Read Mizo_Old_version RORELTUTE 9 Bible Online

RORELTUTE 9 - Mizo_Old_version bible

RORELTUTE 9

¹Tin, Jerubaala fapa Abimeleka chu Sekem khuaah a nu nuṭate hnênah a kal a, a nu pate chhûngkua zawng zawngte nên a bia a,

²“Sekem khuaa mi zawng zawngte beng hriatah thu sawi ula, ‘Jerubaala fa zawng zawng mi sawmsarihten in chunga ro an rêl nge ṭha zâwk in tih, pakhatin in chungah ro a rêl?’ ti teh u khai. Tin, kei pawh in thisen zawmpui ka ni tih hi hre reng bawk ang che u,” tiin a sawi a.

³Tin, a nu nuṭate chuan Sekem khuaa mi zawng zawngte beng hriatah chuan chûng a thu zawng zawng chu an sawi a; tichuan, Abimeleka zui duhna rilru an lo pu ta a, “Ani chu kan unau a ni alâwm,” an ti ta si a.

⁴Tin, Baal-berith in ata tangka sawmsarih an pe a, chu chuan Abimelekan mi ho tak tak leh mi tawrawt pui puite a ruai a, anni chuan amah chu an zui a.

⁵Tin, Ophra khuaa a pa inah a va kal a, Jerubaala fapa, a unau sawmsarihte chu lung pakhat chungah a that hlawm a. Jerubaala fapa naupang ber Jothama erawh chu a damah a ṭang a; a lo biru hlauh a ni.

⁶Tin, Sekem khuaa mi zawng zawng leh Beth-milo-a mi zawng zawng chu an pung khâwm a; tichuan, Abimeleka chu Sekem khuaa lungphun bul sasaw kiangah chuan lalah an siam ta a.

⁷Tin, chu chu Jothama an hrilh chuan Gerizim tlâng chhîpah a han ding a, aw ring takin a au va, an hnênah, “Nangni Sekem khuaa mite u, ka thusawi hi ngaithla teh u; tichuan, Pathian pawhin in thu a lo ngaithla ve dâwn nia.

⁸Vawi khat chu thing hi an lal atâna hriak thih tûrin an va chhuak a; olive thing hnênah hian, ‘Nang kan lalah awm ta che,’ an ti a.

⁹Nimahsela, olive thing chuan an hnênah, ‘Pathian leh mihring chawimawi phah nâna an mi hmanna ber ka hriak hi chhuahsanin thing chungah lehlam lehlaman ka phe ka phe tehlul ang maw?’ a ti a.

¹⁰Tin, thingte chuan theipui kûng hnênah hian, ‘Hawh teh, nang kan lalah awm ang che,’ an va ti a.

¹¹Nimahsela, theipui kûng chuan an hnênah, ‘Ka thlumna leh ka rah ṭha tak hi chhuahsanin, thing chungah lehlam lehlaman ka phe ka phe tehlul ang maw?’ a ti a.

¹²Tin, thingte chuan grêp hrui hnênah, ‘Hawh teh, nang kan lalah awm ang che,’ an ti a.

¹³Tin, grêp hrui chuan an hnênah, ‘Pathian leh mihring tilâwm ṭhîntu ka uain hi chhuahsanin, thing chungah lehlam lehlaman ka phe ka phe tehlul ang maw?’ a ti a.

¹⁴Chutichuan, thing zawng zawng chuan hlîng hnênah, ‘Hawh teh, nang kan lalah awm ang che,’ an ti a.

¹⁵Tin, hlîng chuan thing hnênah, ‘In lal atâna hriak mi thih takzet in nih chuan ka hlimah hian lo bi ta che u; in nih loh erawh chuan hlîngah chuan mei lo chhuakin Lebanon tlânga sidar thingte chu kâng zo vek rawh se,’ a ti a.

¹⁶“Chutichuan, Abimeleka in lal atâna in lo siam ta hi tihtakzet leh fel taka ti in niha, Jerubaala leh a chhûngte chu ṭha taka in tiha, a phu ang zêla a chunga lo ti te in niha

¹⁷(ka pa hian râl a lo dosak che u a, a lo thih phah ta hial a, Midian-ho kut ata chu a lo chhanchhuak ta che u a:

¹⁸vawiinah hian ka pa chhûngte chungah chuan in lo hel a, a fapate sawmsarih zet lung pakhat chungah in lo tihlum a, in unaupa a nih avângin a bawihnu fapa Abimeleka hi Sekem khaw mite lalah in lo siam ta si a),

¹⁹vawiinah hian Jerubaala leh a chhûngte chunga tih tak zet leh fel taka ti in nih phawt zawngin le, Abimeleka chungah hian lâwm rawh u; tin, ani pawh in chungah hian lâwm rawh se.

²⁰Chutiang a nih loh erawh chuan Abimeleka aṭang hian mei lo alh chhuak sela, Sekem khuaa mite leh Beth-milo mite chu kâng zo vek rawh se; tin, Sekem khuaa mite leh Beth-milo aṭangin mei lo alh chhuak sela, Abimeleka chu kâng zo vek rawh se,” a ti a.

²¹Chutichuan, Jothama chu a tlân a, a tlân bo va, Beer-ah a tlân a, a unaupa Abimeleka a hlauh avângin chutah chuan a awm ta reng a.

²²Tin, Abimeleka chu Israel-ho chungah kum thum a lal a.

²³Tin, Pathianin Abimeleka leh Sekem khuaa mite kârah chuan rilru sual a awmtîr a; tichuan, Sekem khuaa mite chuan Abimeleka chungah vervêk takin an ti ta a;

²⁴chu chu Jerubaala fapa sawmsarihte chunga râwng taka an tih avânga an chunga phuba lâkna a lo thlen theihna tûr leh, anmahni thattu an unaupa Abimeleka chungah leh, a unaute that tûra a kut lo tichaktu Sekem-hote chunga an thisen a awm theihna tûrin a ni.

²⁵Tin, Sekem khuaa mite chuan tlâng chhîpahte amah châng rutute an dah a, chumi kawnga kal apiangte chu an lo suam ṭhîn a; chumi thu chu Abimeleka an hrilh a.

²⁶Tin, Ebeda fapa Gaala a unauteho nên an lo thawk a. Sekem khuaah an lût a; Sekem-hote chuan an lo ringhlel lo va.

²⁷Tin, lo lamah an va kal a, an grêp huana mi an lo va, an chîl a, an kût a, an pathian inah an lût a, an eiin an in a, Abimeleka chu ânchhia an lawh a.

²⁸Tin, Ebeda fapa Gaala chuan, “Tu nge ni Abimeleka chu? Sekema pawh hi tu nge maw a niha, keinin a rawng kan han bâwl tehlul tûr chu? Jerubaala fa a ni lâwm ni? Zebula hi a upa a ni lâwm ni? Sekema pa Hamora hote rawng i bâwl ang u hmiang! Engah nge ani rawng chu kan bâwl ang?

²⁹Hêngho hi ka thuin han awm teh sela chu aw! Abimeleka hi ka han titlâwm dêr mai tûr,” a ti a. Tin, Abimeleka hnênah, “I sipaite tipung la, lo thawk rawh khai,” a ti a.

³⁰Tin, chumi khaw rorêltu Zebula chuan Ebeda fapa Gaala thusawi chu a lo hriat chuan, a thin a ur ta thut a.

³¹Tichuan, fin vervêkin Abimeleka hnênah chuan, “Ngai teh, Ebeda fapa Gaala leh a unauteho Sekem-ah an lo kal a; tin, ngai teh, i chunga helpui tumin khuaa mite an fuihpawrh e.

³²Chutichuan, i hote nên a zân a zânin lo thawk ula, phûlah lo châng rawh u.

³³Tichuan, heti hi a ni ang a, zîngah ni chhuah veleh, tho la, khua chu rawn bei mai ang che; tin, ngai teh, amah leh a hote chuan an rawn beih dâwn veleh che, remchâng i tih dân ang angin an chungah lo ti mai ang che,” tia hrilh tûrin mite a tlântîr a.

³⁴Chutichuan, Abimeleka leh a hote zawng zawng chu a zân a zân chuan an tho va, pâwl lia insiamin Sekem khua chu an hual ta a.

³⁵Tin, Ebeda fapa Gaala chu a va chhuak a, khawpui luhna kawngkaah chuan a va ding a; Abimeleka chu a hote nên chuan an chân rûkna hmun ata chu an lo thawk ta a.

³⁶Tin, Gaalan mipuite a han hmuh chuan Zebula hnênah, “Ngai teh, tlâng chhîp aṭangin mipuite an lo chhuk e,” a ti a. Tin, Zebula chuan a hnênah, “Tlâng hlim saw mihring angin i hmu mai a ni ang,” a ti a.

³⁷Tin, Gaala chuan, “En ta che maw le, ram lai taka saw mipui an lo chhuk, pâwl khat phei chu Meonenim sasaw thing kawngah an lo kal saw,” a ti leh a.

³⁸Tichuan, Zebula chuan a hnênah, “ ‘Tu nge maw Abimeleka, a rawng kan han bâwl tûra chu ni?’ tia i sawina ka kha khawiah nge ni ta? Hêngho hi i mi hmuhsitate ngei kha an ni lâwm ni? Va chhuak la, va bei mawlh rawh khai,” a ti a.

³⁹Tichuan, Gaala chuan Sekem-hote hma chu a va hruai a. Abimeleka chu a va bei ta a.

⁴⁰Tin, Abimeleka chuan a lo ûm a, a tlânchhe ta a, khawpui luhna kawngka thlengin mi tam tak hliamin an tlu phung mai a.

⁴¹Tin, Abimeleka chu Aruma khuaah chuan a awm ta a; tichuan, Zebula chuan Gaala leh a unauteho chu Sekem khuaa awm thei lo tûrin a hnawt chhuak ta vek a.

⁴²Tin, heti hi a ni a, a tûkah chuan Sekem mipuite chu phûlah an va kal chhuak a; tin, Abimeleka an va hrilh a.

⁴³Tin, mipuite chu a hruai a, pâwl thumah a siam a, phûlah chuan an châng a. Tin, a han hawi a, ngai teh, mipuite chu khawpui ata an lo chhuak a; tichuan, anmahni chu a lo bei a, a lo that a.

⁴⁴Tin, Abimeleka leh a pâwlhote chuan an lo bawh a, khawpui luhna kawngkaah chuan an va ding a; tin, pâwl hnihte chuan phûla awmho zawng zawng chu an bawh chiam a, an that ta hlawm a.

⁴⁵Tin, Abimeleka chuan khawpui chu chumi ni chuan nilêngin a bei a; khawpui chu a la a, a chhûnga mite chu a that a; khawpui chu a chhu chhe vek a, chiin a theh ta a.

⁴⁶Tin, Sekem kulha awm zawng zawngte chuan chumi thu chu an lo hria a. El-berith kulhbîngah an lût ta vek a.

⁴⁷Tin, Sekem kulha mi zawng zawngte chu an awm khâwm vek tih Abimeleka an hrilh a.

⁴⁸Tin, Abimeleka leh a hnêna awmho zawng zawngte chu Zalmon tlângah an chho va. Tin, Abimeleka chuan hreipui a keng a, thingzâr a chêk thla a, a pu ta a; tin, a hote hnênah chuan, “Ka tih dân in hmu a, ka tih ang hian nangni pawhin ti ve thuai thuai rawh u,” a ti a.

⁴⁹Tin, mi zawng zawngin thingzâr chu an chêk thla ve ṭheuh va, Abimeleka chu an zui a, kulhbîng vêlah chuan an dah zêl a, kulhbîngah chuan an hâl khum ta a; chutichuan, Sekem kulha mi zawng zawngte pawh chu an thi a, mipa leh hmeichhia sângkhat lai an ni.

⁵⁰Tichuan, Abimeleka chu Thebez khuaah a kal a, Thebez khua chu a hâl a, a la a.

⁵¹Amaherawhchu, chu khawpui chhûngah chuan kulhpui a awm a, chutah chuan mipa leh hmeichhia zawng zawng leh khawpui chhûnga mi zawng zawng chu an tlân lût a, an inkhâr khum tlat a, kulh chungah chuan an awm khâwm a.

⁵²Tin, Abimeleka chu kulh lamah chuan a han kal a, a han bei a, hâl tumin kulh kawngka bulah a kal a.

⁵³Tin, hmeichhia tuin emaw buh râwt sawmna chung lam lung hi Abimeleka luah a zuk thlâk a, a lu ruh a keh a.

⁵⁴Tichuan, a râlthuam kengtu tlangvâl chu a ko thuai a, a hnênah, “I khandaih kha phawi la, mi han that teh khai; tichuan, miten, ‘Hmeichhe thah a ni,’ mi tih loh nân,” a ti a. Tin, a tlangvâl chuan a vit tlang ta zawk a; tichuan, a thi ta a.

⁵⁵Tin, Israel-hote chuan Abimeleka chu a thi tih an hriat veleh mi tin mahni in lamah an haw ta ṭheuh va.

⁵⁶Abimelekan a unaute sawmsarih a thaha, a pa chunga a tih dân kawnga a suahsualna kha Pathianin chutiang chuan a lo thungrûl ta a ni.

⁵⁷Tin, Sekem khuaa mite suahsualna zawng zawng kha Pathianin a rawng thungrûl ve ta bawk a; tin, Jerubaala fapa Jothama ânchhia kha an chungah chuan a lo tla ta a ni.