Read Mizo_Old_version RORELTUTE 21 Bible Online

RORELTUTE 21 - Mizo_Old_version bible

RORELTUTE 21

¹Tin, Israel mite chuan Mizpe khuaah, “Kan zînga mi tu mahin kan fanute hi Benjamin-ho nupuiah i neihtîr hauh suh ang u,” tiin chhia an chham a.

²Tin, mipuiho chu Bethel-ah an kal a, Pathian hmaah tlai thlengin an ṭhu a, an awte chhuahin an ṭap vak vak a.

³Anni chuan, “Aw LALPA, Israel-te Pathian, engtizia nge Israel-te zînga hetiang thil hi a lo awma, vawiinah hian Israel-te hi hnam khata kim ta lo nge ni le?” an ti a.

⁴Tin, heti hi a ni a, a tûkah chuan mipuiho chu zîng takah an tho va, chutah chuan maichâm an siam a, hâlral thilhlante leh remna thilhlante an hlân a.

⁵Tin, Israela thlahte chuan, “Israel hnam zawng zawng zînga LALPA hnêna pung khâwmho zînga han tel ve lo chu tute nge ni le?” an ti a. Mizpe khuaa LALPA hnêna han kal ve lo apiangte chu, “Tihhlum ngei tûr a ni ang,” tiin chhia an lo chham tawh tlat si a.

⁶Tin, Israela thlahte chu an unau Benjamin-ho chungchângah chuan an inchhîr ta a, “Vawiinah hian Israel-ho zînga hnam khat chu chhawk an ni ta si a.

⁷A awm chhunate tân chuan an nupui tûr engtin nge kan tih tâk ang le? Kan fanute hi nupuiah neihtîr hauh lo tûrin LALPA hming chhâlin chhia kan chham ta si a,” an ti a.

⁸Tin, anni chuan, “Israel-ho hnam zînga mi tu hnam ber nge ni Mizpe khuaa LALPA hmaa han inlan ve lo hi le?” an ti a. Tin, ngai teh, pung khâwmho awmna hmunah chuan Jabes-gilead mite chu pakhat mah an kal ve lo va.

⁹Mipuiho an han inchhiar chuan, ngai teh, Jabes-gilead rama awmte chu pakhat mah an lo awm lah lo va.

¹⁰Tin, inkhâwmhote chuan mi huaisen ṭha ṭhiau sîngkhat leh sânghnih an tîr a, “Kal ta ula, Jabes-gilead rama awmte chu hmeichhia leh an fanau tê tête nên khandaihin va sât hlum vek rawh u.

¹¹In tih dân tûr chu hetiang hi a ni: mipa zawng zawng leh hmeichhia, mipa mutpui tawh phawt chu tiboral vek ang che u,” tiin thu an pe a.

¹²Tin, Jabes-gilead rama awmte zîngah chuan nula zali, mipa la pâwl ngai hauh loh an hmu a; tichuan, an awmna Silo khuaah chuan an hruai a, chu chu Kanaan ram a ni.

¹³Tin, inkhâwmho zawng zawngte chuan mi an tîr a, Rimon lungpuia awm Benjamin-ho an va bia a, an hnênah inrem thu an puang a.

¹⁴Tin, chu veleh chuan Benjamin-ho chu an kîr a, Jabes-gilead rama hmeichheho an zuahte chu an pe a; chuti chung pawhin an la indaih ta lo va.

¹⁵Tin, Israel hnam zînga LALPAN intihhranna a lo siam tâk avângin mipuiho chu Benjamin-ho chungchângah chuan an inchhîr ta a.

¹⁶Chutichuan, inkhâwmho upate chuan, “A la damte nupui tûr hi engtin nge kan tih ang le, Benjamin-ho zînga an hmeichhiate chu tihboral an lo ni ta si a?” an ti a.

¹⁷Anni chuan, “Israel hnam hi tihmanga a awm loh nân Benjamin-ho la awm chhunate hi engtin nge thlah kan neihtîr theih ang le?

¹⁸Kan fanute hi nupuiah kan neihtîr thei si lo va,” an ti a; Israela thlahte chuan, “Tu pawh Benjamin-ho nupuia neihtîr apiang chu ânchhe dawngin awm rawh se,” tiin chhia an lo chham tawh si a.

¹⁹Tin, anni chuan, “Ngai teh u, Bethel hmâr lam, Bethel aṭanga Sekem kalna lamlian chhak lampanga Lebona chhim lama awm Silo khuaah kum tin LALPA tân kût a awm ṭhin kha,” an ti a.

²⁰Tin, anni chuan Benjamina thlahteho hnênah chuan, “Va kal ta ula, grêp hmunah va châng ru tawh u;

²¹tin, lo thlîr ula; tichuan, ngai teh u, Silo khuaa nulaho chu lâmnaa lâm tûra an lo chhuah chuan, grêp hmun ata chu lo chhuak ula, Silo nulaho chu mahni nupui atân man ṭheuh ula; tichuan, Benjamin-ho ramah kal vek ang che u.

²²Tin, heti hi a ni ang a, an pate emaw, an nuṭate emaw, sawisêl tûra kan hnêna an lo kal leh an hnênah, ‘Min khawngaih rawh u khai, indonaah khân an nupui tûr kan lo mansak ṭheuh ta si lo va; nangni lahin in lo pe bawk si lo va; lo pe ni ula, thiam loh in hlawh dâwn si a,’ kan lo ti dâwn nia,” tiin thu an pe a.

²³Tin, Benjamina thlahte chuan chutiang chuan an ti a, lâmho zînga mi anmahni zât ṭheuh nupuiah an man a, an kal bopui ta a; tin, an ram lamah chuan an hâwng a, khawpuite chu an chei leh a, chutah chuan an awm ta a.

²⁴Tin, chu veleh chuta ṭang chuan Israela thlahte chu mahni chi chi leh mahni hnam hnamin an intêl hrang leh a, chuta ta chu anmahni ram ṭheuhvah chuan an haw leh ta a.

²⁵Chûng lai chuan Israel-te zîngah lal rêng rêng an awm lo va; mi tinin mahni ṭha tih zâwng zâwngin an ti mai a ni.