Read Mizo_Old_version JOHANA HNENA ISUA KRISTA THU PUAN CHHUAH 7 Bible Online

JOHANA HNENA ISUA KRISTA THU PUAN CHHUAH 7 - Mizo_Old_version bible

JOHANA HNENA ISUA KRISTA THU PUAN CHHUAH 7

¹Chumi hnuah chuan khawmualah leh, tuifinriatah leh, thing rêng rêngah chuan thli rêng a tleh loh nân, lei thli pali chu chelhin lei kil lia ding vântirhkoh pali ka hmu a.

²Tin, vântirhkoh dang, Pathian nung chhinchhiahna kenga ni chhuahnaa chho ka hmu bawk a; tin, ani chuan vântirhkoh pali, khawmual leh tuifinriat tihchhiat theihna pêkate hnênah chuan aw ring takin,

³“Kan Pathian bawihte chu an chala kan chhinchhiah hma loh zawng khawmual leh, tuifinriat leh, thingte chu tichhe rih suh u,” tiin a au va.

⁴Tin, an chhinchhiah zât chu ka lo hria a, Israela thlahte hnam tina mi nuai khat leh sîngli leh sângli an chhinchhiah tawh a ni.

⁵Juda hnama mi sîngkhat leh sânghnih, Reubena hnama mi sîngkhat leh sânghnih, Gada hnama mi sîngkhat leh sânghnih,

⁶Asera hnama mi sîngkhat leh sânghnih, Naphtalia hnama mi sîngkhat leh sânghnih, Manasea hnama mi sîngkhat leh sânghnih,

⁷Simeona hnama mi sîngkhat leh sânghnih, Levia hnama mi sîngkhat leh sânghnih, Isakara hnama mi sîngkhat leh sânghnih,

⁸Zebuluna hnama mi sîngkhat leh sânghnih, Josefa hnama mi sîngkhat leh sânghnih, Benjamina hnama mi sîngkhat leh sânghnih, an chhinchhiah tawh.

⁹Chûng hnuah chuan ka han en a; tin, ngai teh, mipui tam tak, tu ma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zinga mi te puan vâr sina tûmkau kengin, lalṭhutphah hmaah leh Berâmno hmaa ding ka hmu a;

¹⁰tin, chûngte chuan aw ring takin, “Kan Pathian lalṭhutphaha ṭhua hnênah leh, Berâmno hnênah chhandamna,” tiin an au va.

¹¹Tin, vântirhkoh zawng zawng chu lalṭhutphah leh upate leh Thil nung palite vêlah chuan dingin an awm a; lalṭhutphah hmaah chuan bawkkhupin,

¹²“Amen: malsâwmna te, ropuina te, finna te, Lâwm thu sawina te, chawimawina te, Thiltihtheihna te, chakna te, Chatuanin kan Pathian hnênah awm rawh se. Amen,” tiin Pathian chibai an bûk a.

¹³Tin, upa zînga pakhat chuan ka hnênah, “Hêng puan vâr sinte hi tute nge nia, khawi aṭanga lo kal nge an nih?” tiin mi bia a.

¹⁴Tin, kei chuan a hnênah, “Ka pu, nangman i hria alâwm,” ka ti a. Tin, anin ka hnênah, “Hêng hi hrehawm nasa tak ata chhuakhote kha an ni a, an puante Berâmno thisena suin an tivâr ta a.

¹⁵Chuvângin, Pathian ṭhutphah hmaah an awm a ni; tin, a chhûn a zânin a biak inah chuan a rawng an bâwl ṭhîn; tin, lalṭhutphaha ṭhua chuan an chungah a puan in chu a zâr ang.

¹⁶An rilṭâm leh tawh lo vang a, an tuihâl leh tawh hek lo vang; niin a em hek lo vang a, lum rêng rêng pawhin a tihrehawm hek lo vang.

¹⁷Berâmno, lalṭhutphah laia awm chu an vêngtu a ni ang a, nunna tuikhurahte a hruai ang; Pathianin an mit ata mittui zawng zawng a hru fai tawh ang,” a ti a.