Read Mizo_Old_version JOHANA HNENA ISUA KRISTA THU PUAN CHHUAH 13 Bible Online

JOHANA HNENA ISUA KRISTA THU PUAN CHHUAH 13 - Mizo_Old_version bible

JOHANA HNENA ISUA KRISTA THU PUAN CHHUAH 13

¹Tichuan, tuifinriat ṭiauphovah chuan a ding ta a. Tin, sakawlh ki sâwm leh lu sarih nei, tuifinriat aṭanga lo chhuak ka hmu a, a kîahte chuan lallukhum sâwm a awm a, a luahte chuan Pathian sawichhiatna hmingte a awm bawk a.

²Tin, ka sakawlh hmuh chu keitê ang a ni a, a kete chu savawm ke ang a ni a, a ka chu sakeibaknei ka ang a ni; tin, dragon chuan a hnênah a thiltihtheihna leh a lalṭhutphah leh thuneihna nasa tak a pe a.

³Tin, a lu pakhat chu thihpui khawp hiala hliam angin ka hmu a; nimahsela, a thihpui khawp hial tûra hliam chu a dam ta a; tichuan, leia mi zawng zawngin sakawlh chu mak an ti a, an zui a.

⁴Tin, sakawlh hnênah chuan a thuneihna chu a pêk avângin, dragon chu Pathian chibai bûkin an bûk a; tin, “Sakawlh ang hi tu nge awma, tu nge do thei awm?” tiin sakawlh pawh chu an bûk bawk a.

⁵Tin, uanna leh Pathian sawichhiatna kâ a hnênah pêk a ni a, thla sawmli leh pahnih che tûrin thu pêk a ni bawk a.

⁶Tichuan, Pathian sawichhiain a kâ a âng ta a, a hming leh a awmna vâna awmhote chu sawichhe tûrin.

⁷Tin, mi thianghlimte a do leh a hneh phal a ni a; chi tinrêng te, mi tinrêng te, ṭawng tinrêng te, hnam tinrêng te chunga thuneihna a hnênah pêk a ni bawk a.

⁸Tichuan, leia awm zawng zawng, leilung pian tirha talh tawh Berâmno Nunna Bua hming ziak loh apiang chuan, Pathian chibai bûkin an bûk ang.

⁹Tu pawhin beng an neih chuan hre rawh se.

¹⁰Tu pawh sala awm tûr chu salah an awm ang, tu pawh khandaiha thi tûr chu khandaiha tihhlum an ni ang. Hetah hian mi thianghlimte chu chhel tak leh rinawm taka an awm a ṭulzia a lang.

¹¹Tin, sakawlh dang lei aṭanga lo chhuak ka hmu a; berâmno kî ang ki pahnih a nei a, dragon ṭawng angin a ṭawng a.

¹²Sakawlh hmasa zâwk thuneihna zawng zawng kha a mit hmuhah a hmang a. Lei leh a chhûnga awm zawng zawng chu sakawlh hmasa zâwk, thihpui khawp hial tûra hliam dam leha chu chibai a bûktîr bawk a.

¹³Tin, mihring mit hmuhah vân aṭanga leia mei tlâktîr thei khawp hialin thil mak ropui tak a ti ṭhîn.

¹⁴Leia awmte hnênah sakawlh, khandaiha hliam hnu la dama chawimawi nân amah lem an siam tûr a ni tih sawiin, sakawlh mit hmuha thil mak ti tûra thu a hmuh, chûng thil mak avâng chuan leia awmte chu a bum bawk a.

¹⁵Tin, sakawlh lem chu a ṭawng theihna tûr leh, sakawlh lem chibai bûk lo apiang a tihhlumtîr theih bawkna tûrin, sakawlh lem hnênah chuan thâwkna a pêk phal a ni.

¹⁶Tin, mi zawng zawng a lian a têin, a hausa a retheiin, bawih leh bâwih lo pawh, an kut ding lamah emaw, an chalah emaw chhinchhiahna a neihtîr hlawm a;

¹⁷chhinchhiahna - sakawlh hming emaw, a hming nambar emaw - neite chauh lo chuan tu mân eng mah an lei leh an hralh theih loh nân.

¹⁸Hetah hian fin a ṭulzia a lang. Chhût thiam chuan sakawlh nambar chu chhût rawh se; mihring nambar a ni si a; a zât chu zaruk leh sawmruk leh paruk a ni.