Read Mizo_Old_version JOHANA HNENA ISUA KRISTA THU PUAN CHHUAH 6 Bible Online

JOHANA HNENA ISUA KRISTA THU PUAN CHHUAH 6 - Mizo_Old_version bible

JOHANA HNENA ISUA KRISTA THU PUAN CHHUAH 6

¹Tin, Berâmno chuan chhinchhiahna pasarih zînga pakhat chu a han phelh lai ka hmu a; tin, Thil nung palite zînga pakhat chuan khawpui ri ang maiin, “Lo kal rawh,” a tih ka hria a.

²Tichuan, ka han en a; tin, ngai teh, sakawr vâr ka hmu a, a chunga chuang chuan thalngul a keng a; tin, a hnênah chuan lallukhum an pe a; tin, hneh chung leh hneh zêl tûrin a chhuak ta a.

³Tin, chhinchhiahna pahnihna chu a han phelh veleh Thil nung pahnihna chuan, “Lo kal rawh,” a tih ka hria a.

⁴Tichuan, sakawr dang, a sen a lo chhuak leh a; tin, a chunga chuang hnênah chuan lei ata inremna lâksak theihna leh mi inthahtîr theihna an pe a; tin, a hnênah khandaih lian pui an pe bawk a.

⁵Tin, chhinchhiahna pathumna chu a han phelh veleh Thil nung pathumna chuan, “Lo kal rawh,” a tih ka hria a. Tichuan, ka han en a, tin, ngai teh, sakawr dum ka hmu a; a chunga chuang chuan bûkna a keng a.

⁶Tin, Thil nung palite lai aṭang chuan aw angreng hian, “Duliin buhpui tehkhâwng khat, duliin barli tehkhâwng thum; hriak leh uain erawh chu tichhe suh,” a tih ka hria.

⁷Tin, chhinchhiahna palina chu a han phelh veleh Thil nung palina aw chuan, “Lo kal rawh,” a tih ka hria.

⁸Tichuan, ka han en a; tin, ngai teh, sakawr dâng ka hmu a; a chunga chuang hming chu Thihnaa a ni; tin, Mitthi Khuaan a rawn zui a. Tin, khandaih te, ṭâm te, hri te, leia sakawlhtea tihlum tûrin chu mite hnênah chuan lei hmun lia ṭhena hmun khat chunga thuneihna an pe a.

⁹Tin, chhinchhiahna pangana chu a han phelh veleh, maichâm hnuaiah chuan, Pathian thu avâng leh an pawm hriattîrna thu avânga thahte thlarau chu ka hmu a;

¹⁰tin, anni chuan aw ring takin, “Aw Lalpa, mi thianghlim leh dik tak, eng chen nge rorêl lovin, leia awmte chungah kan thisen chhuahna phuba chu la lova i awm dâwn le?” tiin an au va.

¹¹Tin, an hnênah chuan puan vâr an pe ṭheuh va; tin, an bawihpuite leh an unaute, anmahni ang bawka thah tûrte chu an thah kim hma loh chuan an la nghâk rih tûr a ni tih an hrilh a.

¹²Tin, chhinchhiahna parukna chu a han phelh lai ka en reng a; tin, lîr nasa takin a lo nghîng ta a; tin, ni chu sahmul saiip puan angin a lo dum a, thla pawh chu a pumin thisen angin a lo awm ta a;

¹³tin, vâna arsite chu theipui kûng thlipuiin a nuaia, a helte a ṭîl ang maiin leiah a tla ta a.

¹⁴Tin, vân chu lehkhabu zial mi ziala a bo angin a bo ta a; tin, tlâng leh thliarkâr tinrêng chu an awmna ata sawnin an awm ta hlawm a.

¹⁵Tin, leia lal te, mi lian te, sipai hotu ber te, mi hausa te, mi chak te, bawih leh bawih lo tinrêngte chu pûkah leh tlânga lungpuiah chuan an biru a;

¹⁶tin, tlângte leh lungpuite hnênah chuan, “Min delh ula, lalṭhutphaha ṭhua hmêl lakah leh Berâmno thinurna lakah min hliah rawh u;

¹⁷a thinurna ni râpthlâk tak chu a lo thlen tâk hi; tichuan, tu nge ding thei ang i le?” an ti a.