Read Mizo_Old_version JOHANA HNENA ISUA KRISTA THU PUAN CHHUAH 9 Bible Online

JOHANA HNENA ISUA KRISTA THU PUAN CHHUAH 9 - Mizo_Old_version bible

JOHANA HNENA ISUA KRISTA THU PUAN CHHUAH 9

¹Tin, vântirhkoh pangana chuan a han hâm a; tichuan, arsi, vân aṭanga leia tla sa ka hmu a; tin, leilâwt khuarkhurum chabi chu a hnênah an pe a.

²Tin, ani chuan leilâwt khuarkhurum chu a hawng a; tichuan, khuarkhurum ata chu meikhu, rawh tuina mei nasa tak khu ang a chhuak chho va; tin, khuarkhuruma meikhu avâng chuan ni leh boruak chu a lo thim ta a.

³Tin, meikhu zîng aṭang chuan leiah khaute a lo chhuak a; tin, leia khawmualkaikuangten thiltihtheihna an nei ang hian, an hnênah thiltihtheihna an pe a.

⁴Tin, an chala Pathian chhinchhiahna nei lo mihringte chauh lo chu, leia hlobet te, thil hring rêng rêng te, thing rêng rêng te pawh tihchhiat loh tûr tih an hrilh a.

⁵Tin, an hnênah chuan mihringte chu tihlum êm lova, thla nga tihrehawm zâwk tûrin thu an pe a; an tihhrehawmzia chu khawmualkaikuangin mi a seha a tihrehawm ang hi a ni.

⁶Chûng niah chuan miten thihna an zawng ang a, an hmu hauh si lo vang; thih an châk ang a, nimahsela, thihna chuan a tlânsan ang.

⁷Tin, khaute pianzia chu sakawr, indona tûra peih sa ang an ni; lallukhum ang mai rangkachak ang an khum a, an hmai pawh mihring hmai ang a ni.

⁸Tin, hmeichhe sam ang hi sam an nei a, an hâte pawh chu sakeibaknei hâ ang a ni.

⁹Tin, thîr âwmphaw ang hi âwmphaw an nei a; tin, an thla zah ri chu indona tawlailîr ri, sakawr tam tak indo tûra tlân dur dur ri ang a ni.

¹⁰Tin, khawmualkaikuang mei ang hi mei an nei a, sehna pawh; tin, an meiah chuan a ni thla nga chhûnga an mihring tihnat theihna chu a awm ni.

¹¹Leilâwt tirhkoh chu an chunga lalberah an nei a, Hebrai ṭawngin a hming chu Abaddona a ni a, Grik ṭawng erawh chuan a hming chu Apolluona (Tiboraltua) a ni.

¹²Chungpikna hmasa ber chu a reh tawh a; ngai teh, tûn hnuah Chungpikna pahnih a la awm leh ang.

¹³Tin, vântirhkoh parukna chuan a han hâm a; tichuan, Pathian hmaa rangkachak maichâm ki aṭangte chuan aw ka hria a,

¹⁴chu aw chuan vântirhkoh parukna, tawtawrâwt keng hnênah chuan, “Euphrates luipuia vântirhkoh pali phuarte kha phelh rawh,” a ti a.

¹⁵Tichuan, chumi dârkâr leh ni leh thla leh kum atân chuan, mihring hmun thuma ṭhena hmun khat tihlum tûra buatsaih tawh vântirhkoh palite chu an phelh ta a.

¹⁶Tin, sipai, sakawr chung chuangho chu an tam lam chu sîng hlîra hmun sînghnih a ni tih an sawi ka hria.

¹⁷Tin, inlârnaah chuan sakawr leh an chunga chuanghote chu hetiangin ka hmu a ni, mei leh huakintho leh kât ang hi âwmphaw an nei a; tin, sakawr lute chu sakeibaknei lu ang hi a ni a, an kâ aṭang chuan mei leh meikhu leh kâtte a chhuak a.

¹⁸Chumi hremna pathum chuan mihring hmun thuma ṭhena hmun khat an tihlum ta a - mei leh meikhu leh kât an kâ aṭanga chhuak khân.

¹⁹Sakawrte thiltihtheihna chu an kâah leh an meiah a ni a awm ni; an meite chu rûl ang a ni si a, lûte an nei bawk a; chu chuan a ni mi an tihnat ṭhin ni.

²⁰Tin, mihring, chûng hremnaa tihhlum bângte chuan ramhuaite leh rangkachak milem te, tangkaraw milem te, dâr milem te, lung milem te, thing milem te, eng mah hmu thei hlei lo, hre thei hlei lo, kal thei hlei lote chu an biak tawh lohna tûrin an kuta thiltihte chu an sim chuang lo;

²¹an tualthahte pawh, an dawi hmante pawh, an inngaihte pawh, an rûkrûkte pawh an sim chuang hek lo.