Read Mizo_Old_version LEHKHABU PAKHATNA SAMUELA 14 Bible Online

LEHKHABU PAKHATNA SAMUELA 14 - Mizo_Old_version bible

LEHKHABU PAKHATNA SAMUELA 14

¹Tin, heti hi a ni a, ni khat chu Saula fapa Jonathana chuan a râlthuam kengtu tlangvâl hnênah chuan, “Hawh teh, lehlam râl Philistia mi râlvêngtu sipaiho awmnaah sâwn i va kal teh ang,” a ti a. Nimahsela, a pa chu a hrilh lo va.

²Tin, Saula chu Gibea ram hmâwr lam daiha Migron-a pawmgranet theikûng hnuaiah a awm a; tin, a hnêna mi awmte chu zaruk emaw lai an ni a.

³Tin, Silo khuaa LALPA puithiam Elia fapa Phinehasa fapa Ikaboda unaupa, Ahituba fapa Ahija chu puithiam kawr hain a awm ve a. Tin, Jonathana chu a kal tih mipuite chuan an hre lo va.

⁴Tin, Jonathanan Philistia mi râlvêngtu sipaiho awmnaa kal a tumna kâwn leh kâwn inkârah chuan, a lehlam lehlamah chuan lungpui tohlâwt a awm a: a pakhata hming chu Bozez a ni a, pakhata hming chu Sene a ni a.

⁵Lung tohlâwt pakhat chu Mikmas zâwn hmâr lampanga awm a ni a, a dang pakhat chu Gibea zâwn chhim lampanga awm a ni.

⁶Tin, Jonathana chuan a râlthuam kengtu tlangvâl hnênah chuan, “Hawh, serh tan lohho sipaite awmnaah sâwn i kal teh ang; LALPA chuan thil min tihsak mial mahna. LALPA tân chuan a tam emaw, a tlêm emawa chhandam chu eng mah theih lohna a awm ve chuang si lo va,” a ti a.

⁷Tin, a râlthuam kengtu chuan a hnênah, “I rilrua awm ang tak chuan ti rawh; ngai teh, i rilru chiah chu ka rilru a ni,” a ti a.

⁸Chutichuan, Jonathana chuan, “Hawh teh, an hnênah sâwn kan va kal kai ang a, kan va inlan ang a.

⁹Tin, kan hnêna, ‘In hnênah kan lo kal hma loh chuan lo awm rawh u,’ min tih chuan kan hmunah chuan kan ding reng ang a, an hnênah kan chho lo vang a.

¹⁰‘Kan hnên lamah hian lo chho rawh u,’ an tih erawh chuan kan chho vang a. LALPAN kan kutah min pe tawh a ni tih kan tân chhinchhiahna a ni ang,” a ti a.

¹¹Tin, an pahnihin Philistia mi râlvêngtu sipaite hmuhah chuan an va inlan a; tin, Philistia-hote chuan, “En teh u, Hebrai mite an bihrûkna khuarkhurum ata an lo chhuak ta,” an ti a.

¹²Tin, râlvêngtu sipaiho awmnaa mite chuan Jonathana leh a râlthuam kengtu chu, “Lo chho ula, thil eng emaw kan lo entîr ang che u,” tiin an lo au va. Tin, Jonathana chuan a râlthuam kengtu hnênah chuan, “Mi rawn zui chho rawh khai; LALPA chuan anni chu Israel-hote kutah a pe ta a ni,” a ti a.

¹³Tichuan, Jonathana chu a kut leh ke thawhin a lâwn chho va, a râlthuam kengtu chuan a zui a; tin, anni chu Jonathana hmaah chuan an tlu zawih zawih a, a râlthuam kengtu chuan a rawn that ve zêl a.

¹⁴Chutichuan, Jonathana leh a râlthuam kengtuin an thah hmasak ber ṭum chuan ṭîn chanve hmun emaw vêl tûrah hian mi sawmhnih emaw lai an that a ni.

¹⁵Tin, an riahhmuna mi te, phûla mi te, mipui zawng zawngte chu an khûr a. Râlvêngtu sipaite leh lamthamhote pawh chu an khûr ve a; tin, lîr a nghîng a; chutichuan, namênlova khurhna a lo awm a.

¹⁶Tin, Benjamin ram Gibea-a Saula râlvêngtute chuan an han thlîr vêl a, ngai teh, mipuite chu an ṭeh darh hum hum a, lehlam lehlamah an chavai nuaih nuaih mai a.

¹⁷Chutichuan, Saula chuan a hnêna mipui awmte hnênah chuan, “Tûnah hian inchhiar ula, tute nge kim lo han en teh u khai,” a ti a. Tin, an han inchhiar chuan ngai teh, Jonathana leh a râlthuam kengtu chu an lo awm ve ta lo va.

¹⁸Tin, Saula chuan Ahija hnênah chuan, “Pathian bâwm chu han la rawh khai,” a ti a. Chumi lai chuan Pathian bâwm chu Israela thlahte hnêna awm a ni a.

¹⁹Tin, heti hi a ni a, Saulan puithiam a biak lai mêk te chuan Philistia mite riahhmun lama buai mur mur chu a zual ta deuh deuh mai a; tin, Saula chuan puithiam hnênah, “I kut la rawh,” a ti a.

²⁰Tichuan Saula leh a hnêna mipui awm zawng zawngte chu an kal khâwm a, indonaah chuan an kal ta a; tin, ngai teh, anmahni leh anmahni khandaihin an inbei ta chiam a; tichuan, an buai ta nuaih nuaih mai a.

²¹Chutichuan, chûng lai ram vêla mi riahhmuna han kal ve, tûn hma lama Philistia-ho lama ṭang Hebrai mite pawh chu, Saula leh Jonathana hnêna awm Israel mite lamah chuan an lo pakai leh ta a.

²²Chutiang bawkin Ephraim tlâng rama Israel mi biru zawng zawngte pawh khân Philistia mite an tlân bo tih an lo hria a, anni pawh chuan indonaah tel vein an ûm zui ve ta ngat ngat a.

²³Chutichuan, LALPAN chumi ni chuan Israel-hote chu a chhanhim ta a; tin, Beth-aven thleng rawkin an bei a.

²⁴Tin, chumi ni chuan Israel mite chu an mangang a; nimahsela, Saula chuan, “Kan hmêlmate chunga phuba ka lâka, khua a lo tlai lam hmaa tu pawhin chaw a ei chuan ânchhia dawng rawh se,” tiin mipuite chu a vau va. Chutichuan, tu mahin chaw rêng rêng a tem pawh an tem miah lo va.

²⁵Tin, mipui zawng zawngte chuan ramhnuai an va thleng a, leiah chuan khawizu te a lo awm a.

²⁶Tin, mipuiin ramhnuai an va thlen chuan ngai teh, khawizu te a lo luang a; nimahsela, tu mahin an pir lo, mipuite chuan chhechham chu an hlau a ni.

²⁷Nimahsela, Jonathana chuan a pain mipuite chu chhechhama a vau lai a hre ve lo va; chutichuan, a tiang ken hmâwr chu khawithlârah chuan a vit lût a, a pir a; tichuan, a mitmeng a lo fiah ta a.

²⁸Chutichuan, mipui zînga mi pakhat chuan a bia a, “I pa chuan mipuiho hi, ‘Vawiina chaw ei apiang chu ânchhe dawngin awm rawh se,’ tiin min vau tlat a, mipuite pawh an chau hle rêng mai,” a ti a.

²⁹Chutichuan, Jonathana chuan, “Ka pa hian mite a timangang mai a nih hi maw! En ta che u, khawizu tlêm tê ka han tem mai avânga ka mitmeng a lo fiah tâkzia hi!

³⁰Mipui hian an râllâk thil hi an hmuh apiang, vawiinah hian an duh duhin ei thei phei sela chu a va nasa lehzual dâwn êm! Chumi avâng chuan Philistia mite chu kan thah nasat theih loh phah a nih hi,” a ti a.

³¹Tichuan, chumi ni chuan Mikmas aṭangin Aijalon thlengin Philistia mite chu an bei a; tin, mipuite an chau ta hle mai a.

³²Chutichuan, mipuite chuan an râllâk thil chu a bawhin an bawh a, berâm te, sebâwngpa te, sebâwngno te an man a, leiah an tihlum a, mipuite chuan a thisen chawpin an ei ta mai a.

³³Chutichuan, “Ngai teh, mipuite chuan thisen chawpa eiin LALPA chungah thil an tisual ta,” tiin Saula chu an hrilh a. Tin, ani chuan, “Vervêk takin thil in ti a ni; vawiinah hian lung lian tak mi rawn lumsak rawh u,” a ti a.

³⁴Tin, Saula chuan, “Mipui zîngah chuan vâk darh vek ula, an hnênah, ‘Mi tinin a sebâwng leh a berâm ka hnênah rawn la sela, hetah hian rawn talh sela, ei rawh se; a thisen chawpa eia LALPA chungah thil tisual lovin, a ti e,’ va ti rawh u,” a ti a. Tin, chumi zân chuan mi zawng zawng chuan mahni bâwngpa an rawn kai ṭheuh va, chutah chuan an talh a.

³⁵Tin, Saula chuan LALPA tân maichâm a siam a. Chu chu LALPA tâna a maichâm siam hmasak ber a ni.

³⁶Tin, Saula chuan, “Zânah Philistia mite zuk bei ila, zîng khaw ên thlengin i rawk ang u khai, tu mah rêng rêng i zuah suh ang u,” a ti a. Tin, anni chuan, “Ṭha i tih ang apiangin ti rawh,” an ti a. Puithiam erawh chuan, “Heti laiah hian Pathian i hnaih teh rih ang u,” a ti a.

³⁷Tin, Saula chuan Pathian a râwn a, “Philistia mite chu ka zuk bei ang em? Israel-ho kutah i pe ang em?” a ti a. Nimahsela, chumi ni chuan a chhâng lo va.

³⁸Tin, Saula chuan, “Nangni mipui hotu zawng zawngte chu lo hnai teh u khai, vawiinah hian a eng berah nge kan tihsual hriat chhuah tum teh u.

³⁹Israel-hote chhandam ṭhîntu LALPA nunna chhâlin ka sawi e, ka fapa Jonathana thiltihah pawh lo ni sela, a thi ngei ngei tûr a ni,” a ti a. Nimahsela, mipui zînga mi chuan tu mah chhâng rêng rêng an awm lo va.

⁴⁰Chutichuan, Israel-ho zawng zawng hnênah chuan, “Nangniho hi a hrangin awm khâwm ula; tin, kei leh ka fapa Jonathana hi a hrangin kan awm ang e,” a ti a. Tin, mipuite chuan Saula hnênah, “Ṭha i tih ang apiangin ti rawh,” an ti a.

⁴¹Chutichuan, Saulan LALPA, Israel-te Pathian hnênah chuan, “A dik tak chu han tilang ang che,” a ti a. Tin, ṭhumvâwr chu Jonathana leh Saula chungah chuan a tlu a; mipuite erawh chu an fihlîm a.

⁴²Tin, Saula chuan, “Kei leh ka fapa Jonathana thlei nân ṭhum vâwr rawh u,” a ti a. Tichuan, Jonathana chungah chuan a tlu a.

⁴³Chutichuan, Saula chuan Jonathana hnênah chuan, “Eng nge ni i tih min hrilh rawh khai,” a ti a. Tin, Jonathana chuan a hrilh a, “Ka tiang ken hmâwrin khawizu tlêm chu ka tem ngei mai a; ngai teh, ka thi ngei tûr a ni,” a ti a.

⁴⁴Tin, Saula chuan, “Pathianin a tih tihin ti mai sela, chu aia nasa pawhin; i thi ngei ngei tûr a ni, Jonathan,” a ti a.

⁴⁵Tin, mipuite chuan Saula hnênah chuan, “Israel-te zîngah he chhandamna ropui tak thawktu Jonathana hi a thi ang maw? Hnai lo ve! LALPA nunna chhâlin kan sawi e, a sam zai khat pawh hi leiah a tla hlek lo vang; vawiin hian Pathian a thawhpui a nih hi,” an ti a. Chutichuan, mipui chuan Jonathana chu thi lo tûrin an chhanhim ta a.

⁴⁶Chutichuan, Saulan Philistia mite a ûm chu a kîrsan ta a; tin, Philistia mite chu anmahni awmhmun lamah an kal ta a.

⁴⁷Chutichuan, Saula Israel-ho chunga rorêltua a han ṭan chuan kil tinah a hmêlma Moab-hote, Amona thlahte, Edom-hote, Zoba lalhote, Philistia mite chu a do va; a thlêkna lam apiang maiah chuan a hneh zêl mai a.

⁴⁸Huai takin a bei a, Amalek mite chu a hneh a, Israel-ho chu anmahni rawktute kut ata a chhanchhuak a ni.

⁴⁹Saula fapate chu Jonathana te, Isvia te, Malkisua te an ni a. Tin, a fanute pahnih hming chu hêng hi a ni: a upa zâwk hming chu Merabi a ni a, a naupang zâwk hming chu Mikali a ni.

⁵⁰Saula nupui hming chu Ahinoami, Ahimaaza fanu a ni. Tin, a sipaite hotu hming chu Abnera, Saula pami Nera fapa a ni.

⁵¹Kisa chu Saula pa a ni a; tin, Abnera pa Nera chu Abiela fapa a ni a.

⁵²Chutichuan, Saula dam chhûng zawng zawng chuan Philistia mite nên nasa tak maiin an indo ṭhîn a. Tin, Saula chuan mi chak emaw, mi huai emaw a hmuh apiang chu a la zêl ṭhîn a ni.