Read Mizo_Old_version LEHKHATHAWN PAHNIHNA JOHANA 1 Bible Online

LEHKHATHAWN PAHNIHNA JOHANA 1 - Mizo_Old_version bible

LEHKHATHAWN PAHNIHNA JOHANA 1

¹Upa chuan, Hmeichhe ṭha thlan leh a fate hnênah: Thutak, keimahnia awm reng, kumkhua pawha kan hnêna awm tûr avâng hian tihtakzetin ka hmangaih che u a ni; kei chang ka ni lo ve, thutak chu hria apiang pawhin a ni.

³Pa, Pathian leh Pa Fapa, Isua Krista hnên ata khawngaihna te, zahngaihna te, remna te chu, thutak leh hmangaihnain kan hnênah a awm ang.

⁴Pa hnên ata thupêk kan hmuh ang khân i fa tute emaw thutaka awmin ka hmuh avângin ka lâwm hle a ni.

⁵Hmeichhe ṭha, i hnênah thupêk thar ziak ang ni lovin, a tîr ata kan neih ang kha ziak zâwkin, kan inhmangaih tawnna tûrin ka ngên chiam a che.

⁶Tin, hei hi hmangaihna a ni, ama thupêk ang zêla kan awm hi. Thupêk, a tîr ata in hriat ang chu hei hi a ni, chumiah chuan in awm tûr chu.

⁷Bumtu tam tak - Isua Krista chu tisain a lo kal tih ṭan lotute kha - khawvêlah hian an lo chhuak ta si a. Chutiang mi chu a ni, bumtu leh Krista dodâltu chu.

⁸Kan thawh chhuah sate kha in hloh lohva, a man chu a kima in hmuh theih zâwk nân invêng ṭha rawh u.

⁹Tu pawh Krista zirtîrna thua awm reng lova, kal pel chuan Pathian a nei lo ve. Chumi zirtîrna thua awm reng erawh chuan, chu mi ngei chuan Pa leh Fapa a nei kawp a ni.

¹⁰Tu pawh chumi zirtîrna thu chu rawn keng lovin in hnênah lo kal sela, in inah thlentîr suh ula, ṭawngkam ṭha pawhin thlah suh u;

¹¹ṭawngkam ṭhaa thlahtu chu a thil tihsualah chuan a tel ve si a.

¹²In hnênah thu tam tak sawi tûr ka neih avângin lehkha leh lehkhatuiin ziak ka duh lo ve; in lâwm a kim theih nân in hnêna lo kala, inhmatawna inbiak ka beisei zâwk a ni.

¹³I laizâwnnu thlana faten chibai an bûk a che.