Read Mizo_Old_version RORELTUTE 8 Bible Online

RORELTUTE 8 - Mizo_Old_version bible

RORELTUTE 8

¹Tin, Ephraim-hote chuan a hnênah, “Engtiziaa hetianga min ti nge i niha, Midian-ho i beihnaah chuan min sâwm ve loh?” an ti a, an hau nasa hle mai a.

²Tin, ani chuan an hnênah, “Nangni aiin eng nge ka tihuchuak bîk le? Abiezer-ho grêp lawh ai hian Ephraim-ho grêp hmaih chhar hi a nasa zâwk lo vem ni?

³Pathianin Midian-ho lal Oreba leh Zeeba chu in kutah a rawn pe ta a ni a. Tichuan, nangni ai hian keiin eng nge ka lo tihuchuak theih bîk ni?” a ti a. Chutichuan, chumi thu a han sawi chuan a chunga an thinrim chu a reh ta a.

⁴Tin, Gideona leh a hnêna mi zathum awmte chuan Jordan lui chu an zuk thleng a, an kân a, chau chung chungin an ûm zêl a.

⁵Tin, Sukkoth khuaa mite hnênah chuan, “Hêng ka hnungzuite hi khawngaih takin chhangpêr pe teh u khai; an chau tawh êm mai a, Midian-ho lal Zeba leh Zalmuna ka ûm a ni e,” a ti a.

⁶Tin, Sukkoth khuaa mi lianhote chuan, “Zeba leh Zalmuna chu i kuta awm tawh ang renga chutia i sipaihote chhang kan han pêk mai tûr chu?” an ti a.

⁷Tin, Gideona chuan, “Aw le, LALPAN Zeba leh Zalmuna chu ka kuta mi pêk hunah, thlalêr hlîng leh hnimhlîngneite chuan in taksa chu ka chhun thlêr diai duai mai ang maw le,” a ti a.

⁸Tin, chuta ṭang chuan Penuel-ah a han kal a, an hnênah chutiang bawk chuan a sawi leh a: tin, Penuel khuaa mite chuan Sukkoth khuaa mite chhân ang bawkin an lo chhâng ve a.

⁹Tin, Penuel khuaa mite hnênah chuan, “Remna thu hâwna ka lo kîr leh hunah he kulh hi ka rawn tichim ang maw le,” tiin a sawi bawk a.

¹⁰Zeba leh Zalmuna chu Karkor-ah an awm a, an sipaihote khawchhak fate sipaiho thi bâng zawng zawng, sîngkhat leh sângnga laite nên; khandaih keng mi ṭhiau nuai khat leh sînghnih an thi si a.

¹¹Tin, Gideona chu Noba leh Jogbeha chhak lama puan ina chênghote kawngah a han chho va, sipaihote chu a han bei a; sipaihote chu râlmuang takin an lo awm si a.

¹²Tin, Zeba leh Zalmuna chu an tlânchhe ta a; tin, ani chuan a ûm a; tichuan, Midian-ho lal pahnih Zeba leh Zalmuna chu a man a, sipaiho zawng zawngte chu a tibuai ta nuaih nuaih a.

¹³Tin, Joasa fapa Gideona chu Heres chho aṭangin indona ata chu a kîr leh ta a.

¹⁴Tin, Sukkoth khaw tlangvâl pakhat hi a man a, thu te a zâwt a; tichuan, Sukkoth khuaa mi lianhote leh upate hming chu a ziaksak vek a, sawmsarih leh pasarih an ni a.

¹⁵Tin, Sukkoth khuaa mite hnênah chuan a han kal a, “Zeba leh Zalmuna hi en teh u le, he mite hi alâwm, ‘Zeba leh Zalmuna chu i kuta awm tawh reng anga chutia i mi chaute chhang kan han pêk mai tûr chu?’ tia mi tihel vei kha,” a ti a.

¹⁶Tichuan, chumi khaw upate chu a man a, thlalêr hlîng leh hnimhlîngneite chuan Sukkoth mite chu a zirtîr a.

¹⁷Tin, Penuel khaw kulh chu a tichim a, khuaa mite pawh chu a that a.

¹⁸Tichuan, Zeba leh Zalmuna hnênah chuan, “Tabor tlânga in mi thahte kha mi eng ang nge an nih?” a ti a. Tin, anni chuan, “Nangmah ang bawk hi an ni; lal fa anna an nei ṭheuh mai,” an ti a.

¹⁹Tin, ani chuan, “Ka unau, ka nu fapate ngei an ni asin. LALPA chu a nung ngei ang hian, anni chu lo zuah ta ni ula chu, ka that lo tûr che u,” a ti a.

²⁰Tin, a fapa upa ber Jethera hnênah chuan, “Khai le, nangin that rawh,” a ti a. Nimahsela, tlangvâl chuan a khandaih a phawi lo; tlangvâl mai a la nih avângin a hlau a ni.

²¹Tichuan, Zeba leh Zalmuna chuan, “Nangmah kha lo thawk la, min rawn bei ta che; patling leh patling inbeih tûr alâwm,” an ti a. Tin, Gideona chu a tho va, Zeba leh Zalmuna chu a that ta a; tin, an sanghâwngsei nghâwnga nghâwngkawlte chu a la a.

²²Chutichuan, Israel mite chuan Gideona hnênah, “Nangin kan chungah ro rêl tawh ang che, nang leh i fapa leh, i fapaa fapate chen pawhin; nangin Midian-hote lakah hian min chhandam ta si a,” an ti a.

²³Tin, Gideonan an hnênah, “Kei zawngin in chungah hian ro ka rêl lo vang a, ka fapa lahin in chungah ro a rêl hek lo vang; LALPAN in chûngah ro a rêl zâwk ang,” a ti a.

²⁴Tin, Gideonan an hnênah, “Thil pakhat erawh chu dîl che u ka duh a ni, mi tinin in râllâk bengbeh chu mi pe ta ṭheuh che u,” a ti a (Ismael-ho an nih avângin rangkachak bengbeh an nei a ni).

²⁵Tin, anni chuan, “Kan pe mawlh ang che,” an ti a. Chutichuan, puan an phah a, mi tinin an râllâk bengbeh chu an theh chhuak ta ṭheuh va.

²⁶Tin, chûng rangkachak bengbeh a dîlte chu a rih lam rangkachak sekel sângkhat leh zasarih a ni; nghâwngkawlte, bengbehte, Midian lalte puan senduk tiam lovin, an sanghâwngseite khaidiat awrh pawh tel lovin.

²⁷Tin, Gideonan chûng chuan ephod a siam a, a awmna Ophra khuaah a dah a. Chutah chuan chumi lakah chuan Israel-ho zawng zawng chu an lo uire zo ta a. Tichuan, Gideona leh a chhûngte tân pawh thang a lo ni ta mai a.

²⁸Chutichuan, Midian-ho chu Israela thlahte hmaah chuan tihtlâwmin an lo awm ta a; tichuan, an chechâng ta lo va. Tin, Gideona dam chhûng chuan ram chu kum sawmli chhûng râlmuangin a awm a.

²⁹Tin, Joasa fapa Jerubaala chu a in lamah a awm ta a.

³⁰Tin, Gideona chuan ama hrin ngei fapa sawmsarih a nei a, nupui tam tak nei a ni si a.

³¹Tin, Sekem khuaa a hmeiin fapa a hrinsak bawk a, a hmingah Abimeleka a sa a.

³²Joasa fapa Gideona chu tar kûna damin a thi a; tichuan, Abiezrit mi Ophra khuaa a pa Joasa thlânah an phûm ta a.

³³Tin, heti hi a ni a, Gideona thih veleh chuan Israela thlahte chu an lo hnungtawlh leh ta a, Baal-te lakah an uirê a, Baal-berith chu an pathianah an lo siam ta a.

³⁴Tin, Israela thlahte chuan an vêla hmêlmate zawng zawng lak ata chhanchhuaktu LALPA an Pathian chu an hre ta lo va;

³⁵Jerubaala (Gideona chu), Israel-hote chunga theihtâwpa ṭhat chhuah ṭhîntu chhûngte chungah pawh chuan ṭhat an chhuah ve ta hek lo.