Read Mizo_Old_version RUTHI 4 Bible Online

RUTHI 4 - Mizo_Old_version bible

RUTHI 4

¹Tichuan, Boaza chu kulh kawngkaah chuan a han chho va, chutah chuan a ṭhu a; tin, ngai teh, an laichîn bul a chungchâng thu Boazan a sawi kha a lo kal a. Chu mi hnênah chuan, “E! Nang kha, lo pêng la, ṭhu teh khai,” a ti a. Tin, ani chu a lo pêng a, a ṭhu ta a.

²Tin, chumi khuaa upaho zînga mi sâwm a hruai a, an hnênah, “Hetah hian ṭhu teh u khai,” a ti a, an ṭhu ta a.

³Tin, an laichîn bula hnênah chuan, “Moab ram aṭanga lo kîr Naomi chuan kan unaupa Elimeleka ram kha a zuar a;

⁴tichuan, i hnêna, ‘Hênga ṭhute mit hmuhah leh kan upateho mit hmuhah hian lei rawh. I tlan duh chuan tlan la; amaherawhchu, i tlan duh loh chuan ka hriat theih nân min hrilh ang che; nang lo chu tu mah a han tlantu âwm dang an awm si lo va; tin, kei hi i dawtah chuan ka ni a,’ tia hriattîr che ṭûlin ka hria,” a ti a. Tin, ani chuan, “Ka tlan ang e,” a ti a.

⁵Tin, Boaza chuan, “Naomi hnêna mi, chumi ram i lei ni chuan mitthi nupui, Moab hmeichhia Ruthi lakah mitthi hming dai lova a ro luahtu tûr an awm zêl theih nân i lei bawk tûr a ni,” a ti a.

⁶An laichîn bul pa chuan, “Keima tân chuan ka tlan thei lo; chuti lo zawng, keima ro luah lam thu ka tikhawlo dah ang e, tlan phâk ka nihna ai chu nangman chang mai rawh; kei zawngin ka tlan thei lo a nih hi,” a ti a.

⁷Hmânlaia Israel-te zîngah thil engkim an tihngheh nâna an intlan dân leh an inthleng dân chu hetiang hi a ni: pheikhawk an hlîp a, an vêngte an pe a, chu chu Israel-te zînga an tihngheh dân a ni.

⁸Chutichuan, an laichîn bul chuan Boaza hnênah, “Nangman i tân lei zâwk rawh,” a ti a. Tin, a pheikhawk a hlîp a.

⁹Tin, Boaza chuan upate leh mipui zawng zawngte hnênah chuan, “Vawiinah hian nangniho hi Elimeleka thil neih zawng zawng leh Kiliona leh Mahlona thil neih zawng zawng, Naomi hnêna mi ka lei tih hretute in ni a.

¹⁰Tin, chu chauh chu ni lovin, mitthi chu a hming dai lova ro luahtu siamsak tûr leh, mitthi chu a unaute zîngah leh a awmna hmun kulh kawngkaa a hming a bo loh nân Moab hmeichhia Ruthi, Mahlona nupui chu ka nupui atân ka lei a; chu chu vawiinah hian nangniho hi a hretute in ni e,” a ti a.

¹¹Tin, kulh kawngkaa mipui zawng zawng leh upate chuan, “Hretute kan ni e. I ina hmeichhe lo lûta chu Rakili leh Leaii, Israel chhûngkaw dintu pahnihte ang khân LALPA chuan siam rawh se; tin, Ephratha-ah chuan chhuanawm takin ti la, Bethlehem-ah chuan hmingthang takin lo awm ang che.

¹²Tin, LALPAN he nula laka thlah a la siamsak tûr che avâng hian, i chhûngkua chu Tamarin Juda a hrinsak Pereza chhûngkua ang lo ni rawh se,” an ti a.

¹³Chutichuan, Boaza chuan Ruthi chu a hruai a, a nupui a lo ni ta a; tin, a pâwl a, LALPA chuan nau a paitîr a; tin, fapa a hring a.

¹⁴Tin, hmeichhiate chuan Naomi hnênah chuan, “Vawiin ngeia laichîn hnai chham lova awmtîrtu che LALPA chu fakin awm sela; Israel-te zîngah hian a hming lo thang rawh se.

¹⁵Tin, ani chu i nunna tungdingtu leh i tar lam châwmtu a lo ni ang a; i monu, nangmah hmangaihtu, fapa pasarih aia i tâna ṭha chuan amah chu a hring ta si a,” an ti a.

¹⁶Tin, Naomi chuan nau chu a la a, a pawm a, a awm ta a.

¹⁷Tin, a vêngte hmeichhia chuan a hming an saksak a, “Naomi tân fapa a lo piang,” tiin a hmingah Obeda an sa a. Ani chu Davida pa Jesaia pa a ni a.

¹⁸Hêng hi Pereza thlahte chu an ni: Pereza chuan Hezrona a hring a;

¹⁹Hezrona chuan Rama a hring a, Rama chuan Aminadaba a hring a;

²⁰Aminadaba chuan Nasona a hring a, Nasona chuan Salmona a hring a;

²¹Salmona chuan Boaza a hring a; Boaza chuan Obeda a hring a;

²²Obeda chuan Jesaia a hring a; tin, Jesaia chuan Davida a hring a ni.