Read Mizo_Old_version RORELTUTE 3 Bible Online

RORELTUTE 3 - Mizo_Old_version bible

RORELTUTE 3

¹Hêng hnamte hi a ni LALPAN Israel-te Kanaan rama râl la bei ve ngai hauh lo fiahna tûra a awmtîrte chu,

²chûng Israela thlah chhuanho, tûn hmaa eng mah la hre hauh lote chuan an lo hriat nân leh râl beih dân zirtîr tûr atân chauh awmtîr an ni;

³chûngte chu Philistia-ho lal panga te, Kanaan mi zawng zawng te, Zidon-hote, Lebanon tlânga awm Hiv-hote an ni, Baal-hermon tlâng aṭanga Hamath khaw luhna thlengin.

⁴LALPAN Mosia hmanga an thlahtute thu a lo pêkte kha, an pawm dâwn leh dâwn loh hriat nân chûngho chu Israel-te fiahna tûr an ni.

⁵Tin, Israela thlahte chu Kanaan-hote, Hit-hote, Amor-hote, Periz-hote, Hiv-hote, Jebus-hote zîngah chuan an awm a.

⁶Tin, an fanute chu nupuiah an nei a, an fanute chu an fapate an neihtîr thung a; an pathiante rawng an bâwl a.

⁷Tin, Israela thlahte chuan LALPA mit hmuhin thil sual an lo ti ta a, LALPA an Pathian chu an theihnghilh a, Baal-ho leh Astarothi rawng an bâwl ta a.

⁸Chutichuan, LALPA thin chu Israel-te chungah chuan a ur ta a, Mesopotamia ram lal Kusan-risathaima hnênah a hralh ta a; tichuan, Israela thlahte chu Kusan-risathaima thuhnuaiah kum riat an awm a.

⁹Tin, Israela thlahte chuan LALPA an auh veleh LALPAN Israela thlahte chu chhandamtu a siamsak a, chu mi chuan a chhandam ta a, chu chu Kaleba nau Kenaza fapa Othniela a ni.

¹⁰LALPA thlarau chu a chungah a lo thleng a; tichuan, Israel-te ro a rêlsak ta a. Râl bei tûrin a va thawk a; tin, LALPAN Mesopotamia ram lal Kusan-risathaima chu a pe a; Kusan-risathaima chu a hneh ta a.

¹¹Tin, ram chu kum sawmli râlmuangin a awm a. Tin, Kenaza fapa Othniela chu a thi ta a.

¹²Tin, Israela thlahte chuan LALPA mit hmuhin thil sual an lo ti leh ta a. Chutichuan, LALPA mit hmuha thil an lo tihsual avângin LALPAN Moab lal Eglona chu Israel-te laka chakin a siam a.

¹³Tin, ani chuan Amona thlahte leh Amalek-hote a pun khâwm a, Israel-hote chu a va bei a, tûm khawpui chu a luah ta a.

¹⁴Tichuan, Israela thlahte chu Moab lal Eglona thuhnuaiah kum sâwm leh kum riat an awm a.

¹⁵Nimahsela, Israela thlahte chuan LALPA an han auh veleh LALPAN Gera fapa Ehuda, Benjamin mi, veikhawr, chhandamtu a siamsak a. Amah chu Israela thlahte chuan Moab lal Eglona pêk tûrin lâwmman an kentîr a.

¹⁶Tin, Ehuda chuan khandaih hriam tawn, tawng chena seiin a chher a; chu chu a malpui ding lam puan hnuaiah a taivawn a.

¹⁷Tin, Moab lal Eglona chu lâwmman chu a han pe a; Eglona chu mi thau tak a ni a.

¹⁸Tin, Ehudan lâwmman a han pêk zawh veleh chuan lâwmman kengtute chu a kaltîr leh ta a.

¹⁹Ani erawh chu Gilgal khaw kianga lung chherna hmun aṭangin a lêt leh a, “I e lalpa, thurûk hrilh tûr che ka nei e,” a ti a. Tin, ani chuan, “Ngawi ṭhiap rawh u,” a ti a. Tichuan, a bula dingho zawng zawngte chuan an chhuahsan ta vek a.

²⁰Tin, Ehuda chu a hnênah a va kal a; ani chu a thlan daihna pindanah amah chauhvin a lo ṭhu a. Tin, Ehuda chuan, “Pathianin i hnêna sawi tûr thu mi chah e,” a ti a. Tichuan, lal chu a ṭhutphah ata chu a tho va.

²¹Tin, Ehuda chuan a kut vei lamin a malpui ding lama khandaih chu a han phawi a, a pumah a chiu ta vak mai a.

²²A fawng pawh chu a lût pil hmawk a, a hnungah a tlang a ni; tin, a khandaih chu thauvin a hnawh tlat avangin a phawi lo.

²³Chutichuan, Ehuda chu hulhliapah a chhuak a, pindan kawngkhârte chuan a khârkhung a, a kalh ta tlat a.

²⁴Tin, chutia a chhuah tâk hnu chuan chhiahhlawhte chu an lo kal a; tin, an han hmuh chuan ngai teh, pindan kawngkate chu a lo inkalh tlat mai a, “A thlan daihna pindanah a inthiarfihlîm rih a ni ang chu maw,” an ti a.

²⁵Tin, hrilhhai khawpa an nghah reng hnu pawhin pindan kawngkate chu a hawng ta hauh lo mai a. Chutichuan, chabi an la a, an han hawng a. Ngai teh, an lalpa chu chhuatah chuan thiin a lo lum dêr mai a.

²⁶Tin, Ehuda lah chu khatia an nghah reng chhûng khân a lo tlân bo tawh a. Lung chherna hmun kha a pêl a,

²⁷Seira-ah a tlân a. Tin, heti hi a ni a, chumi hmun a thlen chuan Ephraim tlâng ramah chuan tawtawrâwt a hâm a; tin, Israela thlahte chu tlâng ram ata a hnênah an chhuk a, ani chuan an hma a hruai ta a.

²⁸Tin, ani chuan an hnênah, “Mi zui rawh u khai, LALPAN in hmêlma Moab-hote hi a pe tawh che u a ni,” a ti a. Tichuan, an zui thla a, Moab ram dep Jordan lui kaite chu an chhuhsak a, tu mah an kaitîr lo.

²⁹Chumi ṭum chuan Moab-ho sângkhat lai, mi âwmkhauh ṭhiau leh mi chak huaisen ṭha ṭhiau an that a; pakhat mah tlân chhuak an awm lo.

³⁰Chutichuan, chumi ni chuan Moab-hote chu Israel-hote lakah an tlâwm ta a; tin, ram chu kum sawmriat chhûng râlmuangin a awm a.

³¹Tin, a hnuah chuan Anatha fapa Samgara a lo lang ve a, chu mi chuan Philistia-ho mi zaruk chu sebâwng chhunna tiangin a chhun hlum a; amah bawk chuan Israel-hote chu a chhandam a ni.