Read Mizo_Old_version JOHANA HNENA ISUA KRISTA THU PUAN CHHUAH 20 Bible Online

JOHANA HNENA ISUA KRISTA THU PUAN CHHUAH 20 - Mizo_Old_version bible

JOHANA HNENA ISUA KRISTA THU PUAN CHHUAH 20

¹Tin, vântirhkoh, leilâwt chabi leh khaidiat lian pui kengin, vân ata lo chhuk ka hmu a.

²Tin, dragon, rûlpui tar chu (chu chu Diabola leh Setana a ni) a man a, kum sângkhat atân a phuar a,

³leilâwtah chuan a paih lût a, a khâr khum a, kum sângkhat a vei hma loh chuan hnam tin a bum leh tawh lohna tûrin a châr hnan ta a; chumi hnuah chuan rei lo tê atân chhuah leh rih tûr a ni.

⁴Tin, lalṭhutphahte ka hmu a, a chungah mi an ṭhu a, an hnênah chuan rorêlna an pe a; tin, Isua hriattîrna thu avâng leh Pathian thu avânga lu tante thlarau leh, sakawlh leh a lem chibai bûk lova, an chalah emaw, an kutah emaw chhinchhiahna nei lote thlarau chu ka hmu bawk a; chûngho chu an lo nung a, kum sângkhat Krista nên rorêlin an awm a.

⁵Mitthi dangte erawh chu kum sângkhat a vei hma loh chuan an la nung rih lo va. Chu chu thawhlehna hmasa ber chu a ni.

⁶Thawhlehna hmasa bera telte chu an engthâwlin an thianghlim a ni; chûngho chungah chuan thih hnihna chuan thu rêng a nei lo va, Pathian leh Krista puithiamte an ni ang a, amah nên kum sângkhat rorêlin an awm zâwk ang.

⁷Tin, kum sângkhat a vei hunah chuan, Setana chu a tânna ata chhuahin a awm ang a,

⁸lei kil lia hnam te, Goga leh Magoga chu buma indonaa hruai khâwm tûrin a kal chhuak ang; chûngho tamzia chu tuifinriata ṭiauvut ang mai an ni.

⁹Tin, lei vâng lam dâpin an kal chho va, mi thianghlimte riahhmun leh khaw duhawm tak chu an hual ta a; tin, vân aṭangin mei a lo tla a, anni chu a kâng ral ta a.

¹⁰Tin, anmahni bumtu Diabola chu sakawlh leh zâwlnei der awmna, mei leh kât dîlah chuan an paih ta a; tichuan, chatuanin a chhûn a zâna nghaisakin an awm ang.

¹¹Tin, lalṭhutphah lian pui, vâr tak leh a chunga ṭhu chu ka hmu a, a hma ata chu lei leh vân an tlân bo va, an tân hmun rêng a awm ta lo va.

¹²Tin, mitthite chu a lian a têin lalṭhutphah hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a.

¹³Tuifinriat chuan a chhûnga mitthi awmte chu a chhuahtîr a, Thihna leh Mitthi Khua chuan an chhûnga mitthi awmte chu an chhuahtîr bawk a; tin, mi tin an thiltih ang zêla rêlsakin an awm ta a.

¹⁴Tin, Thihna leh Mitthi Khuate chu meidîlah an paih a. Chu chu thih hnihna chu a ni - meidîl chu.

¹⁵Tu hming pawh Nunna Bua ziak an hmuh loh chuan meidîlah an paih bawk a.