Read Mizo_Old_version LEHKHABU PAKHATNA SAMUELA 19 Bible Online

LEHKHABU PAKHATNA SAMUELA 19 - Mizo_Old_version bible

LEHKHABU PAKHATNA SAMUELA 19

¹Chutichuan, Saula chuan a fapa Jonathana leh a chhiahhlawh zawng zawngte chu Davida that tûrin a ti a.

²Nimahsela, Saula fapa Jonathana chuan Davida chu a ngaina hle mai a. Tichuan, Jonathana chuan Davida chu, “Ka pa Saula hian thah a tum chia; chuvângin, naktuk zîngah chuan fîmkhur la, hmun biruah biru reng rawh khai.

³Tin, ka kal chhuak ang a, i awmna phûlah ka pa kiangah ka va ding ang a, i chungchâng thu-ah ka pa ka bia ang a. Tin, eng emaw ka hriat chuan ka hrilh ang che,” a ti a.

⁴Tin, Jonathana chuan a pa Saula hmaah chuan Davida chu a fak a, a hnênah, “Lal chuan a chhiahhlawh chungah, Davida chungah hian thil sual ti lul suh se, i chungah eng mah a tisual si lo va, a thiltihte chu i tâna ṭha tak a ni zâwk si a,

⁵Thih dâwn lovin Philistia mi kha a bei a; tin, LALPAN Israel-ho zawng zawng chhandamna ropui tak a thawh chhuahsak a. Chu chu nang pawhin i hmu a, i lâwm hle kha. Chuvângin, thisen pawi khawih lo chungah chuan engah tehlul nge thil i tihsual anga, a chhan eng mah awm lovin Davida chu i thah ang?” a ti a.

⁶Chutichuan, Saula chuan Jonathana thusawi chu a pawm a, Saula chuan chhechhamin, “LALPA nunna chhâlin ka sawi e, ani chu tihhlum tûr a ni tawp lo vang,” a ti a.

⁷Tin, Jonathana chuan Davida chu a ko va, Jonathana chuan chûng thil zawng zawng chu a hrilh a. Tin, Jonathana chuan Davida chu Saula hnênah chuan a hruai a, tûn hma lam ang bawk khân a hnênah a awm leh ta a.

⁸Tin, indona a lo awm leh a; tichuan, Davida chu a thawk chhuak a, Philistia mite chu a va bei a, a va that chiam a, a hmaah chuan an tlânchhia a.

⁹Tin, Saula chu a ina fei kenga a ṭhut laiin LALPA tirh ramhuai a chungah a lo thleng a; tin, Davida chuan ṭingṭang a tum a.

¹⁰Tin, Saula chuan a fei chuan Davida chu banga khawh beh tlat a tum a; nimahsela, Saula kiang ata chu a pût chhuak var a, fei chu bangah chuan a khawh bûr ta ngur mai a; tin, Davida chu a tlân chhuak a, chumi zân chuan a him ta a.

¹¹Tin, Saula chuan Davida in lamah zînga lo chânga that tûrin mi a tîr a; tin, Davida nupui Mikali chuan, “Zâninah hian i nun i humhim loh zawngin naktûkah an that dâwn che a ni,” tiin a hrilh a.

¹²Chutichuan, Mikali chuan Davida chu tukverhah a thlâk thla a; tichuan, a tlân bo va, a him ta a.

¹³Tin, Mikali chuan milem a la a, khumah chuan a muttîr a; tin, a lu atân kêl hmul a dah a, puanin a khuh a.

¹⁴Tin, Davida hruai tûra Saulan mi a rawn tirh chuan, “A damlo,” a lo ti a.

¹⁵Tin, Saula chuan Davida va en tûrin mi a tîr a, “A khum chawpin rawn zâwn chho ula, ka lo that ang e,” a ti a.

¹⁶Tin, a mi tirhte chu an va luh chuan ngai teh, khumah chuan milem chu a lu lama kêl hmul lukham khamin a lo awm a.

¹⁷Tin, Saula chuan Mikali hnênah, “Engati nge hetianga mi buma, a himna tûra ka hmêlma i chhuahtîr ni?” a ti a. Tin, Mikali chuan Saula chu a chhâng a, “Ka kaltîr loh chuan mi thah a tum alâwm maw le,” a ti a.

¹⁸Tichuan, Davida chu a tlân bo va, a him ta a, Rama khuaah Samuela hnên a va thleng a, a chunga Saula thiltih zawng zawng chu a hrilh a. Tin, amah leh Samuela chu an kal a, Naioth-ah an awm a.

¹⁹Tin, Saula chu, “Ngai teh, Davida chu Rama khuaa Naioth-ah a awm,” tiin an hrilh a.

²⁰Tichuan, Davida hruai tûrin Saula chuan mi a tîr a. Tin, zâwlnei pâwlho thusawi dual dual lai leh Samuela chu an chunga hotua awm an va hmuh chuan, Saula mi tirhte chungah chuan Pathian thlarau a lo thleng a, anni pawh chuan thu an sawi ve ta dual dual a.

²¹Tin, chu chu Saula an han hrilh chuan, mi dang a tîr leh a, anni pawh chuan thu an va sawi ve leh ta dual dual mai a. Tin, Saula chuan a vawi thumnaah chuan mi a tîr leh a, anni pawh chuan thu an va sawi ve leh ta dual dual mai a.

²²Chutichuan, amah pawh chu Rama khuaah chuan a kal ve ta a; tin, Seku hmuna tuichhunchhuah zau tak chu a va thleng a, “Samuela leh Davida hi khawiah nge an awm?” a ti a, a zâwt a. Tin, tu emaw hian, “Ngai teh, Rama khuaa Naioth-ah an awm,” a ti a.

²³Chutichuan, Rama khuaa Naioth-ah a kal a; tin, Pathian thlarau chu a chungah chuan a lo thleng ve ta a, a kal zêl a, Rama khuaa Naioth a thlen thlengin thu a sawi bual bual zêl a.

²⁴Tin, ani pawhin a silhfênte a hlîp ve a, Samuela hmaah chuan thu a sawi ve ta bual bual a, chumi nilêng leh chumi zankhua chuan ruakin a mu a. Chu vâng chuan, “Saula pawh chu zâwlnei zîngah a tel ve ta elo maw ni?” tih hi an chîng hlen ta.