Read Mizo_Old_version JOHANA HNENA ISUA KRISTA THU PUAN CHHUAH 14 Bible Online

JOHANA HNENA ISUA KRISTA THU PUAN CHHUAH 14 - Mizo_Old_version bible

JOHANA HNENA ISUA KRISTA THU PUAN CHHUAH 14

¹Tin, ka han en a; tin, ngai teh, Berâmno, Zion tlânga ding leh, an chala a hming leh a Pa hming ziak mi nuai khat leh sîngli leh sângli a hnênah ka hmu a.

²Tin, vân aṭanga englo ri, tui tam tak ri ang leh khawpui ri nasa tak ang ka hria a; tin, ka ri hriat chu ṭingṭang kaituten an ṭingṭang kaih ri ang a ni a;

³lalṭhutphah hmaah leh Thil nung pali leh upate hmaah chuan hla thar ni âwm tak hi an sa a; tin, lei ata tlan tawh mi nuai khat leh sîngli leh sângli chauh lo kha chuan, tu mân chu hla chu an zir thei lo.

⁴Chûng chu hmeichhe laka intibawlhhlawh lote chu an ni; nula thianghlim ang an ni si a. Chûng chu Berâmno kalna apianga zuitute chu an ni. Chûng chu Pathian tân leh Berâmno tân rah hmasa ber ni tûrin, mihring zîng ata tlan an ni.

⁵An kâah dâwt a chhuah rêng miin an hre ngai lo; sawisêl bo an ni si a.

⁶Tin, leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra, chatuana Chanchin Ṭha nei vântirhkoh dang vanlaizâwla thlâwk ka hmu a;

⁷tin, ani chuan aw ring takin, “A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,” a ti a.

⁸Tin, vântirhkoh dang, a pahnihna chuan, “Babulon khaw ropui, a mi ngaih chîn vânga thinurna uain hnam zawng zawng intîrtu chu a tlâwm ta, a tlâwm ta,” tiin a rawn zui a.

⁹Tin, vântirhkoh dang, a pathumna chuan aw ring takin, “Tu pawhin sakawlh leh a lem chibai bûkin, an chalah emaw, an kutah emaw chhinchhiahna an neih chuan,

¹⁰chûng mite ngei chuan Pathian thinurna uain, a thinurna nova eng mah pawlh lova siam chu an in ang a, vântirhkoh thianghlimte mit hmuh leh Berâmno mit hmuhah chuan mei leh kâta nghaisakin an awm bawk ang.

¹¹Tin, chûng mite nghaisakna meikhu chu chatuanin a chho vang a; sakawlh leh a lem chibai bûktute, a hming chhinchhiahna nei apiangte pawh chuan a chhûn a zânin chawlh rêng an nei lo vang,” tiin anni chu a rawn zui a.

¹²Mi thianghlim, Pathian thupêk awihtute leh Isua zuitu rinawmte tân hetah hian chhel a ṭûlzia a lang.

¹³Tin, vân aṭangin awin, “Heti hian ziak rawh: ‘Tûn hnuah chuan mitthi, Lalpaa thite chu an eng a thâwl ang; Thlarauvin, “A ni, an thawh rimnate chu an chawlhsan tawh ang; an thiltihte chuan a rawn zui ve dâwn si a,” a ti e,’ ” a tih ka hria.

¹⁴Tin, ka han en a; tin, ngai teh, chhûm vâr ka hmu a; tin, chhûm chungah chuan mihring fapa ang tak hi, rangkachak lallukhum khuma favah hriam tak kenga ṭhu ka hmu bawk a.

¹⁵Tin, vântirhkoh dang, Pathian biak in aṭangin a lo chhuak a, chhûm chunga ṭhu hnênah chuan aw ring takin, “I favah kha phawrh la, ât rawh; ah a hun tawh si a; khu, lei buh a ngui tawh khu,” a ti a.

¹⁶Tichuan, chhûm chunga ṭhu chuan a favah chu leiah a thlâk a, lei buh chu an ât ta a.

¹⁷Tin, vântirhkoh dang, vâna Pathian biak in aṭangin a lo chhuak leh a, ani pawh chuan favah hriam tak a keng bawk a.

¹⁸Tin, vântirhkoh dang, mei chunga thuneitu chu maichâm aṭangin a lo chhuak leh a; tin, ani chuan aw ring takin, “I favah hriam tak kha phawrh la, leia grêp hrui rah bâwrte khu zuk ât rawh; grêp rahte khu a hmin ṭuah tawh khu,” tiin favah hriam tak kengtu chu a au va.

¹⁹Tichuan, vântirhkoh chuan a favah chu leiah a thlâk a, leia grêp rah chu a ât a, grêp sâwrna khur zau tak, Pathian thinurna grêp sâwrna khurah chuan a theh lût a.

²⁰Tin, khaw pâwn lama grêp sâwrna khurah chuan an rap sâwr a; tichuan, grêp sâwrna khur aṭang chuan thisen a lo chhuak a, fîng sângkhat leh zaruka thui, nghâwng thlenga thûk a ni.