Read Mizo_Old_version LEHKHATHAWN JUDA 1 Bible Online

LEHKHATHAWN JUDA 1 - Mizo_Old_version bible

LEHKHATHAWN JUDA 1

¹Juda, Isua Krista bawih leh Jakoba unau chuan, Pa Pathian hmangaih, Isua Krista tâna khêk, kohvate hnênah chuan:

²Khawngaihna te, remna te, hmangaihna te in chungah tihpunin awm rawh se.

³Duh takte u, kan chan tlân chhandamna thu in hnêna ziak ka tum hrâm hrâm laiin, mi thianghlimte hnêna rinna vawi khat kawltîr lamah chuan ṭhahnemngai taka beia fuih tûr che uin, in hnênah lehkha ziak a ṭûl tih ka lo hria a.

⁴Mi tute emaw a rûka lût an awm si a, hmânlaia he thiam lohna chang tûra ruatate chu; chûng chu Pathian ngaihsak lo mite an ni a, kan Pathian khawngaihna chu hurnaah an chantîr a, kan Hotu leh kan Lalpa neih chhun, Isua Krista chu an awih lo bawk a.

⁵Tin, engkim vawi khat hre vek mah ula, Lalpan Aigupta ram aṭanga mite a chhanchhuaha, chumi hnuin a ring lote chu a tihboralzia kha hriat nawntîr che u ka duh a ni.

⁶Tin, vântirhkohte anmahni tirhkoh nihna pawm lova, an awmna pângngai kalsan zâwkte chu, ni ropui rorêlna atân thim hnuaiah chatuan phuarnaa phuar chungin a khêk a ni.

⁷Sodom leh Gomorra, an kiang vêla khuate nên, chutiang bawkin inngaihnaa inpumpêkin, awm loh lohva an awm avângin chatuana meia hremna tuarin, hriattîr nâna târ chhuahin an awm ang khân.

⁸Nimahsela, chûng mite pawh chuan, chutiang bawkin an mumang avângin an tisa chu an tibawlhhlawh a, Lalpa thuneihna chu an pawisa lo va, ropuinate an sawichhia a.

⁹Nimahsela, Mikaela, vântirhkoh chungnung ber mah khân Diabola nên an inbeiha, Mosia ruang thua an inhnial lai khân Diabola chungthu rêlsakin a sawichhe ngam lo va, “Lalpan hau zâwk che rawh se,” a ti ta a nih kha. [1]

¹⁰Chûng mite erawh chuan thil an hriat loh apiang an sawichhe ṭhîn a; tin, ngaihtuahna nei lo ramsate neih ang pianpui hriatna an neih an zawm ṭhinte chuan anmahni an intichhe ṭhîn.

¹¹An chung a pik e! Kaina kawng chu an zawh a, hlawh hmu tûrin Balaama sual kawngah chuan an tlân vak vak a, Kora hnialnaah chuan an boral tâk kha.

¹²Chûngte chuan in hnênah ruai an ṭhehin, in hmangaihna ruai ṭhehnaah chuan lungpui tui chîm vekte chu an ni a, hlauh nachâng hre lo berâm vêngtu mahni inchâwmte an ni; chhûm tui pai lo, thli chhêm lênte an ni; favânga thing, rah lo, vawi hnih thi tawh, zung chawpa pawh chhuahte an ni;

¹³tuifinriat fâwn invawrh, mahni mualphona phuan chhuakte an ni; arsi vâk vâk, chatuana thim chhah mup khêksakate chu an ni a.

¹⁴Tin, chu mite hnênah pawh chuan Enoka, Adama aṭanga pasarihna chuan a hril lâwk a, “Ngai teh u, mi zawng zawng chunga rorêl tûr leh, Pathian ngaihsak lote zawng zawng Pathian ngaihsak lohna hna Pathian ngaihsak lo chunga an thawh zawng zawng kawngah leh, Pathian ngaihsak lo mi sualten a chungah thu khauh tak an sawi zawng zawng kawnga thiam loh chantîr tûrin, Lalpa chu a mi thianghlim sîngkhatte nên a lo kal a ni,” tiin.

¹⁶Chûngte chu phunnawi leh sawisêltute an ni a, anmahni châkna ang zêlin an awm a, an kâte pawhin uan thu pâwr tak a sawi a, hlâwkna duh vângin mi an ngaina ṭhîn a ni.

¹⁷Nimahsela, duh takte u, nangni zawngin kan Lalpa Isua Krista tirhkohten thu an hrilh lâwkte kha hre reng rawh u.

¹⁸“Hun hnuhnûngah chuan Pathian ngaihsak lo lam, anmahni châkna ang zêla awmin, nuihsantute an lo la awm ang,” tih in hnêna an sawiziate kha.

¹⁹Chûng mite chu tisa mi, Thlarau nei lo, pâwl hrangte siamtu chu an ni.

²⁰Nimahsela, duh takte u, nangni zawngin in rin chhan thianghlim ber chungah chuan nangmahni leh nangmahni inrem chhovin, Thlarau Thianghlimah ṭawngṭaiin,

²¹chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan invawng ṭha rawh u.

²²Ṭhenkhat ringhlela awmte chu khawngaih rawh u;

²³ṭhenkhat mei ata la chhuak thuai ula, chhandam rawh u; ṭhenkhat an tisa bawlhhlawh kaina silhfên lam pawh chu tenin, hlau chungin khawngaih rawh u.

²⁴Tichuan, in tlûk loh nâna vêng thei che u leh, a ropuina hma taka nasa zeta hlimin, bawlhhlawh kai lova dah theitu che u,

²⁵kan Chhandamtu Pathian taka chauh hnênah chuan, kan Lalpa Isua Krista avângin, hun rêng awm hmaah leh tûnah leh chatuan thlengin chawimawina te, ropuina te, rorêlna te, thuneihna te awm rawh se. Amen.