Read Mizo_Old_version LEHKHABU PAKHATNA SAMUELA 12 Bible Online

LEHKHABU PAKHATNA SAMUELA 12 - Mizo_Old_version bible

LEHKHABU PAKHATNA SAMUELA 12

¹Tin, Samuela chuan Israel mite zawng zawng hnênah chuan, “Ngai teh u, ka hnêna in thusawi zawng zawng chu ka pawm a, lal tûr chu ka siamsak ta che u a.

²Tûnah hian ngai teh u, lal chuan a lo kaihruai ta che u a; kei chu ka lo tarin ka lu te pawh a lo ṭuak ta a, ngai teh u, ka fapate chu in hnênah an awm a. Ka tleirâwl lai aṭangin tûn thlengin ka kaihruai che u a.

³Heta hi ka awm a. LALPA hma leh a hriak thiha hmaah hian mi sêl teh u le: tu bâwngpa nge ka chhuhsak ngai? Tu sabengtung nge ka chhuhsak ngai? Tu nge ka bum tawh ngai? Tu nge ka tihduhdah ngai? Ka mit tidel tûrin tu lakah nge thamna ka lâk ngai? Ka rûl leh vek ang che u,” a ti a.

⁴Tin, anni chuan, “Min bum ngai lo va, min tiduhdah ngai hek lo, tu ma kut aṭangin lâk âwm loh i la ngai hek lo,” an ti a.

⁵Tin, ani chuan an hnênah, “Ka kutah hian eng mah âwm lo in hmu lo tih vawiinah hian LALPA chu in lakah hretu a ni a, a hriak thiha pawh chu hretu a ni,” a ti a. Tin, anni chuan, “Amah chu hretu a ni,” an ti a.

⁶Tin, Samuela chuan mipui hnênah chuan, “Mosia leh Arona ruattu leh Aigupta ram ata in pute hruai chhuaktu LALPA chu a ni asin.

⁷Chutichuan, ding ṭhap ula, LALPA hmaah hian LALPAN in chungah leh in pute chunga thil a lo tihfel ṭhin dân ka han chhûtpui teh ang che u.

⁸Aigupta rama Jakoba a luh hnu khân, in pute chuan LALPA an au va; tichuan, LALPA chuan Mosia leh Arona a tîr a, anni chuan in pute chu Aigupta ram aṭangin an hruai chhuak a, he hmunah hian an awmtîr ta a.

⁹Nimahsela, LALPA an Pathian chu an theihnghilh a, ani chuan Hazor sipai hotu Sisera kutah leh Philistia mite kutah leh Moab lal kutah a hralh a; tin, anni chuan an do va.

¹⁰Tin, LALPA chu an au va, ‘LALPA chu kan hawisana, Baala-te leh Astorethi-te rawng kan bâwl avângin kan lo sual ta a ni; nimahsela, kan hmêlmate kut ata hi min chhanchhuak tawh la; tichuan, i rawng kan bâwl ang e,’ an ti a.

¹¹Tin, LALPA chuan Jerubaala te, Bedana te, Jephtha te, Samuela te a tîr a, in hmêlma lehlam lehlam mite kut ata a chhanchhuak che u a, him takin in awm a.

¹²Tin, Amona thlahte lal Nahasa chu nangmahni do tûrin a lo kal tih in hriat veleh ka hnênah, ‘A ni lo ve, lalin ro min rêl rawh se,’ in ti a; LALPA Pathian chu in lal a ni reng si a.

¹³“Chutichuan, in lal, in thlan leh dîl chu en teh u; en teh u, LALPA chuan lal a siamsak ta che u a nih hi.

¹⁴LALPA chu in ṭiha, a rawng in bâwla, a aw in ngaihthlâka, LALPA thupêk in helsan lohva, nangmahni leh in chunga rorêltu lal nên LALPA in Pathian zuitu in nih chuan a ṭha ang a;

¹⁵amaherawhchu, LALPA aw chu ngaithla lova, LALPA thupêk in helsan chuan, in puten LALPA kut an tuar ang bawkin nangni pawhin in tuar ang.

¹⁶Chutichuan, ding ṭhap ula, LALPAN in mit hmuha thil ropui tak a tih tûr hi lo en rawh u.

¹⁷Vawiin hian buh an seng a ni lâwm ni? Khawpui rîktîr tûr leh ruah sûrtîr tûrin LALPA chu ka au vang a; tichuan, lal in dil thu-ah hian LALPA mit hmuha thil in tihsual hi a nasatzia in hriain in hmu ang,” a ti a.

¹⁸Chutichuan, Samuela chuan LALPA chu a au va, LALPA chuan chumi ni chuan khawpui a rîktîr a, ruah a sûrtîr a; tichuan, mipui chuan LALPA leh Samuela chu an hlau ta êm êm a.

¹⁹Tin, mipui zawng zawng chuan Samuela hnênah chuan, “Kan thih loh nân LALPA i Pathian hnênah chuan i chhiahhlawhte hi min ṭawngṭaisak rawh; he thil ṭha lo tak, lal kan lo dîl hi, kan sual zawng zawng belhchhahtu a nih tâk hi,” an ti a.

²⁰Tin, Samuela chuan mipuite hnênah chuan, “Hlau suh u; he thil ṭha lo tak hi tih zawng in ti ngei tak a; mahse, LALPA in zui chu pênsan chuang lo ula, in thinlung zawng zawngin LALPA rawng chu bâwl zâwk rawh u;

²¹eng maha hnemhnâng lo tûr leh chhanchhuak thei lo che u zuiin pênsan suh u, engmahlo an ni si a.

²²A hming ropui tak avâng hian LALPA chuan a mite chu a hawisan dâwn si lo va; a mite atâna siam che u chu LALPA lâwm zâwng tak a ni si a.

²³Chu chang pawh a ni lo va, in tâna ṭawngṭai bâna, LALPA chunga sual chu keia tân chuan a hnai lo tawp mai a ni; kawng ṭha leh kawng dik ka kawhhmuh zêl zâwk ang che u.

²⁴LALPA chu ṭih phawt mai ula, in thinlung zawng zawngin tihtakzetin a rawng bâwl ula; in tân thil a tih ropuizia hi ngaihtuah rawh u khai.

²⁵Amaherawhchu, sual taka thil in la tih cheu chuan in boral ang, nangmahni leh in lal nên,” a ti a.