Read Mizo_Old_version JOHANA HNENA ISUA KRISTA THU PUAN CHHUAH 22 Bible Online

JOHANA HNENA ISUA KRISTA THU PUAN CHHUAH 22 - Mizo_Old_version bible

JOHANA HNENA ISUA KRISTA THU PUAN CHHUAH 22

¹Tin, ani chuan a khawpui lai taka nunna tui lui, krustal lung anga tle, Pathian leh Berâmno lalṭhutphah aṭanga lo chhuak mi entîr a.

²Tin, lui kam tuakah chuan Nunna Thing, chi hrang sâwm leh pahniha rah, thla kipa rah a awm a; chu thing hnahte chu hnam tin tihdamna tûr a ni.

³Tin, ânchhia rêng rêng a awm leh tawh lo vang a, Pathian leh Berâmno lalṭhutphah chu a awm tawh zâwk ang; tichuan, a bawihte chuan a rawng an bâwl ang a,

⁴a hmêl an hmu ang a, a hming chu an chalah a chuang bawk ang.

⁵Tin, zân a awm leh tawh lo vang a, khâwnvâr êng leh ni êng an ngai lo vang; Lalpa Pathian chuan anmahni a ên dâwn si a; tichuan, chatuanin ro an rêl ang.

⁶Tin, ani chuan ka hnênah, “Hêng thu hi a rinawmin a dik a ni; tichuan, Lalpa, zâwlneite thlarau Pathian chuan, thil lo thleng thuai tûrte chu a bawihte hnêna entîr tûrin a vântirhkoh a tîr a ni.

⁷Tin, ngai teh, ka lo kal thuai dâwn e. He lehkhabu hrilh lâwkna thu pawm apiang an eng a thâwl e,” a ti a.

⁸Tin, kei Johana, hêng thil zawng zawng hmutu leh hretu chu ka ni. Tin, ka hriata ka hmuh chuan, hêng thil mi entîrtu vântirhkoh ke bulah chuan Pathian chibai bûka bûk tûrin ka bawkkhup a.

⁹Tin, ani chuan ka hnênah, “Heti chuan ti suh khai; kei chu nangmah leh i unau zâwlneite leh, he lehkhabu thu pawmtute bawihpui ka ni alâwm; Pathian chibai bûk zâwk rawh,” a ti a.

¹⁰Tin, ani chuan ka hnênah, “He lehkhabu hrilh lâwkna thute hi zêp suh; a hun chu a lo thleng dâwn tawh si a.

¹¹Mi fel lo chu tihfel lohvin awm reng rawh se; mi bawlhhlawh chu tihbawlhhlawhin awm reng rawh se; mi fel chu tihfelin awm reng rawh se; mi thianghlim chu tihthianghlimin awm reng rawh se.

¹²“Ngai teh, ka lo kal thuai dâwn e; mi tin an thiltih ang zêla pêk tûrin ka lâwmman ka hnênah a awm a.

¹³Kei Alpha leh Omega, a Hmasaber leh a Hnuhnûngber, a Bul leh a Tâwp ka ni.

¹⁴Nunna Thing chungah chuan thu an neih theihna tûr leh, kawngkaah chuan khuaa an luh theihna tûra insu faite chu an eng a thâwl e.

¹⁵Pâwnah chuan ui te, dawithiam te, inngaih chîng te, tualthat te, milem bia te, dâwt ngaina leh dâwt hmang apiangte chu an awm a.

¹⁶“Kei Isua hian kohhrante tân hêng thu hi in hnêna hriattîr tûrin ka vântirhkoh ka rawn tîr a ni. Davida bulpui leh a thlah, arsi êng tak, Vârparh chu ka ni,” a ti a.

¹⁷Thlarau leh mo chuan, “Lo kal rawh,” an ti a. A hria apiangin, “Lo kal rawh,” ti rawh se. Tuihâl apiang lo kal rawh se; a duh apiangin nunna tui hi a thlâwnin la rawh se.

¹⁸He lehkhabu hrilh lâwkna thu hria apiang ka hriattîr e: tu pawhin hêng thu hi a belhchhah chuan, he lehkhabua hremna ziakte hi Pathianin a chungah a belhchhah ve ang;

¹⁹tin, tu pawhin he hrilh lâwkna lehkhabu thua mi thu a lâk bo chuan, he lehkhabua ziak Nunna Thing leh Khaw Thianghlima a chan chu Pathianin a la bo ve ang.

²⁰Hêng thu hriattîrtu hian, “A ni, ka lo kal thuai dâwn e,” a ti a. Amen. Lo kal ta che, Lalpa Isu.

²¹Lalpa Isua khawngaihna chu mi thianghlimte hnênah awm rawh se. Amen.