Read Mizo_Old_version LEHKHABU PAKHATNA SAMUELA 20 Bible Online

LEHKHABU PAKHATNA SAMUELA 20 - Mizo_Old_version bible

LEHKHABU PAKHATNA SAMUELA 20

¹Chutichuan, Davida chu Rama khuaa Naioth ata chu a tlân a, Jonathana hnênah a kal a, “Eng nge maw ka tih le? Eng nge ni ka bawhchhiat? I pa chungah hian eng nge ka tihsuala, hetia mi thah a tum hi ni le?” a ti a.

²Tin, ani chuan, “That suh e a! I thi tawp lo vang! Ngai teh, ka pa chuan mi hriattîr lovin eng mah rêng rêng, lian se tê se a ti ngai lo va. Engah tehlul nge hêng thu hi ka lakah a zêp ang? A zêp tawp lo vang!” a ti a.

³Tin, Davida chuan, “I pa chuan i mi khawngaih dân hi a hre chiang hle mai si a; ‘Jonathana chuan hei chu hre kher suh se; chuti lo zawng, a lungngai dâwn êm mai e,’ a ti a ni ang. Amaherawhchu, LALPA nunna leh i nunna chhâlin ka sawi e, thihna nêna kan inkâr chu pên khat chauh a ni,” tiin a sawi uar leh a.

⁴Chutichuan, Jonathana chuan Davida hnênah, “I nunnain a duh apiang chu ka tihsak zêl ang che,” a ti a.

⁵Tin, Davida chuan Jonathana hnênah, “Ngai teh, naktûk hi thla thar a ni dâwn a, lal hnêna chawhlui kîl ngei tûr ka ni a; nimahsela, a ni thum ni tlai lam thlengin phûl lamah biru tûrin ka kal zâwk ang e.

⁶Tin, i pain ka awm loh hi lo hre chhuak ta a nih leh, ‘Davida chuan a khua Bethlehem-a va kal lawk mi dîl ngawih ngawih a; an chhûngkaw tâna an kum tin inthawi hun a ni e,’ lo ti la.

⁷Tin, ‘A ṭhat chu,’ a tih chuan i chhiahhlawh chu a thla a muang ang a; amaherawhchu, a thin a rim chuan thil ṭha lo tih a tum a ni tih hre mai ang che.

⁸Chuvângin, i chhiahhlawh hi ṭha takin ti ang che, i chhiahhlawh chu LALPA thuthlungah i luhpui tawh si a. Amaherawhchu, bawhchhiatna nei ka nih chuan nangman mi that mai rawh; eng atân nge i pa hnênah mi hruai kher kher ang?” a ti a.

⁹Tin, Jonathana chuan, “That suh e a! I chungah thil ṭha lo tih ka pan a tum tih ka hriat phawt chuan ka hrilh dâwn lo che em ni?” a ti a.

¹⁰Chutichuan, Davida chuan Jonathana hnênah, “I pain bung takin lo chhâng ta hlauh ang che sela tuin nge mi hrilh ang?” a ti a.

¹¹Tin, Jonathana chuan Davida hnênah, “Hawh teh, phûlah i va kal teh ang,” a ti a. Tichuan, phûlah chuan an va kal dûn ta a.

¹²Tin, Jonathana chuan Davida hnênah, “LALPA, Israel-te Pathian chu hretu ni rawh se; naktûk hetih hunah emaw, ni thum niah emaw ka pa ka han dâwp hunah, ngai teh, Davida chungchâng thu a ṭha lam a nih chuan a hnênah mi tîrin ka hrilh dâwn lo che em ni?

¹³Tin, ka pan i chungah ṭhil ṭha lo ti duh ta sela, ka hrilh loh chea, thlamuang taka i kal theih nâna ka thlah loh che chuan, Lalpan Jonathana chu a tih tihin ti sela, chu aia nasa pawhin. Tin, LALPA chu i hnênah awm rawh se, ka pa hnêna a awm ṭhîn angin.

¹⁴Tin, ka thih lohna tûra ka dam chhûng chauhva LALPA khawngaihna chu mi hmuhtîr ni lovin,

¹⁵kumkhuain ka chhûngte pawh i khawngaih bâng suh ang che; LALPAN Davida hmêlma lei chung ata a tihbo vek hnu thleng pawhin bâng suh ang che,” a ti a.

¹⁶Chutichuan, Jonathana chuan, “Davida hmêlmate lakah LALPAN a phût ang,” tiin Davida chhûngte hnênah thu a thlung a.

¹⁷Tin, Jonathana chuan amah a hmangaihna chhâlin Davida hnênah chhia a chham leh a; ama nunna a hmangaih ang chiahin a hmangaih si a.

¹⁸Chutichuan, Jonathana chuan a hnênah, “Naktûk hi thla thar a ni dâwn a; i ṭhuthmun a ruah dâwn avângin i awm loh a lang ngei dâwn a.

¹⁹Ni thum i awm hnu chuan chhuk thuai la, hmâna thil a lo awm laia i bihrûkna hmunah khân lo kal la, Ezel lung bulah chuan awm reng ang che.

²⁰Tin, inthemthiam ni âwm takin thal pathumin a sîrah ka rawn kâp ang a.

²¹Tin, ngai teh, ‘Kal la, thalte kha va zawng hmu rawh,’ tiin naupang ka tîr ang a. Naupang hnêna, ‘En teh, thalte chu i hnung lama kha a awm e, la la, lo kal rawh,’ ka tih chuan LALPA nunna chhâlin ka sawi e, i tân a muanawmin hlauh tûr a awm lo a ni ang a.

²²Amaherawhchu, naupang hnêna, ‘En teh, thalte chu i piah lama saw a awm e,’ ka tih chuan kal bo mai ang che; LALPA chuan a kal botîr che a ni ang.

²³Tin, nang leh keiin thil kan sawi tâk chungchang thu-ah chuan ngai teh, nang nêna kan kârah chuan LALPA chu a awm kumkhua a ni,” a ti a.

²⁴Chutichuan, Davida chu phûlah chuan a biru a; tin, thla a lo thar chuan lal chu chaw kîlin a ṭhu a.

²⁵Tin, lal chu ni danga a ṭhutna pângngai bang kianga a ṭhutnaah chuan a ṭhu a. Tin, Jonathana chu a ding a; tin, Abnera chu Saula kiangah a ṭhu a; Davida hmun erawh chu a ruak a.

²⁶Nimahsela, Saula chuan chumi ni chuan eng mah a sawi lo: “A chungah thil eng emaw a awm ang a, a thianghlim lo emaw a ni ang, a thianghlim lo a ni ngei ang,” a ti rilru a.

²⁷Tin, heti hi a ni a, thla thar tûk a ni hnih ni chuan Davida hmun chu a la ruak ta cheu va; tichuan, Saula chuan a fapa Jonathana hnênah chuan, “Engati nge Jesaia fapa hi niminah leh vawiinah chawhlui kîl tûra a lo kal loh?” a ti a.

²⁸Tin, Jonathana chuan Saula chu a chhâng a, “Davida chuan Bethlehem-a kal mi dîl ngawih ngawih a,

²⁹‘Mi kaltîr hrâm rawh khai, kan chhûngte chuan khuaah chuan inthawina an nei dâwn a, ka unau chuan awm ve tûrin mi chah tlat a; chutichuan, mi khawngaih theih chuan mi kaltîr la, ka unaute ka va tlawh ang e,’ a ti a. Chu vâng chuan lal dawhkânah chuan a lo kal lo a ni,” a ti a.

³⁰Chutichuan, Jonathana chungah chuan Saula thin chu a lo ur ta thut a, a hnênah, “Nang, hmeichhe kawhmawh leh luhlul fapa, Jesaia fapa chu i mualpho nân leh i nu saruakna timualpho tûrin i thlang tih ka hre lo vem ni tehlul?

³¹Jesaia fapa hi he leia a awm chhûng zawng tihngheh i ni lo vang, i ram pawh. Chuvângin, kohtîr nghâl la, ka hnênah han hruaitîr rawh, a thi ngei tûr a ni,” a ti a.

³²Tin, Jonathanan a pa Saula chu a chhâng a, a hnênah, “Engah nge maw tihhlum tûr a nih ang le? Eng nge a tih?” a ti a.

³³Tin, Saula chuan khawh tumin a fei chu a han lek a; chumi avâng chuan Jonathana chuan a pan Davida chu thah a lo tum ngei a ni tih a hre ta a.

³⁴Chutichuan, Jonathana chu dawhkân ata chu thinrim takin a tho va, chumi thla ni hnih ni chuan chaw a kîl ve ta lo va; a pa chuan Davida a tihmualpho êm avângin a lungngaihpui a ni.

³⁵Tin, heti hi a ni a, zîngah chuan Jonathana chu naupang tê hruaiin phûl lamah Davida nêna an hmun ruatah chuan a kal ta a.

³⁶Tin, a naupang hnênah chuan, “Tlân la, ka thal kahte hi va zawng rawh khai,” a ti a. Tin, naupang chu a tlân lai chuan, a piah lamah chuan thal a kâp a.

³⁷Tin, naupang chuan Jonathana thal kah tlâkna hmun a va thlen chuan Jonathana chuan naupang chu a au va, “Thal chu i piah lama saw a ni lâwm ni?” a ti a.

³⁸Tin, Jonathana chuan naupang chu a au va, “Lo tlân thuai rawh, hmanhmawh rawh, muang suh,” a han ti a. Tin, Jonathana naupang chuan thal chu a chhar khâwm a, a pu hnên lamah chuan a kal ta a.

³⁹Nimahsela, naupang chuan eng mah a hre lo va, Jonathana leh Davida chauh chuan thil awmzia chu an hria a.

⁴⁰Tin, Jonathana chuan a naupang chu a hriamhrei chu a pe a, a hnênah, “Kal ta la, khuaah lo han hawpui teh ta,” a ti a.

⁴¹Tin, naupang chu a kal tâk veleh Davida chu a awmhmun chhim lampang ata chu a lo tho va, hmaia lei siin chibai vawi thum a bûk a; tin, an infâwp a, an ṭap dûn a, Davida chu a zualkai bîk a.

⁴²Tin, Jonathana chuan Davida hnênah, “Thlamuang takin kal rawh aw, ‘LALPA chu nang nêna kan kârah leh ka thlahte leh i thlahte kârah kumkhuain awm rawh se,’ tia LALPA hminga chhia kan chham dun tawh kha,” a ti a. Tichuan, a tho va, a kal ta a; tin, Jonathana chu khuaah chuan a lût ta a.