Read Mizo_Old_version LEHKHABU PAKHATNA SAMUELA 13 Bible Online

LEHKHABU PAKHATNA SAMUELA 13 - Mizo_Old_version bible

LEHKHABU PAKHATNA SAMUELA 13

¹Saula chu kum sawmthum mi a nihin a lal ṭan a; tin, Israel-hote chungah kum ... hnih [1] a lal a.

²Tin, Saula chuan Israel-ho zînga mi sângthum a thlang a: sânghnih chu Mikmas-ah leh Bethel tlângah Saula hnênah an awm a; tin, sângkhat chu Benjamin rama Gibea-ah Jonathana hnênah an awm a; tin, a dang zawng zawng chu anmahni puan inah a hawtîr vek a.

³Tin, Jonathana chuan Gibea-a Philistia râlvêngtu sipaiho a bei a; chu chu Philistia mite chuan an lo hria a. Tichuan, Saula chuan, “Hebrai mite khân lo hre rawh se,” tiin an ram zawng zawngah chuan tawtawrâwt a hamtîr a.

⁴Tin, Israel-ho zawng zawngte chuan, Saula chuan Philistia râlvêngtu sipaihote a bei tih leh, Israel-hote pawhin Philistia mite huat an phur a ni tih thute an lo hre ta a. Chutichuan, mipuite chu Saula hnênah Gilgal-ah an pung khâwm ta chiam mai a.

⁵Tin, Philistia mite chu Israel-ho bei tûr chuan an inpun khâwm ta chiam a; tawlailîr sîngthum, sakawr chung chuang mi sângruk, mihring tuifinriat kama ṭiau zât zeta tam an ni; tin, an chho va, Beth-aven chhak lampangah Mikmas-ah chuan ṭanhmun an khuar a.

⁶Tin, Israel mite chuan hnawhchêpin an awm tih an inhriat chuan (mite chu an mangang ta hle mai a) mite chu pûkah te, hnim hnawkah te, lungpui phênah te, kulhah te, khuarkhurumah te an biru a.

⁷Hebrai mi ṭhenkhatte chu Jordan râlah Gad leh Gilead ramahte an tlân a; Saula erawh chu Gilgal-ah a la awm reng a, mipuite chuan khûr zawih zawih chungin an zui a.

⁸Samuelan ni a ruat angin ni sarih a awm a; nimahsela, Samuela chu Gilgal-ah chuan a la kal ta lo va; tichuan, mipuiin an tlân darhsan ta a.

⁹Tin, Saula chuan, “Hâlral thilhlan tûr leh remna thilhlan tûrte chu hetah ka hnênah han la rawh u,” a ti a. Chutichuan, hâlral thilhlan chu a hlân a.

¹⁰Tin, heti hi a ni a, hâlral thilhlan a hlân zo chauh va, Samuela chu a lo thleng ta a; tin, Saula chu chibai bûk tûrin amah hmuakin a lo kal a.

¹¹Tin, Samuela chuan, “Eng nge ni i lo tih chu le?” a ti a. Tin, Saula chuan, “Mipuite chuan mi kal bosan tawh a; tin, nang lah chu ni ruat niah chuan i lo thleng ta lo va; tin, Philistia mite lah chu Mikmas-ah an pung khâwm luih tawh tih ka hre si a.

¹²Chu vâng chuan, ‘Philistia mite chuan Gilgal-ah min rawn bei dâwn ṭêp si a; tin, LALPA khawngaihna ka la dîl si lo,’ ka ti a. Chu vâng chuan, hâlral thilhlân chu hlân lo thei ka ni lo a ni,” a ti a.

¹³Tin, Samuela chuan Saula hnênah chuan, “I thiltih dân hi a âtthlâk hle mai. LALPA i Pathian thupêk, thu a pêk che hi i zâwm lo a ni. LALPA chuan Israel-te chungah hian i lalna hi kumkhuaa tihngheh tum zawng a ni a le.

¹⁴Nimahsela, i lalna chu a kin tawh ang; LALPA thupêk che i zawm loh avângin. LALPA chuan ama thinlung ang pu mi a zawng a, a mite chunga hotu ni tûrin LALPAN a ruat tawh a ni,” a ti a.

¹⁵Tin, Samuela chu a tho va, Gilgal ata chu Benjamin rama Gibea khuaah chuan a han kal ta a. Tin, Saula chuan a hnêna mi awmte chu a chhiar a, zaruk lai an ni a.

¹⁶Tin, Saula leh a fapa Jonathana leh an hnêna mi awmte chu Benjamin rama Geba khuaah chuan an awm a; nimahsela, Philistia mite chuan Mikmas-ah chuan ṭanhmun an khuar a.

¹⁷Tin, lamthamhote chu Philistia mite ṭanhmun aṭangin pâwl thumin an lo chhuak a. Pâwl khatte chuan Shual rama Ophra lam pan kawng chu an zawh a,

¹⁸pâwl khat dang chuan Beth-horon lam pan kawng an zawh a, pâwl khat chuan thlalêr dep Zeboim ruam lam hawi ramri kawng chu an zawh a.

¹⁹Israel-ho ram pum puiah chuan thîrdeng rêng rêng an awm lo va; Philistia mite chuan, “Hebrai mite hian khandaihte emaw, feite emaw an siam dah reu reu ang e,” an ti a ni.

²⁰Nimahsela, Israel mi zawng zawngte chu bâwngtuthlawh te, leilehna thîr hriam te, thîrkut te, hreipui te, tiang hmâwra zum te a bil chuan an leilehna hmâwr zum te, an leilehna thîr hriam te, an hreipui te, an bâwngtuthlawhte tah hriamtîr tûrin Philistia-hote hnênah an zuk chhuk ṭhîn a ni.

²²Chutichuan, an indo ni chuan Saula leh Jonathana hnêna mi awmte chu khandaih emaw, fei emaw nei rêng rêng an awm lo va; Saula leh a fapa Jonathana erawh chuan an nei a.

²³Tin, Philistia râlvêngtu sipaiho chu Mikmas kâwnah an kal ta a.