Read Mizo_Old_version LEHKHABU PAKHATNA SAMUELA 17 Bible Online

LEHKHABU PAKHATNA SAMUELA 17 - Mizo_Old_version bible

LEHKHABU PAKHATNA SAMUELA 17

¹Tin, Philistia mite chuan indo tûrin an sipaite an khâwm chiam mai a. Judai ram chhûng Soko khuaah an pung khâwm a, Ephes-damim hmunah Soko khua leh Azeka khaw inkârah ṭanhmun an khuar a.

²Tin, Saula leh Israel mite chu an pung khâwm a, Ela ruamah ṭanhmun an khuar a, Philistia mite lo dang tûrin an inzâr darh a.

³Tin, Philistia mite chu tlâng pangah an awm a; tin, Israel mite chu a lehlam tlâng pangah an awm a, an inkârah chuan ruam a awm a.

⁴Tin, Philistia mite ṭanhmun aṭang chuan an mi chak, a hming Goliatha, Gath khuaa mi, tawng ruk leh khâpa sâng hi a lo chhuak a.

⁵Dâr lukhum hi a khum a, âwmphaw a ha a; a âwmphaw rih lam chu dâr sekel sângnga a ni a.

⁶A ngalah chuan dâr ngalphaw a bun a, a hnungzângah chuan dâr feitê a pai a.

⁷A fei ngul chu themkawl ang hi a ni a; tin, a fei lû chu thîr sekel zaruka rit a ni a; tin, a phaw kengtu chu a hmaah a kal a.

⁸Tin, a ding a, Israel sipaite chu a au va, an hnênah, “Engati nge indo tûra in rawn inzâr darh? Kei Philistia mi, nangni Saula chhiahhlawh in ni lâwm ni? Mi inthlang ula, ka hnênah lo chhuk rawh se.

⁹Mi beih theiha mi tihhlum chuan in chhiahhlawhah kan awm ang a; amaherawhchu, keiin ka ngama ka tihhlum chuan kan chhiahhlawhah in awm ang a, kan rawng in bâwl ang,” a ti a.

¹⁰Tin, Philistia mi chuan, “Vawiinah hian Israel-ho sipaite chu ka cho a ni; mi pakhat han thawh ula, kan lo inbei ang e,” a ti a.

¹¹Tin, Saula leh Israel-ho zawng zawngin chu Philistia mi thusawi chu an han hriat chuan an zâm a, an hlau ta êm êm mai a.

¹²Tin, Davida chu Jesaia fapa a ni a, ani chu Bethlehem-juda-a Ephrath mi kha a ni a, fapa pariat a nei a; ani chu Saula lal lai chuan upa tak, tar tak a ni tawh a.

¹³Tin, Jesaia fapa upate pathum chuan indonaah Saula chu an zui a. A fapate pathum indonaa kalte hming chu a upa ber Eliaba te, a dawttu Abinadaba te, a pathumna Sama te an ni.

¹⁴Tin, Davida chu a naupang ber a ni a; tin, a upate pathum chuan Saula an zui a.

¹⁵Davida chu Saula hnên aṭangin Bethlehem-ah a pa berâm enkawlin a va kal a va kal ṭhîn a.

¹⁶Tin, Philistia mi chuan zîng leh tlai apiangah hian a va hnaih ṭhîn a, ni sawmli chhûng a va intâr lang ṭhîn a.

¹⁷Tin, Jesaia chuan a fapa Davida hnênah chuan, “Bâr atâna pho ro epha khat leh he chhang hlâwm sâwm hi keng la, i unaute hnênah an riahhmunah va kalpui thuai rawh khai.

¹⁸Tin, bâwnghnute khal tlang sâwm hi an pâwla sâng hotu kensak la; tin, i unaute engtin nge an awm han zâwt la, an chanchin han hria ang che.

¹⁹Saula leh anni leh Israel mi zawng zawngte chu Philistia mite beiin Ela ruamah chuan an awm e,” a ti a.

²⁰Tin, Davida chu zîng takah a tho va, berâmte chu vêngtu pakhat a kawltîr a, Jesaian thu a pêk ang chuan a keng a, a kal ta a; tin, indona hmuna chhuak mêk sipaihote chu inbei tûra an lo au dur dur lai takin ani chuan tawlailîr awmna hmun chu a va thleng a.

²¹Tin, Israel-ho leh Philistia mite chu inbei tûrin an lo inzâr a, sipai leh sipai chu an lo inep a.

²²Tin, Davida chuan a bungrua chu bungraw enkawltu hnênah chuan a dah a, sipai hnên lamah chuan a va tlân a, a ute chu chibai a va bûk a.

²³Tin, anmahni a biak lai chuan ngai teh, an mi chak Gath khuaa Philistia mi, a hming Goliatha chu Philistia mite sipai pâwl zîng ata a lo chhuak a, a thusawi ngai bawk kha a han sawi a. Chu chu Davida chuan a lo hria a.

²⁴Tin, Israel mi zawng zawngte chuan chu mi chu an han hmuh chuan an tlânchhia a, an hlau êm êm mai a.

²⁵Tin, Israel mite chuan, “Kha mihring lo chhuaka kha in hmu em? Israel mite cho tûrin a lo chhuak a ni ngei mai; tu pawh amah tihlum apiang chu lalin nasa takin sum lamin a tihausa ang a, a fanu a pe ang a; tin, a pa chhûngkua chu Israel-ho zîngah hian chhiah a âwl ang,” an ti a.

²⁶Tin, Davida chuan a kianga dingte hnênah chuan, “He Philistia mi hi tihluma Israel-ho hmingchhiatna tirehtu chu engtia tih tûr nge ni ang? He serh tan loh Philistia mi hi tu nge maw a niha, Pathian nung sipaite a han cho vei le?” a ti a.

²⁷Tin, mipuite chuan hetiang hian an chhâng a, “A tihlumtu apiang chu kan sawi ang khân tih a ni ang,” an ti a.

²⁸Tin, a u upa ber Eliaban mite hnêna a thusawi lai chu a lo hria a; tichuan, Eliaba chu Davida chungah chuan a thin a ur ta thut a. “Engah nge i lo chhuk ve ni? Thlalêra berâm tlêm awmte kha tu nge i vêntîr ni? I chapozia leh i rilru ṭhat lohzia ka hria a ni; indo en tûr tein i lo kal mai mai a,” a ti a.

²⁹Tin, Davida chuan, “Eng nge maw ka tih le? A chhan a awm a ni lâwm ni?” a ti a.

³⁰Tin, ani chuan mi dang hnên lam a hawisan a, a sawi ngai bawk a sawi a; tin, mipuite chuan a hmaa an chhân ang bawkin an chhâng leh a.

³¹Tin, Davida thusawi chu an hriatin Saula hnênah an sawi chhâwng a; tin, ani chuan a ko va.

³²Tin, Davida chuan Saula hnênah, “Amah avâng chuan tu ma rilru zâm suh se; i chhiahhlawh hian chu Philistia mi chu ka va bei ang e,” a ti a.

³³Tin, Saula chuan Davida hnênah, “Nang zawng chu Philistia mi bei tûr chuan i kal thei êm lo vang e; tleirâwl chauh i la ni si a, ani zawng a tleirâwl tirh ata indo mi a ni si a,” a ti a.

³⁴Tin, Davida chuan Saula hnênah, “I chhiahhlawh hian ka pa berâm ka vêng ṭhîn a; sakeibaknei emaw, savawm emaw a lo kala berâm rual zîng ata berâmno a lâk te hian,

³⁵ka ûm a, ka bei a, a kâ ata chu ka chhanchhuak ṭhîn asin; tin, mi bei tûra a lo thawh te hian a bak hmulah ka man a, ka bei a, ka tihlum ṭhîn a ni.

³⁶I chhiahhlawh hian sakeibaknei leh savawmte ka tihlum ve ve tawh ṭhîn a; chu serh tan loh Philistia mi chu anmahni angin a awm ve mai ang maw le, Pathian nung sipaite a cho vei a,” a ti a.

³⁷Tin, Davida chuan, “Sakeibaknei kutbâwr ata leh savawm kutbâwr ata mi chhanchhuaktu LALPA chuan chu Philistia mi kut ata chu mi chhanchhuak ang,” a ti a. Tin, Saula chuan Davida hnênah, “Kal teh le, i hnênah LALPA a awm ang chu,” a ti a.

³⁸Tin, Saula chuan Davida chu ama thuam a bel a, dâr lukhum a khumtîr a, âwmphaw a hâktîr a.

³⁹Tin, Davida chuan a thuam chungah chuan a khandaih a pai a, kal a han tum a; chutiang chuan a la tichhin ngai si lo va. Tin, Davidan Saula hnênah, “Ka kalpui thei dâwn hauh lo mai! Hetiang hian ka la tichhin ngai lo a ni,” a ti a. Tichuan, Davida chu a inhlîp ta a.

⁴⁰Tin, a tiang chu a keng a, luitêa lung mûm mâm thel thawl panga a thlang a, a berâm vên ip, a iptêah chuan a pai a; tin, a virvawm chu a keng a, Philistia mi chu a va pan hnai ta a.

⁴¹Tin, Philistia mi chu a lo kal zêl a, Davida chu a rawn pan hnai a; tin, phaw kengtu chu a hmaah a kal a.

⁴²Tin, Philistia mi chu a han hawi vêl a, Davida chu a han hmuh chuan a hmusit hle mai a; sâr veng vawng, mitmeng mawi tak, tleirâwl mai a ni si a.

⁴³Chutichuan, Philistia mi chuan Davida hnênah chuan, “Ui emaw ka niha tiangte nêna mi rawn pan chu le?” a ti a. Tichuan, Philistia mi chuan a pathiante chhâlin Davida chu ânchhia a lawh a.

⁴⁴Tin, Philistia mi chuan Davida hnênah, “Lo kal teh, i sate kha chunglêng savate leh ramsate ka lo eitîr teh ang,” a ti a.

⁴⁵Chutichuan, Davida chuan Philistia mi hnênah chuan, “Nang zawng khandaih te, fei te, feitê te kengin i lo thawk a; kei zawng sipaite LALPA, Israel sipaite Pathian, i chova hmingin ka lo thawk zâwk a ni.

⁴⁶Vawiinah hian LALPAN nang hi ka kutah mi pe dâwn a ni; tin, ka that ang chia, i lu ka tansak ang che. Tin, Philistia sipaiho ruangte chu vawiinah hian chunglêng savate leh ramsate ka eitîr dâwn a ni; chutichuan, lei chunga mi zawng zawng hian Israel-ho zîngah hian Pathian a awm tih an hre thei ang.

⁴⁷Tin, heta pungho zawng zawng hian LALPA chuan khandaih leh feiin a chhandam lo tih an hre thei ang a; indona chu LALPA indona a ni si a, ani chuan nangniho hi kan kutah mi pe dâwn a ni,” a ti a.

⁴⁸Tin, heti hi a ni a, Philistia mi chu a lo thawha Davida bei tûra a rawn hnaih chuan, Davida chu sipaiho lamah chuan Philistia mi chu bei tûrin a tlân ta thuai a.

⁴⁹Tin, Davida chuan a ip chu a han zen a, lung a han phawrh a, a virvawm chuan a han vawm a, Philistia mi chu a chaldâr takah a han vawm a, a chalah chuan lung chu a lût a, a tlu bawkkhup ta dêr mai a.

⁵⁰Chutichuan, Davida chuan Philistia mi chu virvawm leh lungin a ngam a, Philistia mi chu a vawm a, a that ta a; Davida chuan khandaih a keng hauh lo va.

⁵¹Tichuan, Davida chu a tlân a, Philistia mi kiangah chuan a va ding a, a khandaih chu a la a, a pai ata chu a phawi a, chu chuan a that a, a lu a tan ta a. Tin, Philistia miten an mi chak chu a thi tih an hriatin an tlânchhe ta a.

⁵²Tin, Israel mi leh Juda mite chu an tho va, an au va, Philistia mite chu Gath thleng leh Ekron kulh kawngkhâr thleng rawkin an ûm ta a. Tin, Philistia mite zînga hliamho chu Saaraim kawng tluanin Gath leh Ekron thlengin an tlu rum mai a ni.

⁵³Tin, Israela thlahte chuan Philistia mite an ûm chu an kirsan a, an riahhmun chu an suan ta a.

⁵⁴Tin, Davida chuan Philistia mi lu chu a la a, Jerusalem-ah a kalpui a, râlthuam erawh chu a puan inah a dah a.

⁵⁵Saulan Philistia mi bei tûra Davida kal a hmuh khân sipai hotu Abnera hnênah chuan, “Abner, he tleirâwl hi tu fa nge ni?” a ti a. Tin, Abnera chuan, “I nunna chhâlin ka sawi e, aw lalpa, ka hre hauh lo mai,” a ti a.

⁵⁶Tin, lal chuan, “He naupang hi tu fa nge ni zâwt chhuak rawh khai,” a ti a.

⁵⁷Tin, Davida, Philistia mi a that lo haw chu Abnera chuan a hruai a, Philistia mi lu keng chungin Saula hnênah chuan a kalpui a.

⁵⁸Tin, Saula chuan a hnênah, “Tu fapa nge i nih le tlangvâl?” a ti a. Tin, Davida chuan a chhâng a, “Bethlehem mi i chhiahhlawh Jesaia fapa ka ni,” a ti a.