ta a; nimahsela, an ûm zui ngat ngat a; tin, khawpui ata lo chhuakte chuan chutah chuan an lo tihlum a.

⁴³Benjamin mite chu an hual ta tlat a, an ûm a, ni chhuahna lam Gibea dep an chawlhna hmunah an ûmpha a.

⁴⁴Benjamin-ho chu mi sîngkhat leh sângriat an thi a; an vai chuan mi chak huaisen ṭhiau an ni.

⁴⁵Tin, an tawlh a, thlalêr lam Rimon lungpuiah an tlânchhia a; mi sângnga chu lamlianahte an râwt a. Tichuan, Gidom thlengin an ûm zui ngat ngat a, mi sanghnih an that a.

⁴⁶Chutichuan, chumi nia Benjamin-ho thi zawng zawngte chu khandaih keng mi ṭhiau sînghnih leh sângnga an ni a, an vai chuan mi chak huaisen an ni.

⁴⁷Mi zaruk erawh chu thlalêr lam Rimon lungpuiah an tlânchhia a, chumi Rimon lungpuiah chuan thla li an awm a.

⁴⁸Tin, Israel-hote chu Benjamin-ho chungah chuan an thawk leh a, khawpui chhûnga mi tawh phawt chu ran te, an hmuh apiangte chu khandaihin an sât hlum zêl a. Chu lo pawh chu khua an hmuh apiangte pawh chu an hâl zêl a.