Read Mizo_Old_version JOHANA HNENA ISUA KRISTA THU PUAN CHHUAH 4 Bible Online

JOHANA HNENA ISUA KRISTA THU PUAN CHHUAH 4 - Mizo_Old_version bible

JOHANA HNENA ISUA KRISTA THU PUAN CHHUAH 4

¹Chûng thil hnuah chuan ka han en a; tin, ngai teh, vânah kawngkhâr inhawng ka hmu a; tin, aw ka hriat hmasak, tawtawrâwt ri anga mi bia khân, “Hetah lo chho rawh; tichuan, tûn hnua thil lo awm tûrte chu ka entîr ang che,” a ti a.

²Chawplehchilhin Thlarauvin ka lo awm ta nghâl a; tin, ngai teh, vânah lalṭhutphah a lo inhûng a, chu ṭhutphahah chuan mi pakhat a lo ṭhu bawk a.

³Tin, a chunga ṭhua chu jaspi leh sardion lung ang maiin a lang a; tin, lalṭhutphah vêlah chuan chhimbâl, ena smaragdin lung ang a zâm a.

⁴Tin, lalṭhutphah vêlah chuan lalṭhutphah sawmhnih leh pali a awm a; tin, lalṭhutphahahte chuan upa sawmhnih leh pali puan vâr sina ṭhu ka hmu a; rangkachak lallukhumte an khum a.

⁵Tin, lalṭhutphah aṭang chuan kâwlphe te, aw te, khawpui ri te a lo chhuak dur dur a. Tin, lalṭhutphah hmaah chuan meichher pasarih a alh a, chûng chu Pathian Thlarau pasarihte kha an ni a;

⁶tin, lalṭhutphah hmaah chuan dârthlalang tuifinriat ang, krustal lung ang mai a awm a; tin, lalṭhutphah laiah leh lalṭhutphah vêlah chuan Thil nung pali, hma lam leh hnung lam mita khat an awm a.

⁷Tin, Thil nung pakhatna chu sakeibaknei ang a ni a, Thil nung pahnihna chu sebâwngno ang a ni a, Thil nung pathumna chuan mihring hmel ang a pu a, Thil nung palina chu mupui thlâwk lai ang a ni.

⁸Tin, Thil nung pali chu thla paruk ṭheuh nei, an vêl leh an chhûnga mita khat an ni. Tin, “Lalpa Pathian, Engkimtitheia, Awm tawha leh, awm mêka leh, lo la awm tûra chu, A thianghlim e, a thianghlim e, a thianghlim e,” tiin, chhûn leh zân an châwl ngai lo.

⁹Tin, Thil nungte chuan lalṭhutphaha ṭhua, chatuana nung renga chu, an tihropuia an chawimawia, lâwm thu an hrilh apiangin,

¹⁰upa sawmhnih leh palite chu lalṭhutphaha ṭhua hmaah chuan an bawkkhup ang a, chatuana nung renga chu chibai an bûk ang a, “Nang, kan Lalpa leh kan Pathian, Ropuina te, chawimawina te, thiltihtheihna te chu Hmu tlâk i ni e; Nangin engkim i siam a, I duh avânga awm leh siam An ni bawk si a,” tiin, an lallukhumte chu lalṭhutphah hmaah chuan an dah ang.