Read Mizo_Old_version JOHANA HNENA ISUA KRISTA THU PUAN CHHUAH 17 Bible Online

JOHANA HNENA ISUA KRISTA THU PUAN CHHUAH 17 - Mizo_Old_version bible

JOHANA HNENA ISUA KRISTA THU PUAN CHHUAH 17

¹Tin, vântirhkoh pasarih, berhbu pasarih kengte zînga pakhat chuan mi bia a, “Hawh teh, tui tam taka ṭhu nawhchizuar ropui tak hremna chu ka entîr ang che;

²leia lalte chuan ani chu an ngai ṭhîn a, leia awmte pawh chu a mi ngaih chînna uain chuan hrai ruihin an awm ṭhîn,” a ti a.

³Chutichuan, ani chuan Thlarauvin thlalêrah mi kalpui a; tin, Pathian sawichhiatna hminga khat, lu sarih leh ki sâwm nei sakawlh sen tak chunga chuang hmeichhia ka hmu a.

⁴Chu hmeichhia chuan puan senduk leh senlâr a sin a, rangkachak leh lung man tam leh tuikeplungin a inchei a, rangkachak no, thil tenawm, a mi ngaih chînna thil bawlhhlawha khat a keng a,

⁵a chalah chuan thurûk, “Babulon Khaw Ropui, Leia Nawhchizuarte leh Thil Tenawmte Nu,” tia hming ziak a awm a.

⁶Tin, chu hmeichhia chu mi thianghlimte thisen leh Isua martarho thisena ruiin ka hmu a. Ka hmuh veleh mak ka ti êm êm mai a.

⁷Tichuan, vântirhkoh chuan ka hnênah, “Eng vângin nge mak i tih? Kha hmeichhia leh a phurtu sakawlh, lu sarih leh ki sâwm nei thurûk chu ka hrilh ang che.

⁸Sakawlh i hmuh kha a awm tawh zet a, a awm leh ta lo va; tin, leilâwt aṭangin a lo chhuak chho vang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan sakawlh chu an hmuh hunah, a awm tawh zet a, a awm leh ta lo va, a lo kal leh dâwn chu mak an la ti ang.

⁹Hetah hian fin thiam a ṭûlzia a lang. Lu sarihte chu hmeichhe ṭhutna tlâng sarihte chu an ni.

¹⁰Lal pasarih pawh an ni a; pangate chu an tlâwm ta a, pakhat chu a la awm a, pakhat chu a lo la awm rih lo va; a lo awm hunah chuan rei lo tê a awm tûr a ni.

¹¹Tin, sakawlh, awm tawh zeta, awm leh ta lova ngei pawh kha a pariatna a ni a, pasarihte zînga mi kha a ni nghe nghe a; boralnaah a la kal ang.

¹²Tin, ki sâwm i hmuhte kha lal sâwm, ram la nei lote an ni a; dârkâr khat chhûng erawh chu sakawlh nên thuneihna an la chang ang.

¹³Chûng chuan thu khat vuain an thiltihtheihna leh thuneihna chu sakawlh an pe ang.

¹⁴Chûng chuan Berâmno chu an do vang a; tin, Berâmno chu hotute Hotu leh lalte Lal a nih avângin anni chu a hneh ang a; tin, a hnêna awm - koh te, thlan te, rinawm te chuan an hneh bawk ang,” a ti a.

¹⁵Tin, amah vêk chuan ka hnênah, “Nawhchizuar ṭhutna tui i hmuhte kha, mi te, mipui te, hnam te, ṭawng te a ni a.

¹⁶Ki sâwm i hmuh leh sakawlh ngei chuan nawhchizuar chu an hua ang a, eng mah nei lo leh saruakin an siam ang a, a sa pawh an ei ang a, meiin an hâl ral ang.

¹⁷Pathian thute chu a thlen hma loh chuan a duh zâwng an tihna tûr leh, thu khat an lo vuakna tûr leh, an ram chu sakawlh hnêna an pêkna tûrin Pathianin an thinlungah a tîr si a.

¹⁸Tin, i hmeichhe hmuh kha khaw ropui, leia lalte chunga rorêltu chu a ni,” a ti a.