Read Mizo_Old_version JOHANA HNENA ISUA KRISTA THU PUAN CHHUAH 10 Bible Online

JOHANA HNENA ISUA KRISTA THU PUAN CHHUAH 10 - Mizo_Old_version bible

JOHANA HNENA ISUA KRISTA THU PUAN CHHUAH 10

¹Tin, vântirhkoh chak tak dang pakhat, chhûma inthuam, vân aṭanga lo chhuk ka hmu a; a lu-ah chuan chhimbâl chu a zâm a, a hmêl chu ni ang a ni a, a kete chu mei ban ang a ni.

²Tin, a kut chuan lehkhabu tê tak tê hawn sa a keng a; tin, a ke ding lamin tuifinriat a rap a, a vei lamin khawmual a rap a.

³Tin, sakeibaknei hahum angin aw ring takin a au ta a; tin, a au zawh chuan khawpui ri pasarihte chuan an aw an chhuah ta a.

⁴Tin, khawpui ri pasarihte chuan an aw an chhuah veleh ka ziak dâwn a; tichuan, “Khawpui ri pasarihte thusawi chu zêp tlat la, ziak suh,” tiin vân aṭangin aw ka hre ta a.

⁵Tin, vântirhkoh, tuifinriat leh khawmuala ding ka hmuha chuan a kut ding lam chu vân lamah a phar a,

⁶chatuana nung renga, vân, a chhûnga thil awmte nên, lei, a chhûnga thil awmte nên, tuifinriat, a chhûnga thil awmte nêna siamtu chu chhâlin, “Hun a awm tawh lo vang;

⁷nimahsela, vântirhkoh pasarihna thâwm a awm hunah, a ham dâwn ṭêpin, Pathian thurûk chu a kim tawh ang, a bawih zâwlneite hnêna a chanchin ṭha hrilh ang khân,” a ti a.

⁸Tin, vân ata aw ka hriat khân mi be leh a, “Tuifinriat leh khawmuala ding vântirhkoh kuta lehkhabu hawn sa saw va la rawh,” a tih ka hria a.

⁹Tin, vântirhkoh hnênah chuan ka va kal a, a hnênah, “Lehkhabu tê tak tê kha mi pe rawh,” ka ti a. Tin, ani chuan ka hnênah, “La la, ei zo vek rawh; tichuan, i pum chu a tikhâ ang a, i kâah erawh chuan khawizu angin a thlum ang,” a ti a.

¹⁰Tin, vântirhkoh kut ata lehkhabu tê tak tê chu ka la a, ka ei zo vek a; tichuan, ka kâah chuan khawizu angin a thlum a; nimahsela, ka ei zawh veleh ka pum chu a kha zo ta a.

¹¹Tin, ka hnênah, “Mi tam tak te, hnam tam tak te, ṭawng tam tak te, lal tam tak te chungchâng thu i hril leh ang,” an ti a.