Read Mizo_Old_version JOHANA HNENA ISUA KRISTA THU PUAN CHHUAH 11 Bible Online

JOHANA HNENA ISUA KRISTA THU PUAN CHHUAH 11 - Mizo_Old_version bible

JOHANA HNENA ISUA KRISTA THU PUAN CHHUAH 11

¹Tin, luang, tiang ang hi mi pe a; tichuan, tuin emaw, “Tho la, Pathian biak in, maichâm nên, a chhûnga betute nên teh rawh.

²Biak in pâwn lama hung chhûng kawtlai erawh chu teh tel suh, chu chu Jentailte hnêna pêk a ni tawh si a; anni chuan Khaw Thianghlim chu thla sawmli leh thla hnih an rap bet ang.

³Tin, ka thuhretu pahnihte hnênah chuan thu ka pe ang a; tichuan, saiip puan sinin ni sângkhat leh zahnih leh sawmruk chhûng zawng thu an hril ang,” a ti a.

⁴Chûng chu olive thing pahnih leh khâwnvâr dahna pahnih, khawvêl lal hmaa dingte chu an ni.

⁵Tin, anni chu tu pawhin tihnat an tum chuan, an kâ aṭangin mei a lo chhuak a, an hmêlmate chu a kâng ral ṭhîn. Tin, tu pawhin anni chu tihnat tum ang sela, chutiang bawka tihhlumin an awm tûr a ni.

⁶Chûngte chuan an thuhril chhûng zawng ruah sûr lo tûra vân tihpin theihna an nei; an duh hun apianga thisena chantîr tûrin tuite chungah thu an nei a, khawvêl hi hremna tinrênga hrem tûrin thu an nei bawk a.

⁷Tin, an hriattîrna thu chu an hril zawh huna leilâwt aṭanga sakawlh lo chhuak chho tûr chuan anmahni a do vang a, a hneh ang a, a tihlum ang.

⁸Tin, an ruang chu khaw ropui kawtthlêrah chuan a awm reng ang a; chu khaw ropui chu thlarau lam thu-ah chuan Sodom leh Aigupta an ti a ni, chutah bawk chuan an Lalpa chu khen behin a awm kha.

⁹Tin, mite zînga mi te, chite zînga mi te, ṭawngte zînga mi te, hnamte zînga miten ni thum leh a chanve an ruangte chu an en ang a, an ruangte chu thlâna phûm an phal lo vang.

¹⁰Tin, an thih avângin leia awmte chu an lâwm ang a, hlimna an siam ang a, lâwmna te an inthawn bawk ang; zâwlnei pahnihte chuan leia awmte chu an tihhrehawm ṭhin avângin.

¹¹Tin, ni thum leh a chanve hnuah chuan Pathian hnên ata nunna thaw chu an chhûngah a lo lût a, an kein an ding ta a; tichuan, a hmutute chuan an hlau ta êm êm a.

¹²Tin, an hnênah, “Hetah hian lo chho rawh u,” tia vân aṭanga aw ring tak an hria a. Tichuan, chhûm zîngah chuan vânah an chho ta a; an hmêlmate chuan an hmu reng a.

¹³Tin, chumi lai tak chuan lîr nasa takin a lo nghîng a, khua chu hmun sâwma ṭhena hmun khat a chim ta a, lîrnghîngah chuan mi sângsarih an thi a; tin, a bâkte chuan an hlau va, vân Pathian chu an chawimawi ta a.

¹⁴Chungpikna pahnihna chu a reh tawh a; ngai teh, Chungpikna pathumna chu a lo thleng thuai dâwn e.

¹⁵Tin, vântirhkoh pasarihna chuan a han hâm a; tichuan, “Khawvêl ram chu kan Lalpa leh a Krista ram a lo ni ta, ani chuan chatuanin ro a rêl ang,” tiin vânah chuan aw ring takte a lo chhuak ta nghâl a.

¹⁶Tichuan, Pathian hmaa an lalṭhutphaha upa sawmhnih leh pali ṭhute chu an bawkkhup a,

¹⁷“Aw Lalpa Pathian, Engkimtithei, awm mêk leh awm tawh, i thiltihtheihna ropui tak chu laa ro i rêl avângin lâwm thu kan hrilh a che.

¹⁸Hnamte chu an thinur a; tin, i thinur chu a lo thleng ve thung a, mitthi rorêlsak hun leh, i bawih zâwlneite hnênah te, an lâwmman pêk hun leh, lei tichhetute tihchhiat ve thung hun chu a lo thleng bawk a,” tiin Pathian chibai an bûk a.

¹⁹Tin, vâna Pathian biak in chu an hawng a. Tichuan, a biak inah chuan a thuthlunna bâwm chu a lo lang ta a; tin, kâwlphe te, aw te, khawpui ri te, lîrnghîng te, rial nasa tak te a lo awm ta nghâl a.