Read Mizo_Old_version LEHKHABU PAKHATNA SAMUELA 18 Bible Online

LEHKHABU PAKHATNA SAMUELA 18 - Mizo_Old_version bible

LEHKHABU PAKHATNA SAMUELA 18

¹Tin, heti hi a ni a, Saula hnêna thu a sawi zawh chuan Jonathana nunna leh Davida nunna chu a lo inzawm ta chiah mai a; tichuan, Jonathana chuan ama nunna a hmangaih ang chiahin a hmangaih ta a.

²Tin, Saula chuan chumi ni chuan a awmtîr ta nghâl a, a pa inah a hâwntîr phal ta lo va.

³Chutichuan, Jonathana leh Davida chuan thu an thlung a, ama nunna ang chiaha a hmangaih avângin.

⁴Tin, Jonathana chuan a puan sin lai a hlîp a, Davida a pe a, a thuam leh a khandaih leh a thalngul leh a tai hrênna lamin a pe a.

⁵Tin, Saulan a tirhna apiangah Davida chu a kal ṭhîn a, fel takin a che ṭhîn a. Tin, Saula chuan râl kâp mite hotu atân a siam a, chu chu mi zawng zawng ngaihah leh Saula chhiahhlawhte ngaihah pawh a ṭha êm êm a ni.

⁶Tin, heti hi a ni a, an lo hâwna, Davida chu Philistia mi thata a lo haw chuan, Israel khaw tinah hmeichhiate chu hla sa leh lâm chungin khuangtê leh thil ri theite nên, hlim takin Lal Saula hmuak tûrin an lo chhuak a.

⁷Tin, hmeichhiate chu lâm chungin hlain an inchhâwn a, “Saulan a sânga sâng a that, Davidan a sînga sîng,” an ti a.

⁸Chutichuan, Saula chu a thinur ta viau mai a, chûng thu chuan a tilâwm lo hle mai a; “Davida chu a sînga sîng thatah an ngai a, kei erawh chu a sânga sâng chauh thatah mi ngai a. Ram tih ngawt loh chu a neih tûr dang eng nge awm tawh?” a ti a.

⁹Chutichuan, Saula chuan chumi ni aṭang chuan Davida chu a hmumawh ta a.

¹⁰Tin, heti hi a ni a, a tûkah chuan Saula chungah chuan Pathian tirh ramhuai a lo thleng ta chiam mai a, in chhûngah chuan thu a sawi ta bual bual mai a. Tin, Davida chuan ni danga a tih ang bawkin ṭingṭang a tum a; Saula chuan a fei a keng reng a.

¹¹Tin, Saula chuan fei chu a han lek a, “Bangah sâwn Davida saw ka khawh bet tlat teh ang,” a ti a. Davida chuan vawi hnih a kiansan a.

¹²Tin, a hnênah LALPA a awm avâng leh, Saula chu a kalsan avângin Saula chuan Davida chu a hlau va.

¹³Chu vâng chuan Saula chuan a hnên aṭangin a insawntîr a, sâng chunga a sipai hotuah a siam a; tin, mipui zîngah chuan a lûtin a chhuak ṭhîn a.

¹⁴Tin, Davida chu a thiltih apiangah fel takin a che ṭhîn a; LALPA chu a hnênah a awm a.

¹⁵Tin, Saula chuan fel takin a che ṭhîn tih a hmuhin a hlau hle mai.

¹⁶Nimahsela, Israel-ho leh Juda-ho zawng zawngte chuan Davida chu an ngaina êm êm a; an zînga lûta chhuak ṭhîn a ni si a.

¹⁷Tin, Saula chuan Davida hnênah, “Ngai teh, ka fanu upa zâwk Merabi hi i nupuiah ka neihtîr ang che; huai takin mi ṭan phawt mai la, LALPA indonate chu do vang che,” a ti a. Saula chuan, “Kei chuan a chunga kut thlâk lovin Philistia miten a chungah kut thlâk zâwk rawh se,” a ti rilru a ni.

¹⁸Tin, Davida chuan Saula hnênah, “Tu nge maw ka niha, ka nunna leh Israel-te zînga ka pa chhûngte pawh eng nge maw an niha, lal mâkpa ka han nihna tûr chu?” a ti a.

¹⁹Nimahsela, heti hi a ni a, Saula fanu Merabi chu Davida neihtîr a lo hun chuan, Meholath mi Adriela nupui atân a pe ta mai a.

²⁰Tin, Saula fanu Mikali chuan Davida chu a hmangaih a. Saula chu an hrilh a, chu chuan a tilâwm a.

²¹Tin, Saula chuan, “A awhna thang a lo nih theih nân leh, Philistia miten a chungah kut an thlâk theih nân ani hi ka pe teh ang,” a ti a. Chu vâng chuan Saula chuan Davida hnênah, “Vawiinah hian ka mâkpa i ni nawn leh ang,” a ti a.

²²Chutichuan, Saula chuan a chhiahhlawhte chu thu a pe a, “A rûk têin Davida bia ula, ‘Ngai teh, lal chu i chungah a lâwm hle mai a, a chhiahhlawh zawng zawng pawhin an hmangaih che a ni; chutichuan, lal mâkpaah awm ang che,’ ti rawh u,” a ti a.

²³Tin, Saula chhiahhlawhte chuan chûng thu chu Davida beng hriatah an sawi a. Tin, Davida chuan, “Mi rethei leh tu ma ngaihsân mang loh keini ang tân hian lal mâkpa han nih chu thil namênah in ngai em ni?” a ti a.

²⁴Tin, Saula chhiahhlawhte chuan, “Davida chuan chutiang chuan a ti a ni,” tiin an hrilh a.

²⁵Tin, Saula chuan, “Davida hnênah hetiang hian sawi ang che u, ‘Lal chuan lal hmêlma phuba lâk nân Philistia mite serh vun za tih loh chu man eng mah a duh lo ve, a ti,’ ti rawh u,” a ti a. Saula chuan Davida chu Philistia mite kuta thihtîr a rilrûk tlat a.

²⁶Tin, a chhiahhlawhten chûng thu chu Davida an han hrilh chuan, lal mâkpa a han ni tûr chu Davida chu a lâwm hle mai a. Tin, ni tiam te chu a la ral lo va;

²⁷tichuan, Davida leh a mite chu an tho va, Philistia mite chu zahnih an va that a. Tin, Davida chuan an serh vun a rawn hâwn a, lal mâkpa a nih theihna tûrin lal chu kim takin an pe a. Tichuan, Saula chuan a fanu Mikali chu nupuiah a neihtîr ta a.

²⁸Tin, Saula chuan Davida hnênah chuan Pathian a awm tih a hre chiang ta a; tin, Saula fanu Mikali chuan ani chu a hmangaih a.

²⁹Tichuan, Saula chuan Davida chu a hlau zual ta sauh mai a. Saula chu Davida hmêlma a ni ta kumkhua a.

³⁰Chutichuan, Philistia-ho mi liante chu an va thawk chhuak ṭhîn a. Tin, heti hi a ni a, an thawh chhuah apiangin Davida chu Saula chhiahhlawh zawng zawngte aia felin a che ṭhîn a; tichuan, a hming chu an chawisâng ta hle mai a.