Read Mizo_Old_version RUTHI 2 Bible Online

RUTHI 2 - Mizo_Old_version bible

RUTHI 2

¹Tin, Naomi chuan a pasala laichîn, Elimeleka thlah, mi neinung tak laichîn a nei a; a hming chu Boaza a ni.

²Tin, Moab mi Ruthi chuan Naomi hnênah, “Lo lamah ka kal ang a, mi lo khawngaihtu apiang buhṭo ka va zawng ang e aw?” a ti a. Tin, a hnênah, “Kal ta che, ka fanu,” a ti a.

³Tichuan, a kal ta a, buh sengtute seng hmaih chu a va zawng ta a. Elimeleka thlah Boaza lovah ngei chuan a va kal fu hlauh mai a.

⁴Tichuan, ngai teh, Bethlehem aṭangin Boaza chu a va kal a, buh sengtute hnênah chuan, “In hnênah LALPA awm rawh se,” a ti a. Tin, anni chuan, “LALPAN malsâwm che rawh se,” tiin an chhâng a.

⁵Chutichuan, Boaza chuan a chhiahhlawh, buh sengtute chunga hotu hnênah chuan. “Hei khawi lam nula nge ni le?” a ti a.

⁶Tin, a buh sengtute chunga hotu a chhiahhlawh chuan, “Moab nula, Moab ram ata Naomi hnêna lo kal ve a ni.

⁷Tin, ani chuan, ‘Min khawngaih la, in buhṭo ka zawng ang a, buh sengtuten an buhphal an khâwm zawhin ka zawng zêl ang e,’ a ti a; tichuan, a lo kal a, ina rei lo tê a han awm tih loh chu zîng ata a la awm ta reng a ni,” tiin a chhâng a.

⁸Chutichuan, Boaza chuan Ruthi hnênah chuan, “Ka fanu, ngai teh aw, lo dangah chuan buhṭo zawngin kal suh la, heta ta hi kal sawn suh, ka chhiahhlawh nulate hnênah hian awm reng rawh.

⁹An buh seng hi en reng la, an hnu chhui zêl rawh; tlangvâlte chu eng mah tih loh tûr chein thu ka pe tawh diam e; tin, i tui a hâl apiangin tuibêla tlangvalte tui chawi sa va in ṭhîn ang che,” a ti a.

¹⁰Chutichuan, a kûn a, lei siin a bawkkhup a, a hnênah, “Hnam dang ka ni si a, nangin hetianga min hriat duha min lo khawngaih hi engtizia nge ni?” a ti a.

¹¹Tin, Boaza chuan a chhâng a, a hnênah, “I pasal thih achin i pi chunga i thiltih dân zawng zawngte miin mi hrilh vek a; tin, i nu leh i pa leh i pianna ram kalsana tûn hma lama i mi hriat ngai lohte hnêna i lo kal dânte pawh hi.

¹²LALPA chuan i thiltih chu rûl sela, LALPA, Israel-te Pathian, inhumhim nâna a thla hnuai i rawn chuha chuan i ṭhat man pe ṭeuh che rawh se,” a ti a.

¹³Tin, ani chuan, “Ka pu, mi khawngaih ang che; nangin mi thlamuan a, i chhiahhlawh nulate zînga mi ni mah suh ila, i chhiahhlawhnu hi ṭha takin mi be ta si a,” a ti a.

¹⁴Tin, chaw ei hun chuan Boazan a hnênah, “Lo haw teh khai, chhangte hi han ei ve la, chhang themte chu uain thûrah han chiah ve rawh,” a ti a. Chutichuan, buh sengtute kiangah chuan a ṭhu a; tin, chhangpêr chu an pe a, a ei a, a kham hnu pawhin a la ei bâng ta cheu va.

¹⁵Tin, buhṭo zawng tûra a thawh leh chuan, Boaza chuan a tlangvâlte hnênah, “Buhphal zînga mite pawh hi chhar zêl sela, hau suh ang che u.

¹⁶Tin, a têla mite pawh, pawh chhuahsak ula, hnutchhiah zêl ula, chhar sela, hau suh u,” tiin thu a pe a.

¹⁷Chutichuan, lova buhṭo chu tlai lam thlengin a zawng a; tin, a zawn sa chu a vua a, barli epha khat emaw lai a ni.

¹⁸Tin, a phur a, khuaah chuan a haw ta a, a pi chuan a buhṭo zawn chu a lo hmu a. Tin, ani chuan a kham hnua a ei bâng chu a phawrh a, a pe a.

¹⁹Tin, a pi chuan a hnênah, “Vawiinah hian khawi lama buhṭo nge i zawn? A lo hre duhtu che chu malsâwmin awm rawh se,” a ti a. Tin, ani chuan, tu hnênah nge a va thawh tih a pi chu a hrilh a, “Vawiina ka va thawhna pa chu a hming Boaza a ni,” a ti a.

²⁰Tin, Naomi chuan a monu hnênah chuan, “LALPA, mi nung leh mitthi chunga a khawngaihna bâng chuang ngai lova chuan amah chu malsâwm rawh se,” a ti a. Tin, Naomi chuan a hnênah, “Chu mi chu kan lamhnai, kan laichîn bul a ni asin,” a ti a.

²¹Tin, Moab mi Ruthi chuan, “A nih tak chu, ka hnênah pawh, ‘Ka buh hi an seng zawh vek hma loh chu ka tlangvâlho hnênah hian tel reng ang che,’ mi ti nghe nghe asin,” a ti a.

²²Tin, Naomi chuan a monu Ruthi hnênah chuan, “Ka fanu, lo danga an hmuh hauh lohna tûr chein a chhiahhlawh nulaho zîngah hlîr chuan kal la a ṭha ang,” a ti a.

²³Chutichuan, barli leh huit seng zawh thlengin Boaza chhiahhlawh nulaho zîngah hlîr chuan buhṭo zawngin a kal a; tin, a pi hnênah chuan a awm a.