Read Mizo_Old_version LEHKHABU PAKHATNA SAMUELA 16 Bible Online

LEHKHABU PAKHATNA SAMUELA 16 - Mizo_Old_version bible

LEHKHABU PAKHATNA SAMUELA 16

¹Chutichuan, LALPA chuan Samuela hnênah, “Israel mite lal atân ka duh tawh loh ahnu, Saula avâng hian eng chen nge maw i lungngaih dâwn le? I kîah hriak thun khat la, kal rawh; Bethlehem mi Jesaia hnênah ka tîr dâwn che a ni. A fapate zînga mi lal atân ka ruat tawh reng a ni,” a ti a.

²Tin, Samuela chuan “Engtin nge ka kal theih ang? Saulan a lo hriat chuan min tihlum mai ang asin,” a ti a. Tin, LALPA chuan, “Bâwnglâ hruai la, ‘LALPA hnêna inthawi tûra lo kal ka ni,’ ti ang che.

³Tin, inthawinaah chuan Jesaia chu ko la, i tih tûr chu ka hrilh ang chia; tin, a hming ka hrilh tûra che chu hriak mi thihsak ang che,” a ti a.

⁴Tichuan, Samuela chuan LALPA sawi ang chuan a ti a, Bethlehem-ah chuan a kal ta a. Tin, khuaa upate chuan khûr chungin amah an lo hmuak a, “Ṭha lam thua lo kal em i nih le?” an ti a.

⁵Tin, ani chuan, “Ṭha lam thu-ah ni e; LALPA hnêna inthawi tûra lo kal ka ni. Intithianghlim ula, inthawinaah lo kal ve rawh u,” a ti a. Tin, Jesaia leh a fapate chu a tithianghlim a, inthawinaah chuan a ko va.

⁶Tin, heti hi a ni a, an lo kal chuan Eliaba chu a lo en a, “LALPA hriak thiha chu a hmaa awma hi a ni ngei mai,” a ti a.

⁷Nimahsela, LALPA chuan Samuela hnênah, “A hmêl lam emaw, a sân lam emaw en suh; ani hi chu ka duh loh a ni. LALPA chuan mihring en dân angin a en ve si lo va; mihring chuan pâwn lama lan dân an en ṭhîn a, LALPA erawh chuan thinlung lam a en zâwk ṭhîn a ni,” a ti a.

⁸Tin, Jesaia chuan Abinadaba a han ko va, Samuela hmaah chuan a kaltîr a. Ani chuan, “Hei pawh hi LALPA thlan a la ni lo,” a ti a.

⁹Tin, Jesaia chuan Sama a va kaltîr leh a. Tin, ani chuan, “Hei pawh hi LALPA thlan a la ni lo cheu,” a ti a.

¹⁰Tichuan, Jesaia chuan a fapate pasarih chu Samuela hmaah chuan a kaltîr a. Tin, Samuela chuan Jesaia hnênah, “LALPAN hêngho hi a thlang lo a ni,” a ti a.

¹¹Tin, Samuela chuan Jesaia hnênah, “Hetah hian i fate an awm kim vek em?” a ti a. Ani chuan, “A naupang ber a la awm a, ngai teh, berâm a vêng a ni,” a ti a. Tin, Samuela chuan Jesaia hnênah, “Va kohtîr rawh khai; a lo thlen hma loh chu kan ṭhu dâwn lo a ni,” a ti a.

¹²Chutichuan, a va kohtîr a, a rawn hruai a. Ani chu sâr veng vawng, mitmeng mawi tak, hmêlṭha tak mai a ni a. Tin, LALPA chuan, “Tho la, hriak thih rawh; hei ngei hi a ni e,” a ti a.

¹³Chutichuan, Samuela chuan hriak bâwm ki chu a la a, a unaute zîngah chuan amah chu hriak a thih a; tichuan, LALPA thlarau chu chumi ni aṭang chuan nasa takin Davida chungah a lo thleng ta a. Chutichuan, Samuela chu a tho va, Rama khuaah a kal ta a.

¹⁴Tin, LALPA thlarau chuan Saula chu a chhuahsan a, LALPA tirh ramhuaiin amah a tibuai a.

¹⁵Tin, Saula chhiahhlawhte chuan a hnênah, “Ngai teh, Pathian tirh ramhuaiin a tibuai che a ni a.

¹⁶Kan pu chuan i chhiahhlawh i hmaa awmte ṭingṭang tum thiam tak zawn thu min pe rawh khai; tichuan, Pathian tirh ramhuaiin a man hun chein a tum ang a, i ṭha mai ang,” an ti a.

¹⁷Tin, Saula chuan a chhiahhlawhte hnênah chuan, “Tum thiam tak chu mi han zawnsak ula, ka hnênah rawn hruai rawh u le,” a ti a.

¹⁸Chutichuan, tlangvâl pakhat chuan a chhâng a, a hnênah, “Ngai teh, Bethlehem mi Jesaia fapa pakhat chu ka hmu tawh a, chu mi chu tum thiam tak, mi huai tak, indo mi, thusawi thiam tak, hmêlṭha tak a ni a, a hnênah LALPA pawh a awm,” a ti a.

¹⁹Chutichuan, Saula chuan Jesaia hnênah chuan mi a tîr a, “I fapa Davida, berâm vênga awm chu ka hnênah han kaltîr rawh,” a ti a.

²⁰Tin, Jesaia chuan sabengtung, chhang leh uain peng khat phur leh kêlno a la a, a fapa Davida chu Saula pêkah a kentîr a.

²¹Tin, Davida chuan Saula hnên chu a va thleng a, a hmaah chuan a va ding a. Ani chuan a lo ngaina hle mai a, a râlthuam kengtuah a ṭang ta a.

²²Tin, Saula chuan Jesaia hnênah, “Davida hi ka hnênah awm rawh se, ka mit a tlung hle mai,” tia hrilh tûrin mi a tîr a.

²³Tin, heti hi a ni a, Pathian tirh ramhuaiin Saula a man apiangin Davida chuan ṭingṭang a la a, a tum ṭhîn a. Chutichuan, Saula chu a lo harh a, a ṭha leh ṭhîn a; tin, ramhuai chuan a chhuahsan ṭhîn a.