Read Mizo_Old_version RORELTUTE 6 Bible Online

RORELTUTE 6 - Mizo_Old_version bible

RORELTUTE 6

¹Tin, Israela thlahte chuan LALPA mit hmuhin thil an lo tisual leh ta a; tichuan, LALPAN Midian-ho kutah kum sarih a awmtîr a.

²Tin, Midian-hote chu Israel-hote lakah chuan an lo chak ta hle a. Midian-hote avâng chuan Israela thlahte chu tlângah te, pûkah te, kulhah te an biru a.

³Tin, heti hi a ni a, Israel-hoten thil an han chîn te hian Midian-hote, Amalek-hote, khawchhak fateho chu an han chho va,

⁴an han bei a, awmhmun an han khuar a, Gaza thlengin leia thil ṭote chu an tihchhiatsak a, Israel ramah ei tûr rêng rêng an zuah lo, berâm te, bâwng te, sabengtung te lamin.

⁵An ran rualte leh an puan inte nên an thawk a, khau ang maiin tam tak an thawk si ṭhîn a; anmahni leh an sanghâwngseite chu chhiar sên pawh an ni lo; ram chu tichhe tûrin an kal ṭhîn a ni.

⁶Chutichuan, Israel-hote chu Midian-ho avâng chuan an lo rethei ta hle mai a; tin, Israela thlahte chuan LALPA chu an au ta a.

⁷Tin, heti hi a ni a, Midian-ho avânga Israela thlahten LALPA an han auh veleh chuan,

⁸LALPAN Israela thlahte hnênah chuan zâwlnei a rawn tîr a, ani chuan an hnênah, “LALPA, Israel-te Pathianin heti hian a ti a ni, ‘Aigupta ram ata ka hruai chho che u a, bawih ata ka hruai chhuak che u a;

⁹Aigupta-ho kut ata leh, hnehchhiahtu che u zawng zawng kut ata chu ka chhanchhuak che u a, in hma ata anmahni chu ka hnawt chhuak a, an ram chu ka pe che u a;

¹⁰tin, keiin, “Kei hi LALPA in Pathian ka nih hi, hêng in awmna ram neitu Amor-ho pathiante hi in hlau hlek tûr a ni lo ve,” ka ti a; nimahsela, ka thusawi chu in pawm si lo,’ a ti e,” a ti a ni.

¹¹Tin, LALPA vântirhkoh a lo kal a, Ophra khuaa Abiezrit mi Joasa sasaw thing hnuaiah a ṭhu a; tin, a fapa Gideonan Midian-hote hmuh theih loh tûrin grêp sâwrna khurah buh a lo vua a.

¹²Tin, LALPA vântirhkoh chu a hnênah a rawn inlâr a, a hnênah, “Nang mi chak huaisen, LALPA chu i hnênah a awm e,” a ti a.

¹³Tin, Gideonan a hnênah, “Aw ka pu, LALPA kan hnêna a awm si chuan, engtizia nge hetianga kan chunga thil a lo thlen si? Min thlahtute khân, ‘LALPAN Aigupta ram ata chu min hruai chho a ni lâwm ni?’ tia a thiltih mak tak takte min hrilh ṭhinte kha khawiah nge a nih zawh tâk? Tûnah zawng LALPAN min thlauthla dêr tawh a, Midian-ho kutah min pe tawh alâwm,” a ti a.

¹⁴Tin, LALPA chuan amah chu a en a, a hnênah, “He i chakna hian kal la, Israel-ho hi Midian-ho lak ata chhandam ang che. Ka tîr che a ni lâwm ni?” a ti a.

¹⁵Tin, ani chuan a hnênah, “Aw LALPA, engtin nge Israel-hote hi ka han chhandam tehlul ang? Ngai teh, Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” a ti a.

¹⁶Tin, LALPA chuan a hnênah, “I hnênah ka awm zêl dâwn alâwm; tichuan, Midian-ho chu pakhat ang maiin i hneh vek mai ang,” a ti a.

¹⁷Tin, ani chuan a hnênah, “I mit tlung ka lo nih chuan, nangmah ngeiin mi bia a ni tih chhinchhiahna eng emaw mi entîr ta che.

¹⁸I hmaa hlan tûr thilpêk ka va lâka, i hnêna ka lo kal leh hma loh chuan heta ta hi khawngaih takin lo kal bo hauh suh ang che,” a ti a. Tin, ani chuan, “I lo kal leh hma loh chu ka lo awm reng ang e,” a ti a.

¹⁹Tin, Gideona chu a lût ta a, kêlno leh chhangphut epha khat, dawidim telh loh a buatsaih a. A sa chu fawngah a dah a, a tui chu bêlah a dah a; tin, sasaw thing hnuaiah a hnênah chuan a rawn keng a, a rawn hlân a.

²⁰Tin, Pathian vântirhkoh chuan a hnênah, “Sa leh chhang dawidim telh loh kha la langin, he lung chungah hian dah la, a tui kha bun chhuak rawh,” a ti a.

²¹Chutiang chuan a han ti a. Chutichuan, LALPA vântirhkoh chuan a tiang ken hmâwr chuan sa leh chhang dawidim telh loh chu a han khawih a; tin, lung aṭang chuan mei a lo chhuak a, sa leh chhang dawidim telh loh chu a kâng ral ta vek a. Tin, LALPA vântirhkoh chu a hmuh theih lohvah a kal ta a.

²²Chutichuan, Gideona chuan LALPA vântirhkoh a ni tih a hre ta a. Tin, Gideonan, “E khai aw, aw Lalpa PATHIAN! LALPA vântirhkoh chu a hmaichhan ngeiah ka hmuh tâk chu le,” a ti a.

²³Tin, LALPAN a hnênah, “Thlamuang takin awm la; hlau suh, i thi lo vang,” a ti a.

²⁴Chutichuan, Gideonan chutah chuan LALPA tân maichâm a siam a, Jehova-salom a vuah a. Tûn thlengin Abiezrit mite khua Ophra-ah a la awm reng a ni.

²⁵Tin, heti hi a ni a, chu zân vêkah chuan LALPAN a hnênah, “I pa bâwngpa, bâwngpa pahnihna kum sarih mi chu la langin, i pa neih Baala maichâm hi tichim la, a bula Aseri hi kit rawh;

²⁶tin, he kulh chungah hian kawngzâwng nei têin LALPA i Pathian tân maicham siam langin, bâwngpa pahnihna chu la la, Aseri i kih tûr thing hmangin hâlral thilhlan hlân rawh,” a ti a.

²⁷Chutichuan, Gideona chuan a chhiahhlawhte zînga mi sâwm a hruai a, LALPAN a hnêna a sawi ang chuan a ti ta a; tin, heti hi a ni a, a pa chhûngte leh khawpuia mite chu a hlauh avângin chhûnah a ti ngam lo va, zânah a ti a ni.

²⁸Tin, khawpuia mite chu zîng taka an han thawh chuan ngai teh, Baala maichâm chu tihchimin a lo awm a, a bula Aseri chu kih thlûkin a lo awm a, maichâm siam chunga bâwngpa pahnihna hlan chu a lo awm ta mai a.

²⁹“Hei tu tih nge maw ni chu le?” tiin an inbe hlawm a. Tin, an han inzawha, an han indap vêl hnu chuan, “Joasa fapa Gideona tih a lo ni reng alâwm maw le,” an ti ta a.

³⁰Tichuan, khawpuia mite chuan Joasa hnênah, “I fapa chu han hruai chhuak rawh, a thi ngei tûr a ni; Baala maichâm a tihchim avâng leh a bula Aseri a kih avângin,” an ti a.

³¹Tin, Joasa chuan amah rawn khingtu zawng zawngte hnênah chuan, “Baala chu in ṭan dâwn a ni maw? Amah chu in hum dâwn a ni maw? Tu pawh amah ṭan apiang chu zîngah la la hian tihhlum tûr a ni! Pathian a nih chuan a maichâm tihchim avângin inṭan chawp ang hmiang,” a ti a.

³²Chutichuan, “A maichâm tihchim avângin Baalan amah khing rawh se,” tiin, chumi ni chuan Jerubaala a vuah ta a.

³³Tichuan, Midian-ho zawng zawngte leh, Amelek-hote leh, khawchhak fate chu an pung khâwm chiam a; lui an kân a, Jezreel ruamah an inkulh a.

³⁴Nimahsela, LALPA Thlarau chu Gideona chungah a lo thleng a; tin, tawtawrâwt a han hâm a, Abiezrit-ho chuan an pan khâwm ta chiam a.

³⁵Tin, Manase-ho zawng zawng zîngah mite a tlântîr a, chûngho pawh chuan an pan khâwm ta chiam a. Aser-ho hnênah te, Zebulun-ho hnênah te, Naphtali-ho hnênah te pawh mite a tlântîr a; anni pawh chuan an han fin ve ta a.

³⁶Tin, Gideonan Pathian hnênah, “I sawi anga keima kuta Israel-te hi i chhandam dâwn chuan,

³⁷ngai teh, hruih zâwlah berâm hmul ka dah ang a; berâm hmulah chauh chuan dai a lo awma, lei zawng zawng chu a lo ro vek chuan, i sawi angin keima kutin Israel-te hi i chhandam dâwn a ni tih ka hria ang,” a ti a.

³⁸Chutiang chu a lo ni ngei a. A tûk zîng taka a han thawha, berâm hmul chu a han hmeh sâwr chuan berâm hmula mi chu dai berhbu khat zet a han sâwr chhuak ta mai si a.

³⁹Tin, Gideonan Pathian hnênah, “Ka chungah thinrim suh ang che, vawi khat chauh ka han sawi leh teh ang: khawngaih takin, vawi khat tal berâm hmulin mi fiahtîr leh teh ang che; tûn ṭumah chuan berâm hmul chauh chu lo hul sela, lei chung zawng zawngah dai lo awm leh thung rawh se,” a ti a.

⁴⁰Tin, chutiang chuan Pathianin chumi zân chuan a rawn ti a. Berâm hmul chauh chu a lo hul a, lei chung zawng zawngah chuan dai a lo awm ta thung a.