Read Mizo_Old_version RORELTUTE 7 Bible Online

RORELTUTE 7 - Mizo_Old_version bible

RORELTUTE 7

¹Chutichuan, Jerubaala (chu mi chu Gideona a ni) leh a hnêna mipui awm zawng zawngte chu zîng takah an tho va, Harod lui bulah an inkulh a; tin, Midian-hote kulh chu an awmna hmâr lampang More tlâng bul ruamah a ni.

²Tin, LALPAN Gideona hnênah, “I hnêna awmte kha Midian-hote an kuta ka pêk nân zawng an tam lutuk e; chuti lo zawng, Israel-hoten, ‘Keimahni kut ngeia inchhandam kan ni alâwm,’ tiin mi uan khum dah ang e.

³Chuvângin, ngai teh, mipuihote beng hriatah, ‘Tu pawh hlau leh khûr apiang chu kîr leh sela, Gilead tlâng ata hi haw leh rawh se,’ tiin puang rawh,” a ti a. Tichuan, mipuite chu sînghnih leh sânghnih an kîr leh a; tin, sîngkhat an la awm a.

⁴Tin, LALPAN Gideona hnênah, “Mite kha an la tam lutuk fo mai; luiah hruai thla la, chutah chuan keiman ka thliarsak ang che. Heti hi a ni ang a, ‘He mi hi chu i hnênah kal ve rawh se,’ ka tih apiang chu i hnênah kal sela; tin, ‘He mi hi chu i hnênah kal ve suh se,’ ka tih apiang chu kal suh se,” a ti a.

⁵Chutichuan, mipuite chu luiah chuan a hruai thla a. Tin, LALPAN Gideona hnênah, “Ui anga an leia tui a liaha liak apiangte chu a hrangin dah zêl langin; chutiang bawkin kûna ṭhingṭhia tui dâwt apiangte pawh,” a ti a.

⁶Tin, an kutphaha mi a liaha liakte chu mi zathum an ni a, mi dang zawng zawng chu kûna ṭhingṭhia tui dâwt vek an ni.

⁷Tichuan, LALPAN Gideona hnênah, “Mi zathum, a liaha liakate kha hmangin ka chhandam dâwn che u a, Midian-hote hi i kutah ka pe dâwn a ni. Mipui zawng zawngte chu mahni hmun ṭheuhvah haw vek rawh se,” a ti a.

⁸Chutichuan, mipuite chuan ei tûrte leh an tawtawrâwtte chu an keng a. Tin, Israel mi zawng zawngte chu an puan in lamah a hawtîr ta vek a, mi zathumte erawh chu a awmtîr a. Midian-ho kulh chu an hnuai ruamah chuan a ni.

⁹Tin, heti hi a ni a, chumi zânah chuan LALPAN a hnênah, “Tho la, kulhah chuan zuk chhuk rawh khai; i kutah ka pe tawh e.

¹⁰Amaherawhchu, zu chhuk i hlauh chuan, i chhiahhlawh Pura nên hian kulhah chuan zuk kal phawt ula;

¹¹tichuan, an thusawi i hria ang a; chumi hnuah zawng i kut chu tihchakin a awm ang a, kulhah chuan i kal ngam tawh ang,” a ti a. Chutichuan, a chhiahhlawh Pura nên chuan kulha râl vêngho tawntirh ber awmnaah chuan an zuk kal a.

¹²Tin, Midian-hote leh Amalek-hote leh khawchhak fateho zawng zawng chu, ruamah chuan khau ang maiin tam tak an lo awm hmur mai a; an sanghâwngseite chu chhiar sên rual loh, an tam lam chu tuifinriat kama ṭiauvaivut zât zet a ni a.

¹³Tin, Gideona a zuk thlen chuan, ngai teh, mi pakhat hian a ṭhianpa chu a mumang a lo hrilh a, a hnênah, “Ngai teh, mumang ka lo nei a; tin, ngai teh, barli chhang hlâwm hi Midian-ho kulhah hian a lo lum a, puan inah hian a lo lum lût a, a rawn tichim a, a tiletling tawp a, puan in chu a pêr ta thlawp mai a,” a ti a.

¹⁴Tin, a ṭhianpa chuan a chhâng a, “Chu chu Israel mi, Joasa fapa Gideona ngûnhnâm a nih mai chu! Pathianin Midian-ho leh sipaiho zawng zawng chu a kutah a pe a nih chu,” a ti a.

¹⁵Tin, chuti chu a ni a, Gideonan chu mumang leh a awmzia an inhrilhfiah chu a hriatin, Pathian a be ta a. Tichuan, Israel-hote kulh lamah chuan a kîr leh a, “Tho rawh u khai; LALPAN Midian sipaihote chu in kutah a pe tawh e,” a ti a.

¹⁶Tichuan, mi zathumte chu pâwl thumah a siam a, an vai chuan tawtawrâwt leh bêl ruak, a chhûnga meichher dah sa a pe ṭheuh va.

¹⁷Tin, ani chuan an hnênah, “Mi en ula, ka tih angin ti ve zêl ang che u; tin, ngai teh u, kulh tawntirh ber ka thlen veleh ka tih ang zêlin ti ve ang che u:

¹⁸kei leh ka hnêna awm zawng zawngte hian tawtawrâwt kan han ham veleh, kulh vêla awm zawng zawngte pawhin tawtawrâwt in hâm vek bawk ang a, ‘LALPA tân leh Gideona tân,’ ti ṭheuh vang che u,” a ti a.

¹⁹Chutichuan, Gideona leh a hnêna awm mi zate chuan zân vên laita, râlvêng an inthlâk hlimchhâwn lai takin kulh tawntirh an zuk thleng a; tin, tawtawrâwt chu an han hâm a, an bêl ken chu an tikeh sawm vek a.

²⁰Tin, a pâwl thum chuan tawtawrâwt chu an hâm a, an bêl chu an tikeh a, an vei lamin meichher an keng a, an ding lamin tawtawrâwt ham tûr an keng a; tin, “LALPA leh Gideona ngûnhnâm!” tiin an au dur dur a.

²¹Tin, kulh vêlah chuan mi tin chu mahni dinna hmun ṭheuhvah an ding vek a; tichuan, sipaiho zawng zawng chu an tlân ta a; tin, an au chiam a, an tlânchhiattîr ta a.

²²Tin, tawtawrâwt zathum chu an hâm a; tin, LALPAN sipaiho zawng zawngte chu anmahni leh anmahni khandaihin a inbeihtîr ta chiam a; tichuan, sipaihote chu Zerera lampang Beth-sita thleng, Tabath kiang Abel-mehola ramri thlengin an tlânchhia a.

²³Tin, Israel-ho chu Naphtali aṭang te, Aser aṭang te, Manase zawng zawng aṭang te chuan an pung khâwm a, Midian-ho chu an ûm ta a.

²⁴Tin, Gideonan Ephraim tlâng ram zawng zawngah chuan, “Midian-ho hi rawn bei rawh u, Beth-bara thlengin luite chu lo lâk khalh ang che u, Jordan lui nên,” tiin mite a tlân vêltîr a. Chutichuan, Ephraim-ho zawng zawng chu an pung khâwm a, Beth-bara thlengin luite chu Jordan lui nên an lo lâk khalh vek a.

²⁵Tin, Midian lal pahnih Oreba leh Zeeba an man a. Oreba chu Oreb lungpuiah an that a, Zeeba chu Zeeb grêp sâwr khurah an that a. Midian-ho chu an ûm ta a; Oreba leh Zeeba lu chu Jordan lui râla Gideona hnênah an rawn la a.