Read Mizo_Old_version JOHANA HNENA ISUA KRISTA THU PUAN CHHUAH 21 Bible Online

JOHANA HNENA ISUA KRISTA THU PUAN CHHUAH 21 - Mizo_Old_version bible

JOHANA HNENA ISUA KRISTA THU PUAN CHHUAH 21

¹Tin, vân thar leh lei thar ka hmu a; vân hmasa leh lei hmasa chu a boral tawh a, tuifinriat pawh a awm tawh lo a ni.

²Tin, khaw thianghlim, Jerusalem thar chu, mo, a pasal ela a inchei anga peih diamin, Pathian hnêna mi vân ata lo chhuk ka hmu bawk a.

³Tin, lalṭhutphah aṭangin aw ring takin, “Ngai teh, Pathian bâwktê chu mihring zîngah a lo awm ta, Ani chu an hnênah a awm ang a, Anni chu a mite an ni ang a, Pathian ngei chu an hnênah a awm ang a, An Pathian a ni bawk ang.

⁴An mit ata mittui zawng zawng a hru fai ang a; Thihna a awm leh thei tawh lo vang a, Lungngaih te, ṭah te, nat te pawh A awm leh tawh hek lo vang; Thil hmasate chu a ral ta,” a tih ka hria.

⁵Tin, lalṭhutphaha ṭhu chuan, “Ngai teh, thil engkim ka siam thar e,” a ti a. Tin, “Ziak rawh, hêng thu hi a rinawmin a dik si a,” a ti a.

⁶Tin, ka hnênah, “A lo thleng ta. Kei Alpha leh Omega, a Bul leh a Tâwp ka ni. Tuihâl apiang hnênah chuan Nunna Tuikhura mi a thlâwnin ka pe ang.

⁷Hnehtu apiang chuan chûng chu an luah ang a, kei an Pathian ka ni ang a, anni chu ka fate an ni ang.

⁸Amaherawhchu, mi dawih te, ringlo te, tenawm te, tualthat te, inngaih chîng te, dawithiam te, milem bia te, dawthei zawng zawngte chan tûr chu mei leh kâta kâng dîlah chuan a awm ang; chu chu thih hnihna chu a ni,” a ti a.

⁹Tin, berhbu pasarih keng, hremna hnuhnûng ber pasarih sin vântirhkoh pasarih zînga pakhat chu a lo kal a; ani chuan, “Hawh teh, mo, Berâmno nupui chu kan entîr ang che,” tiin mi bia a.

¹⁰Tin, ani chuan Thlarauvin tlâng lian pui, sâng takah mi kalpui a, Jerusalem khaw thianghlim chu Pathian ropuina neiin, Pathian hnêna mi vân ata lo chhuk mi entîr a. A ênzia chu lung man tam ber ang, jaspi lung ang mai hi a ni a, krustal lung angin a tle a ni;

¹²kulh ropui leh sâng tak a nei a; kawngkhâr sâwm leh pahnih a nei a, kawngkhâr bulahte chuan vântirhkoh sâwm leh pahnih an awm a; chûng kawngkhârah chuan hming ziak a awm bawk a, chûng chu Israela thlahte hnam sâwm leh hnam hnih hmingte chu a ni;

¹³chhak lampangah kawngkhâr pathum, hmâr lampangah kawngkhâr pathum, chhim lampangah kawngkhâr pathum, thlang lampangah kawngkhâr pathum a awm a.

¹⁴Tin, chu khaw kulh chuan lungphûm sâwm leh pahnih a nei a, chûngah chuan Berâmno tirhkoh sâwm leh pahnihte hming a chuang a.

¹⁵Tin, mi betu chuan khua leh a kawngkhârte leh a kulh chu tehna tûrin rangkachak luang a keng a.

¹⁶Khua chu inbial vêlin a awm a, a dung lam chu a vâng lam chen a ni; khua chu luang chuan a teh a, fing sîngkhat leh sanghnih a ni. A dung lam leh a vâng lam leh a sân lam chu a inang a ni.

¹⁷Tin, a kulh chu a teh leh a, mihring teh dân pângngaiin (chu chu vântirhkoh teh dân pângngai chu a ni) tawng za leh sawmli leh pali a ni.

¹⁸Tin, a kulh chu jaspi lunga siam a ni; khua chu dârthlalang thianghlim ang maia rangkachak thianghlima siam a ni.

¹⁹Chu khaw kulh lungphûmte chu lung man tam chi tinrênga chei mawi a ni. Lungphûm hmasa ber chu jaspi lung a ni a; a pahnihna chu sapphir lung a ni a; a pathumna chu kalkidon lung a ni a; a palina chu smaragdin lung a ni a;

²⁰a pangana chu sardonuk lung a ni a; a parukna chu sardion lung a ni a; a pasarihna chu kruso lung a ni a; a pariatna chu birul lung a ni a; a pakuana chu topazi lung a ni a; a sâwmna chu krusopra lung a ni a; a sâwm leh pakhatna chu huakintho lung a ni a; a sâwm leh pahnihna chu amethusto lung a ni a.

²¹Tin, kawngkhâr sâwm leh pahnih chu tuikeplung sâwm leh pahnih a ni; kawngkhâr zawng zawng chu tuikeplung pakhat ṭheuhva siam a ni; tin, chu khaw kawtlai chu rangkachak thianghlim a ni, dârthlalang en tlang theih ang mai hi.

²²Tin, a chhûngah chuan biak in rêng ka hmu lo va; Lalpa Pathian Engkimtitheia leh Berâmno chu an biak in a ni si a.

²³Tin, chu khua chuan a ên tûrin ni a ngai lo va, thla pawh a ngai hek lo; Pathian ropuina chuan a ên a, an khâwnvâr chu Bêrâmno a ni si a.

²⁴Tin, hnam tin a êngah chuan an awm ang a; leia lalte chuan an ropuina an la lût ang.

²⁵Tin, a kawngkate chu chhûnah an khâr tawp lo vang, chutah chuan zân rêng a awm dâwn si lo va.

²⁶Tin, hnam tin ropuina leh chawimawina an la lût ang a.

²⁷Tin, thil bawlhhlawh rêng a lût hauh lo vang a, thil tenawm tite leh dâwt hmangte pawh an lût hek lo vang; Berâmno Nunna Bua hming an ziakte chauh an lût ang.