Read Mizo_Old_version RUTHI 1 Bible Online

RUTHI 1 - Mizo_Old_version bible

RUTHI 1

¹Rorêltute chuan ro an rêl laiin heti hi a ni a, chumi ramah chuan ṭâm a lo tla a. Tin, Bethlehem-juda-a mi pakhat Moab rama awm tûrin amah leh a nupui leh a fapate pahnih nên an kal a.

²Chu mi hming chu Elimeleka a ni a, a nupui hming chu Naomi a ni a, a fapate pahniha hming chu Mahlona leh Kiliona, Bethlehem-juda-a Ephrath mi an ni. Moab ramah chuan an kal a, chutah chuan an awm ta reng a.

³Tin, Elimeleka, Naomi pasal chu a thi a, amah leh a fapate pahnih chauh an ni ta a.

⁴Tin, Moab ram hmeichhia nupuiah an nei a: a pakhata hming chu Orpi a ni a, a pakhata hming chu Ruthi a ni; chutah chuan kum sâwm emaw lai an awm a.

⁵Tin, Mahlona leh Kiliona chu an thi ta ve ve a; tichuan, chu hmeichhia chu a fate pahnih leh a pasal chuan an thihsan ta a.

⁶Chutichuan, a mote nên chuan Moab ram ata chu haw leh tûrin an tho va, LALPAN ei tûr pein a mite chu a kan dân te Moab ram aṭanga a lo hriat avângin.

⁷Tichuan, a awmna ata chu a mote pahnih nên chuan an chhuak a; Judai rama haw leh tûrin an kal ta a.

⁸Tin, Naomi chuan a mote pahnih hnênah chuan, “In nu in lam ve vea haw leh tûrin kal rawh u khai; mitthi chung leh ka chunga in tih ang hian LALPA chuan in chungah ngilnei takin ti ve rawh se.

⁹LALPA chuan in pahnihin pasalte ina khawsakna in tawn theih nân khawngaih che u rawh se,” a ti a. Tichuan, a fâwp a; tin, aw chhuah meuhvin an ṭap ta chiam mai a.

¹⁰Tin, a hnênah, “Kan kal lo vang, i chite hnêna i hâwnnaah chuan kan tel ve zâwk ang,” an ti a.

¹¹Tin, Naomi chuan, “Ka fanute u, haw leh zâwk rawh u; engah nge ka hnênah chuan in kal ve tehlul ang le? In pasal tûr fapa ka pai leh thei dâwn em ni?

¹²Ka fanute u, haw leh ula, kal rawh u khai; pasal han nei tûrin ka upa lutuk tawh si a. Tin, ka bei a la sei reng e ti mah ila, zâninah mai pawh hian pasal neiin fapate pawh nei mah ila,

¹³an puitlin thlengin in awm dâwn em ni ang? Pasal lovin in awm reng dâwn em ni ang? Ni kawng lo ve a, ka fanute u, nangmahni avâng hian ka lungngaihna a zualkai zâwk a ni, LALPA kut chu ka chungah a tla ta a nih hi,” a ti a.

¹⁴Tin, an aw chhuahin an ṭap leh ta chiam mai a; tin, Orpi chuan a pi chu a fâwp a, Ruthi erawh chuan a vuan tlat a.

¹⁵Tin, ani chuan, “Ngai teh, i mopuinu chu a chite hnên leh a pathian hnên lamah chuan a kîr leh ta a; nang pawh i mopuinu ûmin haw ve tawh aw,” a ti a.

¹⁶Tin, Ruthi chuan, “Nangmah ṭhen tûr leh nangmah zui lova haw leh tûr chuan mi thlêm lo hrâm hrâm rawh; i kalna apiangah ka kal ang a; i riahna apiangah ka riak ang a; i chite chu ka chite an ni ang a, i Pathian chu ka Pathian a ni ang.

¹⁷I thihna apiangah chuan ka thi ang a, chutah chuan mi phûm ve mai tûr a ni. Nang leh kei hi thihna chauh lo chuan thil dangina min ṭhen dâwn chuan LALPAN a tih tihin mi ti mai sela, chu aia nasa pawhin,” a ti a.

¹⁸Chutichuan, a hnêna kal a tum tlat tih a lo hriat chuan a ngawihsan ta a.

¹⁹Tichuan, Bethlehem thlengin an kal dûn ta a. Tin, heti hi a ni a, Bethlehem an thlen chuan a khuain an phu ta mur mur mai a, hmeichhiate chuan, “Hei, Naomi kha a ni maw?” an ti a.

²⁰Ani chuan an hnênah, “Naomi mi ti suh u, Marai mi ti zâwk rawh u. Engkimtitheia chuan lungchhiatthlâk takin mi ti ta si a.

²¹Muk takin ka chhuak a, LALPA chuan kutbêngin mi hruai hâwng leh a ni. LALPA chuan ka chungah a lungnih lohna a tilang a, Engkimtitheia chuan mi tihhrehawm te hre reng siin, engati nge Naomi min la tih cheu ni le?” a ti a.

²²Chutichuan, Naomi chu a lo kîr a, a monu Moab mi Ruthi nên Moab ram aṭang chuan an lo kîr a ni. Barli seng ṭan tirh laiin Bethlehem chu an thleng a ni.