Read Mizo_Old_version LEHKHABU PAKHATNA SAMUELA 15 Bible Online

LEHKHABU PAKHATNA SAMUELA 15 - Mizo_Old_version bible

LEHKHABU PAKHATNA SAMUELA 15

¹Tin, Samuela chuan Saula hnênah, “LALPAN a mite chungah, Israel-hote chunga lal atâna hriak thih tûr chein mi tîr a ni; chutichuan, LALPA thusawi aw chu ngaithla teh khai.

²Sipaihote LALPA chuan, ‘Amalek miten Israel-hote chunga an thiltih, Aigupta ram ata an lo chhuah laia an lo dâl dânte kha ka chhinchhiah reng a.

³Amalek-hote bei tûrin kal la, an thil neih zawng zawng zuah rêng rêng nei lovin tiboral vek rawh; a hmei a pa leh nausên te, hnute hne lai te, bâwngpa te, berâm te, sanghâwngsei te, sabengtung te nên tihlum vek ang che,’ a ti a ni,” a ti a.

⁴Chutichuan, Saula chuan mipuite a ko khâwm a, Telaim khuaah a chhiar a, sipai nuai hnih leh Juda mi sîngkhat an ni a.

⁵Tin, Saula chuan Amalek-ho khua chu a zuk thleng a, ruamah chuan a lo lambun a.

⁶Tin, Saula chuan Ken-hote hnênah chuan, “Lo chhuak ula, Amalek-hote zîng ata hi inthiarfihlîm rawh u; chuti lo chuan, ka tihlum tel dah ang che u. Nangni zawngin Israela thlahte zawng zawng Aigupta ram aṭanga an lo chhuak kha in lo khawngaih si a,” a ti a. Chutichuan, Ken-hote chu Amalek mite zîng ata an chhuak ta a.

⁷Chutichuan, Saula chuan Amalek mite chu Havila aṭanga Aigupta ram dep Sur thlengin a bei a.

⁸Tin, Amalek mite lal Agaga chu a nungin a man a, mipui zawng zawngte chu khandaihin a sât hlum vek a.

⁹Amaherawhchu, Saula leh mipuite chuan Agaga chu an zuah a, berâm ṭha ṭha te, bâwngpa ṭha ṭha te, a thau thau te, berâmno te, a ṭha zawng zawngte nên, chûngte chu an tihlum duh lo va; a ṭha lo leh an duh loh apiang erawh chu an tihlum vek a.

¹⁰Chutichuan, LALPA thu chu Samuela hnênah a lo thleng a,

¹¹“Saula lala ka lo ruat ta chu ka inchhîr a ni, a mi zui lai chu mi hnuchhawnin ka thupêk angin a ti si lo va,” a ti a. Tin, Samuela chu a thinur a, zankhuain LALPA chu a au va.

¹²Tin, Samuela chu Saula hmuak tûrin zîng takah a tho va; tin, “Saula chu Karmel-ah a kal a; ngai teh, chutah chuan hriat rengna lung a phun a; tin, a kîr leh a, a kal zêl a, Gilgal-ah a chhuk ta,” tiin Samuela chu an hrilh a.

¹³Tin, Samuela chu Saula hnên lamah chuan a kal ta a; tin, Saula chuan a hnênah, “LALPAN malsâwm che rawh se! LALPA thupêk ang chuan ka ti ta e,” a ti a.

¹⁴Tin, Samuela chuan, “Chûng berâm bê ka benga lo lût leh bâwngpa bû ka han hriatte chu engtizia nge ni si?” a ti a.

¹⁵Tin, Saula chuan, “Amalek mite ta an rawn lâksak a ni; LALPA i Pathian hnênah inthawi nân mipuiten berâm ṭha ṭha leh bâwngpa ṭha ṭha an zuah a ni; tin, a dang zawng zawng chu kan tihlum vek a ni,” a ti a.

¹⁶Chutichuan, Samuela chuan Saula hnênah, “Ngawi rawh, nizâna LALPAN ka hnêna thu a sawi ka hrilh ang che,” a ti a. Ani chuan a hnênah, “Sawi rawh khai,” a ti a.

¹⁷Tin, Samuela chuan, “Nangma ngaihin mi tê tak ni mah la, Israel hnam hotu atâna a siam i ni lâwm ni? Tin, LALPA chuan Israel-ho lal atân hriak a thih chia;

¹⁸tin, LALPA chuan a tîr chhuak chia, ‘Kal la, mi sualho, Amalek mite chu tihlum vek la, an boral dêr hma loh chuan bei zêl rawh,’ a ti chia.

¹⁹Engati nge LALPA thu chu zâwm lova, râllâk thil chu a bawha i bawha, LALPA mit hmuha thil ṭha lo i tih mai?” a ti a.

²⁰Tin, Saula chuan Samuela hnênah, “E, LALPA thu chu ka zâwm alâwm, LALPA min tirhna lamah chuan ka kal a, Amalek lal Agaga ka rawn man a, Amalek mite chu ka tihlum vek alâwm.

²¹Amaherawhchu, mipuite chuan râllâk thil berâm leh bâwngpate tihboral tûr zînga a ṭha ṭhate chu, Gilgal khuaah LALPA i Pathian hnênah inthawi nân an rawn la a ni,” a ti a.

²²Tin, Samuela chuan, “LALPA chuan LALPA thu zawm chu a lawm angin hâlral thilhlante leh inthawinate hi a lâwm em ni? Ngai teh, inthawina aiin thuawih chu a ṭha zâwk a, berâmpa thau aiin a thu pawm chu a ṭha zâwk a ni.

²³Helna hi aienthiamna sual te nên a inang a, luhlulna hi milem biak leh pathian lem biak tluk a ni. LALPA thu i duh loh avângin ani pawhin lal atân a duh ta bîk lo che a ni,” a ti a.

²⁴Tin, Saula chuan Samuela hnênah, “Thil ka tisual dêr mai a ni, LALPA thupêk leh i thu chu ka lo bawhchhe reng mai a nih hi; mipuite ka hlauhva, an thu ka lo awihna lamah hian.

²⁵Chutichuan, ka sual ngaidam la, LALPA ka biak theih nân mi hawpui leh rawh khai,” a ti a.

²⁶Tin, Samuela chuan Saula hnênah, “Ka hawpui tawp lo vang che, LALPA thu chu i duh si lo va; tin, LALPA pawhin Israel-hote lal atân a duh ta bîk lo che a ni,” a ti a.

²⁷Chutichuan, Samuela chu kal tûra a han her chuan Saula chuan a puan fêm chu a han chelh a, a thlêr ta a.

²⁸Tin, Samuela chuan a hnênah, “Vawiin aṭang hian LALPAN Israel ram hi a chhuhsak ta chia, i aia ṭha zâwk i ṭhenawm a pe ta a ni.

²⁹Tin, Israel-te Thahruia chu a daw lo vang a, a inlamlêt hek lo vang. Mihring anga inlamlêt leh mai mi a ni si lo va,” a ti a.

³⁰Chutichuan, ani chuan, “Ka lo sual ta a ni; nimahsela, ka mite zînga upaho leh Israel-hote hmaah hian mi chawimawi tûrin ka ngên a che; tin, LALPA i Pathian chu ka biak theih nân mi hawpui leh hrâm ang che,” a ti a.

³¹Chutichuan, Samuela chuan Saula chu a hawpui ta a, Saula chuan LALPA chu a be ta a.

³²Chutichuan, Samuela chuan, “Amalek mite lal Agaga chu ka hnênah han hruai rawh u,” a ti a. Tichuan, Agaga chu a hnênah chuan khûr chungin a va kal a. Tin, Agaga chuan, “Thihna kha chu ka pumpelh tawh a ni chêk ang chu maw?” a ti a.

³³Tin, Samuela chuan, “I khandaihin hmeichhiate fa nei lova a siam angin i nu pawh hmeichhe zînga fa nei lo mi a ni ang,” a ti a. Chutichuan, Samuela chuan Agaga chu Gilgal khuaah LALPA hmaah chuan a sât sawm ta berh mai a.

³⁴Tin, Samuela chu Rama khuaah a kal a; tin, Saula chu a inah Saula awmna khua Gibea-ah a chho ta a.

³⁵Chutichuan, Samuela chuan a thih ni thlengin Saula chu a tlawh leh ta lo va. Samuela chu Saula avângin lungngaih chu a lungngai a ni; tin, LALPA chu, Israel-te lal atâna Saula a lo siam chu a inchhîr a ni.