Read Mizo_Old_version RORELTUTE 5 Bible Online

RORELTUTE 5 - Mizo_Old_version bible

RORELTUTE 5

¹Chutichuan, Debori leh Abinoama fapa Baraka chuan chumi ni chuan:

²“Hotute chuan Israel zîngah zai an zâp a. Mipuite chu châk takin an lo inpêk tâk hi, LALPA chu fak rawh u.

³“Aw, nangni lalte u, lo ngaithla ula; Aw, nangni hotute u, beng lo chhi rawh u; Keimah ngeiin LALPA chawimawiin hla ka sa ang a, LALPA, Israel-te Pathian fakin hla ka sa ang.

⁴“LALPA, Seir ram ata i lo kal chhuaha, Edom phûl ata i lo kal chhuah khân, Lei chu a nghîng dur dur a, vânte pawh a lo far a, A ni, chhûmte chuan ruah a sûrtîr a.

⁵Tlângte chu LALPA hmaah a lo khûr a, Sinai tlâng lam pawh saw - LALPA, Israel-te Pathian hmaah chuan.

⁶“Anatha fapa Samgara dam lai te leh, Jaeli dam laite khân lamliante chu a ṭhing ṭhup a. Zin veivâkte chu kawng mai maiahte an kal ṭhîn a.

⁷Israel rama khuate chu luah lohvin a ram zo va, a ram zo va, Kei Debori hi ka chêta, Israel ram nu hi ka chêt hma loh kha chuan.

⁸Pathian tharte an vuan a; Tichuan, kulh kawngkhâr bulahte khân indona a lo awm a; Israel rama sîngli zet zîngah Phâw leh fei kha awm rêng rêng a awm em ni?

⁹Ka rilru chu Israel-hote rorêltu, Mipuite hnêna chak taka inpete lamah chuan a awm: LALPA chu fak rawh u.

¹⁰“Nangni sabengtung vâr chunga chuangte u, Nangni puan phah chhah taka ṭhute u; Nangni mi mirte u, chûng thute chu puang rawh u.

¹¹Thal kâptute thâwm rêng rêng hriat phâk loh, Tui chawina hmunah chuan, LALPA thil fel tihte chu an sawi an sawi ang, Israel ram chunga a thil fel tihte ngei chu. “Chutichuan, LALPA mipuite chu kulh kawngkhâr lamahte chuan an zu chhuk a.

¹²“Harh la, harh la, Debor; harh la, harh la, hla sa rawh.

¹³“Tichuan, mi lian la awm chhunte leh mipuite chu an lo chhuk a; Mi chak tak mi beihpui tûrin LALPA chu a lo chhuk ta.

¹⁴Amaleka zungzâmte chu Ephraim aṭangin an lo chhuk a; Benjamin, i mite zînga miten an rawn zui che, Makir aṭangin ram rorêltute an lo chhuk; Tin, Zebulun aṭangin ziaktu tiang kengtute chu an lo chhuk,

¹⁵Isakar mi liante chu Debori hnênah an tel a; Isakara angin Baraka pawh Ruam lamah chuan amah nên an tlân chhuk chiam a. Reuben-ho tui luannaahte chuan An tum a urh hle mai.

¹⁶Eng atân nge berâm huang kârahte i ṭhut reng, Berâm rual kohna phênglâwng ngaithla tûr maiin? Reuben-ho tui luannaahte chuan Ngun taka inngaihtuah chhuahna a awm.

¹⁷Gilead-ho chu Jordan râlah an awm reng a; tin, Dan-ho chu engah nge lawngahte an awm reng? Aser-ho chu tuifinriat kamah an ṭhu hle hle a, an litengsâwlahte chuan an awm reng.

¹⁸Zebulun-ho leh Napthali-ho hi Phûl hmun sânga thih huam reng mi an ni.

¹⁹“Lalten an rawn bei a; Tichuan, Kanaan lalte chuan Megido tui kiang, Taanak khuaah an bei a; Sum lâk rêng an nei lo.

²⁰Vân aṭangin an rawn bei a; Arsiten an hmun aṭangin Sisera chu an rawn bei a.

²¹Kison luiin anni chu a hnâwl vek a, Hmasâng lui, Kison lui chuan. Aw ka thlarau, chak takin kal zêl rawh.

²²Tichuan, sakawrte chu an per ta tlut tlut a, Sakawr chakte chu an zuan an zuan avângin.

²³‘Meroz chu ânchhia lawh ru,’ LALPA vântirhkohvin a ti. ‘Chuta awmte chu nasa takin ânchhia lawh rawh u; LALPA ṭanpuiin, LALPAN mi chak tak a beihnaa ṭanpui tûra an lo kal loh vângin.’

²⁴“Hmeichhia azawngah Jaeli, Ken mi Hebera nupui hi engthâwl ber a ni ang, Hmeichhia puan ina chêngho azawngah chuan engthâwl ber a ni ang.

²⁵Ani chuan tui a rawn dil a, hnutetui a lo pe a, Mi ṭha novin hnutetui khal a lo pe a.

²⁶Kilhna a keng a, A ding lamin hnathawk mi tuboh; Tin, tuboh chuan Sisera chu a khêng a, a luah a khêng tlang a; A ni, a bekbawrah chuan a khêng a, a khêng bûr ta ngur a.

²⁷A ke bulah a awp rawk a, a tlu a, a bawk ta dêr a; A ke bulah a awp rawk a, a tlu ta a; A awp rawkna hmunah chuan a thi ta dêr mai.

²⁸“Sisera nu chu tukverhah a han dâk a, Zâwngdaikalh âwngah a au va, ‘Engati nge a tawlailîr a lo thlen har? Engati nge a tawlailîr a muan?’ a ti.

²⁹A hmeichhe fingten an lo chhâng a, A ni, amah a inchhâng chawp leh a,

³⁰‘An hmu zo ta lo vem ni? Râllâk an insem ta lo vem ni le? Mi tinin nula pahnih khat emaw ṭheuh; Sisera chan tûr chu râllâk puan ze hrang hrang, Râllâk puan zeh mawi, ze hrang hrang, Râllâl nghâwnga bah tûr puan a khing hniha zeh mawi, ze hrang hrang,’ tiin.

³¹“Chutiang chuan aw LALPA, i hmêlmate zawng zawng chu boral vek sela! Amah hmangaihtute erawh chu chak taka kal, ni ang hi ni rawh se,” tiin hla an sa a. Tin, ram chu kum sawmli chhûng râlmuangin a awm a.