Read Mizo_Old_version RORELTUTE 4 Bible Online

RORELTUTE 4 - Mizo_Old_version bible

RORELTUTE 4

¹Ehuda thih hnu chuan Israela thlahten LALPA mit hmuhin thil sual an lo ti leh ta a.

²Tichuan, Hazor khaw ṭhuttu, Kanaan ram lal Jabina hnênah chuan LALPAN a hralh ta a. Chu mi sipai hotu ber chu Sisera a ni a, Jentailte ram Haroseth khuaa awm a ni.

³Tin, Israela thlahte chuan LALPA an au va; Jabina chuan thîr tawlailîr zakua lai a nei a; tin, kum sawmhnih chhûng zet Israela thlahte chu nasa takin a lo hnehchhiah tawh a ni.

⁴Tin, chûng lai chuan zâwlnei Debori, Lapidotha nupuiin Israel-te ro a rêl a.

⁵Ephraim tlâng rama Rama leh Bethel khaw inkara Debori tûm thing hnuaiah a awm ṭhîn a; tin, Israela thlahte chu a hnênah an ro rêltîr tûrin an kal ṭhîn.

⁶Tin, Kedes-naphtali ram ata Abinoama fapa Baraka chu a chah a, a hnênah, “LALPA, Israel-te Pathianin, ‘Tabor tlângah han kal langin, Naphtalia thlahte leh Zebuluna thlahte mi sîngkhat hruai rawh.

⁷Tichuan, Kison luiah Jabina sipai hotu Sisera chu a tawlailîrte leh a hote nên ka rawn tîr ang a; tin, ani chu ka pe che,’ tiin thu a pe a ni lâwm ni?” a ti a.

⁸Tin, Barakan a hnênah, “Mi kalpui la; tichuan, ka kal ang e; mi kalpui dâwn loh erawh chuan ka kal lo vang,” a ti a.

⁹Tin, ani chuan, “Ka kalpui mawlh ang che; amaherawhchu, i kalnaah chuan hmingṭhat i hlawh dâwn lo a nih chu; LALPAN Sisera chu hmeichhe hnênah a hralh dâwn a ni e,” a ti a. Tin, Debori chu a tho va, Baraka hnênah Kedes khaw lamah chuan a kal ve ta a.

¹⁰Tin, Baraka chuan Zebulun-ho leh Naphtali-ho chu Kedes-ah a chah khâwm a; mi sîngkhat amah nên an han kal a, Debori pawh a hnênah chuan a han kal ve a.

¹¹Tin, Ken mi Hebera chu Ken mi Mosia puzawn Hobaba thlahte zîng ata a lo awm hrang a, Kedes kianga Zaananim rama sasaw thing hmun daiah a puan in a va zâr a.

¹²Tin, Abinoama fapa Baraka chu Tabor tlângah a chho tih Sisera an hrilh a.

¹³Tichuan, Sisera chuan a tawlailîr zawng zawng, thîr tawlailîr zakua leh a hote chu Jentailte ram Haroseth khua ata, Kison luiah a khâwm chiam a.

¹⁴Chutichuan, Debori chuan Baraka hnênah, “Khai le, vawiin hi LALPAN Sisera a pêk ni che a ni e. I hma hruaitu chu LALPA a ni lâwm ni?” a ti a. Tichuan, Baraka chu Tabor tlâng ata a chhuk a, mi sîngkhatin an zui thla a.

¹⁵Tin, LALPAN Sisera leh a tawlailîr zawng zawng leh, a sipaiho zawng zawngte chu khandaihin Baraka hmaah chuan a tibuai ta nuaih hlawm a; tin, Sisera chu a tawlailîr ata a chhuk a, kein a tlân bo ta daih a.

¹⁶Baraka erawh chuan tawlailîrte leh sipaiho chu Jentail ram Haroseth thleng chuan a ûm ta a; tichuan, Sisera sipaiho zawng zawngte chu khandaihin an that vek a; pakhat mah dam an awm lo.

¹⁷Sisera erawh chu Ken mi Hebera nupui Jaeli puan inah kein a tlân lût a; Hazor lal Jabina leh Ken mi Hebera chhûngte chu inrem reng an ni a.

¹⁸Tin, Jaeli chu Sisera hmuak tûrin a lo chhuak a, a hnênah, “Ka pu, lo lût rawh, ka hnênah lo lût rawh; hlau suh,” a ti a. Tichuan, puan in chhûngah chuan a hnênah a lût ta a; tin, ani chuan puanin a khuh a.

¹⁹Tin, a hnênah, “Khawngaih takin tui tlêm te mi han pe teh khai, ka tui a hâl êm mai e,” a ti a. Tin, bâwnghnute ûm a han hawng a, a intîr a, a khuh leh ta a.

²⁰Tin, a hnênah, “Puan in kawngkaah khân ding la; tichuan, ‘Hetah hian mi an awm em?’ tia an rawn zawh che chuan, ‘Awm lo,’ lo ti zêl ang che,” a ti a.

²¹Chutichuan, Hebera nupui Jaeli chuan puan in khenkilhna a la a, tuboh a keng a, zawi tein a phei a, khenkilhna chuan a bekbawrah a khêng a, a khêng tlang a, leiah a bûr ta ngur mai a; a chauvin a mut a tui hle mai si a. Tichuan, a thi ta a.

²²Tin, ngai teh, Barakan Sisera a rawn ûm chu va hmuah tumin Jaeli chu a va chhuak a, a hnênah, “Lo kal teh khai, i mi zawna chu ka lo entîr teh ang che,” a ti a. Tichuan, a hnênah a va kal a; tin, ngai teh, Sisera chu a lo thi reng mai a, puan in khenkilhna chu a bekbawrah a lo bûr ngur mai a.

²³Chutichuan, Pathianin chumi ni chuan Israela thlahte hmaah Kanaan ram lal Jabina chu a titlâwm ta a.

²⁴Tichuan, Israela thlahte chu Kanaan ram lal Jabina lakah an lo chak ta deuh deuh va, Kanaan ram lal Jabina chu chhe dêr khawpin an lo siam ta a.