Read Mizo_Old_version LEHKHABU PAKHATNA SAMUELA 11 Bible Online

LEHKHABU PAKHATNA SAMUELA 11 - Mizo_Old_version bible

LEHKHABU PAKHATNA SAMUELA 11

¹Chutichuan, Amon mi Nahasa chu a lo thawk a, Jabes-gilead beih tumin a han ep a; tin, Jabes mi zawng zawng chuan Nahasa hnênah chuan, “Kan hnênah thu thlung la; tichuan, i rawng kan bâwl ang e,” an ti a.

²Tin, Amon mi Nahasa chuan an hnênah, “Hetiang hian a ni in hnênah thu ka thlun ang ni: in mit ding lam zawng zawng kher chhuah vek tûr a ni ang a; chu chu Israel mi zawng zawng tân hmingchhiatna a ni ang,” a ti a.

³Tin, Jabes khuaa upate chuan a hnênah, “Israel ram zawng zawngah mi kan han tirh rih theih nân ni sarih min ngaichâng rih rawh; chuta mi chhandam tûr tu mah an awm loh chuan i hnênah kan lo chhuak mai ang e,” an ti a.

⁴Chutichuan, an mi tirhte chuan Saula awmna khua Gibea chu an lo thleng a, mipuite beng hriatah chuan chûng thu chu an sawi a; tin, mipuite chuan an aw an chhuah a, an ṭap a.

⁵Tin, ngai teh, lo aṭangin Saula chu sebâwng khalhin a lo haw a; tin, Saula chuan, “Eng an ti nge ni mipuite chu an ṭah?” a ti a. Tin, Jabes khuaa mite thusawi chu an hrilh a.

⁶Tin, chûng thu chu a hriat veleh chuan Saula chungah Pathian thlarau a lo thleng ta chiam mai a, nasa takin a thin chu a ur ta thut a.

⁷Chutichuan, bâwng tuak khat a talh a, a sa chu a chan sawm vek a, Israel ram zawng zawngah chuan a semtîr a, “Tu pawh Saula leh Samuela rawn zui duh lo apiang an sebâwng chu hetianga tih ve hi a ni ang,” tiin. Chutichuan, mipuite chuan LALPA chu an hlau ta a, thukhat vuain an lo thawk chhuak ta a.

⁸Tin, Bezek hmunah chuan a chhiar a; Israel mite chu nuai thum an ni a, Juda mite chu sîngthum an ni a.

⁹Tin, an mi rawn tirhte hnênah chuan, “Jabes-gilead mite hnênah chuan, ‘Naktûk ni lum vânglai tak hmain chhanchhuah in ni ang,’ va ti ang che u,” an ti a. Tin, an mi tirhte chu an va kal a, Jabes mite chu an hrilh a; tichuan, an lâwm ta hle mai a.

¹⁰Chutichuan, Jabes mite chuan, “Naktûkah hian in hnênah kan lo chhuak ang a, kan chungah in duh duhin ti mai ang che u,” an ti a.

¹¹Tin, heti hi a lo ni a, a tûkah chuan Saula chuan mipuite chu pâwl thumah a siam a; tin, zîng vên hun lai takin an riahhmunah chuan an lût a, Amon mite chu chhûn ni sat vânglai tak thlengin an that a; tin, heti hi a ni a, an thah bângte chu an darh vek a, pahniha awm dûn rêng rêng pawh an awm lo va.

¹²Tin, mipuite chuan Samuela hnênah, “Tute nge ni, ‘Saulan kan chungah ro a rêl tehlul ang maw?’ ti kha? Chûng mite chu rawn hruai la, kan lo tihlum ang e,” an ti a.

¹³Tin, Saula chuan, “Vawiin kher hi chuan tu mah tihhlum tûr a ni lo ve; vawiinah hian LALPA chuan Israel-te zîngah chhandamna a rawn thawk chhuak ta si a,” a ti a.

¹⁴Chutichuan, mipuite hnênah chuan, “Hawh u, Gilgal-ah i kal ang u khai, chutah chuan ram chu i din thar leh ang u,” a ti a.

¹⁵Chutichuan, mipui zawng zawng chu Gilgal-ah chuan an kal ta a, Saula chu Gilgal-ah chuan LALPA hmaah lalah an siam ta a. Chutah chuan LALPA hmaah remna inthawinate an hlân a; tichuan, chutah chuan Saula leh Israel mi zawng zawngte chu an lâwm ta êm êm mai a.