Read Mizo_Old_version JOHANA HNENA ISUA KRISTA THU PUAN CHHUAH 1 Bible Online

JOHANA HNENA ISUA KRISTA THU PUAN CHHUAH 1 - Mizo_Old_version bible

JOHANA HNENA ISUA KRISTA THU PUAN CHHUAH 1

¹Isua Krista thu puan chhuah, Pathianin a bawihte hriattîr atân a hnêna a pêk, thil lo thleng thuai tûr thu chu; tin, chu chu a vântirhkoh hmangin a bawih Johana a rawn hriattîr a;

²chu Johana chuan Pathian thu leh Isua Krista hriattîrna thu, a thil hmuh zawng zawng thu chu a hriattîr a.

³He hrilh lâwkna bu thu chhiartu leh ngaithlaa a chhûnga thu ziak pawmtute chu an eng a thâwl e; a hun chu a hnai tawh si a.

⁴Johana chuan, Asia rama kohhran pasarihte hnênah chuan: Awm mêka leh, awm tawha leh, lo la awm tûra hnên aṭang te, a lalṭhutphah hmaa Thlarau pasarih awmho hnên aṭang te, Isua Krista, thuhretu rinawm tak, mitthi zîng ata piang hmasa bera leh leia lalte rorêltute hnên aṭang te chuan, khawngaihna leh remna in hnênah awm rawh se. Min hmangaiha, a thisenin kan sualte lak ata min tlan chhuaka,

⁶khua leh tuiah leh a Pathian leh a Pa lama puithiama min siamtu hnênah, a ni, ama hnên ngeiah ropuina leh rorêlna chu chatuanin awm rawh se. Amen.

⁷Ngai teh u, ani chu chhûmte nên a lo kal dâwn e; mit tinrêngin an hmu ang a, a chhuntute ngei pawh khân; khawvêla hnam zawng zawngin amah an ṭah bawk ang. A ni, Amen.

⁸“Kei Alpha leh Omega ka ni,” Lalpa Pathian, awm mêka leh, awm tawha leh, lo la awm tûra, Engkimtitheia chuan a ti a ni.

⁹Kei Johana, in unaupa leh, Isuaa hrehawmna te, khua leh tui te, chhelna te ṭâwmpuitu che u hi, Pathian thu avâng leh Isua hriattîrna thu avângin Patmos thliarkâr an tihah chuan ka awm a.

¹⁰Lalpa niah chuan Thlarauvin ka lo awm a; tin, ka hnung lamah tawtawrâwt ri ang, aw ring takin,

¹¹“I thil hmuh tûr chu lehkhabuah ziak la, kohhran pasarihte hnênah - Ephesi khuaah te, Smurna khuaah te, Pergamos khuaah te, Thuatira khuaah te, Sardis khuaah te, Philadelphia khuaah te, Laodikei khuaah te chuan thawn rawh,” a tih ka hria a.

¹²Tin, mi biakna aw chu hmuh tumin ka han lehhawi ta a. Tin, ka han lehhawi chuan rangkachak khâwnvâr dahna pasarih ka hmu a;

¹³khâwnvâr zîngah chuan mi tu emaw mihring fa ang, ke lêr thlenga puan sin, a âwma rangkachak kâwnghrena inhrêng ka hmu bawk a.

¹⁴Tin, a lu leh a sam chu berâm hmul vâr angin a vâr a, vûr ang maiin; a mitte chu meialh ang a ni a;

¹⁵a kephahte chu dâr tle mi ang a ni a, rawh tuina meia rawh thianghlim tawh ang maiin; a aw chu tui tam tak ri ang mai a ni.

¹⁶Tin, a kut ding lam chuan arsi pasarih a keng a; a kâ aṭang chuan khandaih hriam tawn hriam tak a chhuak a; a hmêl chu ni sat vânglai tak ang a ni.

¹⁷Tin, amah chu ka hmuh veleh thi ang dêrin a ke bulah ka tlu ta a. Tin, ani chuan a kut ding lam chu ka chungah nghatin ka hnênah, “Hlau suh ang che; kei Hmasabera leh Hnuhnûngbera leh,

¹⁸Mi Nunga chu ka ni; ka lo thi a; nimahsela, ngai teh, kumkhua atân ka nung leh ta a ni. Thihna leh Mitthi Khaw chabite chu ka nei bawk a.

¹⁹“Chutichuan, i thil hmuh tawhte leh thil awm mêkte leh, tûn hnua thil lo awm tûrte thu chu ziak rawh;

²⁰ka kut ding lama arsi pasarih awm i hmuhte leh, rangkachak khâwnvâr dahna pasarihte thurûk chu. Arsi pasarih chu kohhran pasarihte tirhkoh an ni a; khâwnvâr pasarih chu kohhran pasarihte chu an ni e.