Read Mizo_Old_version LEHKHABU PAKHATNA SAMUELA 21 Bible Online

LEHKHABU PAKHATNA SAMUELA 21 - Mizo_Old_version bible

LEHKHABU PAKHATNA SAMUELA 21

¹Chutichuan, Davida chu Nob khuaah puithiam Ahimeleka hnênah chuan a kal a. Tin, Ahimeleka chuan khûr chungin Davida chu a lo hmuak a, a hnênah, “Engtizia nge i va mal ve, tu mah kalpui i neih loh?” a ti a.

²Tin, Davida chuan puithiam Ahimeleka hnênah chuan, “Lalin thil ti tûrin thu mi pe a, ka hnênah, ‘Ka thil tihtîr tum rêng rêng che leh ka thupêk che hi tu mahin hre suh se,’ a ti tlat a; tin, tlangvâlhote lo awmna tûr hmunte chu ka ruat a.

³Chutichuan, engte nge i kutah awm le? Chhang hlâwm nga min pe la, a nih loh leh i neih ang apiang pawh,” a ti a.

⁴Tin, puithiam chuan Davida chu a chhâng a, “Chhang narân chu ka nei lo va; chhang thianghlim erawh chu ka nei a, tlangvâlte chu hmeichhe laka an inthiarfihlîm phawt chuan,” a ti a.

⁵Tin, Davida chuan puithiam chu a chhâng a, a hnênah, “Tûn ni thum chhûng chu hmeichhe lakah rêng rêng chuan kan inthiarfihlîm vek takzet a ni; ka lo chhuah dâwn lai pawh khân tlangvâlte bungbêl chu a thianghlim a ni, khawiilova kal narân mai tûr kan ni nain; vawiin lek phei chuan an bungbêl chu a va thianghlim lehzual dâwn em!” a ti a.

⁶Chutichuan, puithiam chuan chhang thianghlim chu a pe ta a; chutah chuan chhangdah an lâk nia chhang luma thlâk tûra LALPA hma ata an lâka chauh lo chu chhang dang a awm si lo va.

⁷Tin, chumi ni chuan Saula chhiahhlawh zînga mi pakhat LALPA hmaa hrên a awm a; a hming chu Doega a ni a, Edom mi, Saula ran vêngtu zînga hotu ber a ni a.

⁸Tin, Davida chuan Ahimeleka hnênah chuan, “Fei emaw, khandaih emaw i kawl lo maw? Lal hnaah chuan hmanhmawh a ṭul avângin ka khandaih leh ka hriamhrei a enga mah ka rawn keng hman lo a ni,” a ti a.

⁹Tin, puithiam chuan, “Philistia mi Goliatha, Ela ruama i thaha khandaih chu ngai teh, puithiam kawr phênah hian puana tuamin a awm reng mai. Chumi chu i lâk duh chuan la rawh; chu chauh lo chu a dang a awm lo,” a ti a. Tin, Davida chuan, “Chu lo liam; min pe rawh khai,” a ti a.

¹⁰Chutichuan, Davida chu a tho va, chumi ni chuan Saula hlauvin a tlân bo va, Gath lal Akisa hnênah a kal ta a.

¹¹Tin, Akisa chhiahhlawhte chuan a hnênah, “He mi hi an ram lal Davida a ni lâwm ni kha? ‘Saulan a sânga sâng a that, Davidan a sînga sîng,’ tia lâm chungin a chungchâng thu hlain an sa dur dur a ni lâwm ni kha?” an ti a.

¹²Tin, Davida chuan chûng thute chu a rilruah a pai ta a, Gath lal Akisa chu a hlau ta hle mai a.

¹³Chutichuan, a hmaah chuan a awm dân a tidanglam a, an mit hmuhah chuan a â der ta chiam mai a, kawngkhârte chu a ham vak vak a, a khabe hmulahte chuan a chil a tiluang duah duah ta mai a.

¹⁴Chutichuan, Akisa chuan a chhiahhlawhte hnênah chuan, “En teh u, mi â a nih in hre reng si a, engati nge ka hnênah in rawn hruai ni?

¹⁵Mi â ka tlâkchham vângin em ni he mi hi a âtzia tilang tûra ka hmaa in rawn hruai ni? He mi hi ka inah a lo lût tehlul ang maw?” a ti a.