Read Mizo_Old_version JOHANA HNENA ISUA KRISTA THU PUAN CHHUAH 3 Bible Online

JOHANA HNENA ISUA KRISTA THU PUAN CHHUAH 3 - Mizo_Old_version bible

JOHANA HNENA ISUA KRISTA THU PUAN CHHUAH 3

¹“Tin, Sardis khuaa kohhran tirhkoh hnênah chuan heti hian ziak rawh: Pathian Thlarau pasarih leh arsi pasarih neia khân hêng thu hi a sawi a ni: I thiltihte ka hria, thi reng sia nung hming i put hi.

²Invêng la, i thil la neih thi lek lekte chu tinung leh rawh; i thiltihte rêng ka Pathian mit tlung zovin ka hmu si lo.

³Chutichuan, i thu dawn leh ngaihthlâkte kha hre reng la, pawm la, sim rawh. I invên loh zawngin rûkru angin ka lo kal ang a, eng hunah nge ka rawn phâwk dâwn che i hre si lo.

⁴Nimahsela, Sardis khuaah khân an puante tibawlhhlawh lo hming tlêm tê i nei a ni; anni chu puan vâr sinin ka hnênah an lêng ve ṭhîn ang; chutiang ti tlâk an ni si a.

⁵A hnehtu apiang chutiangin puan vârte sintîr an ni ang; tin, Nunna Bu ata an hming chu ka thai bo tawp lo vang a, ka Pa hmaah leh a vântirhkohte hmaah chuan an hming ka ṭan zâwk ang.

⁶Thlarauvin kohhranho hnêna thu a sawi hi beng nei chuan hre rawh se, a ti e, tiin.

⁷“Tin, Philadelphia khuaa kohhran tirhkoh hnênah chuan heti hian ziak rawh: Mi thianghlima, mi dik taka, Davida chabi neia, tu ma khâr loh tûra hawnga, tu ma hawn loh tûra khâra khân hêng thu hi a sawi a ni:

⁸I thiltihte ka hria, chakna tlêm tê chauh i nei a, chuti chung pawhin ka thu i pawm a, ka hming pawh i phat lo va; tu ma khâr theih loh kawngka hawn sa i hmaah ka dah e.

⁹Ngai teh, Setana inkhâwmna in ho zînga mi, Juda tak ni lova, dâwt sawia Juda intite zînga mi chu ka tîr dâwn a ni; ngai teh, i ke bulah chibai ka rawn bûktîr ang a, ka hmangaih che tih ka hriattîr bawk ang.

¹⁰Ka chhelna thu i pawm avâng khân, leia awmte fiah tûra khawvêl zawng zawng chunga fiahna hun lo thleng tûr lakah chuan kei pawhin ka humhim ang che.

¹¹Ka lo kal thuai dâwn e; tu mân i lallukhum chu an lâksak loh nân che, i thil neih sa kha vawng tlat rawh.

¹²A hnehtu apiang chu ka Pathian biak inah chuan banah ka siam ang a, chuta ṭang chuan an chhuak tawh lo vang; tin, anmahniah chuan ka Pathian hming nên, ka Pathian khua, Jerusalem Thar, ka Pathian hnêna mi vân aṭanga lo chhuk tûr hming nên, ka hming thar nên ka ziak ang.

¹³Thlarauvin kohhranho hnêna thu a sawi hi beng nei chuan hre rawh se, a ti e, tiin.

¹⁴“Tin, Laodikei khuaa kohhran tirhkoh hnênah chuan heti hian ziak rawh: Amena - thuhretu rinawm leh dik taka, Pathian thil siam bula khân hêng thu hi a sawi a ni:

¹⁵I thiltihte ka hria, i vawh hek lohva, i lum hek loh hi; i vawh emaw, i lum emaw ka duh a ni.

¹⁶Chutichuan, lum si lova, vâwt si lova, i lum chang chang avângin ka ka ata ka chhâk chhuak dâwn a che.

¹⁷Ka hausa a, sum ka ngah a, eng mah ka tlachham lo ve, i tih avâng leh, nang mi rethei, khawngaihthlâk, pachhia, mitdel, saruak chu i ni tih i inhriat loh avângin;

¹⁸i lo hausak theih nân rangkachak meia tihthianghlim te, puan i sin theih nân leh i saruak zahmawh chu a lan loh nân puan vâr te, i hmuh theih nân i mita hnawihah mit na hlo te ka hnêna mi lei tûrin ka râwn a che.

¹⁹Ka hmangaih apiang ka zilhhauvin ka thunun ṭhîn; chutichuan, ṭhahnemngai la, sim rawh.

²⁰Ngai teh, kawngkhâr bula dingin ka kik hi; tu pawhin ka aw hriaa kawng a hawn chuan, a hnênah ka lût ang a, a hnênah zanriah ka ei ang a, ani pawhin ka hnênah a ei bawk ang.

²¹A hnehtu apiang ka lalṭhutphahah ka hnênah ka ṭhuttîr ang, kei pawhin ka hneha, ka Pa hnênah a lalṭhutphaha ka ṭhu ang khân.

²²Thlarauvin kohhranho hnêna thu a sawi hi beng nei chuan hre rawh se, a ti e, tiin,” a ti a.