Read Mizo_Old_version LEHKHABU PAKHATNA SAMUELA 22 Bible Online

LEHKHABU PAKHATNA SAMUELA 22 - Mizo_Old_version bible

LEHKHABU PAKHATNA SAMUELA 22

¹Chutichuan, Davida chu chuta ta chu a chhuak a, Adulam pûkah a tlân ta a; tin, a unaute leh a pate chhûngkua zawng zawngin an lo hriat chuan chutah chuan a hnênah an zuk kal a.

²Tin, mangang apiang te, leibat nei apiang te, lungnih lohna nei apiangte a hnênah chuan an kal khâwm a; tichuan, an hotuah a awm ta a; tin, a hnênah chuan mi zali emaw lai an awm ta a.

³Tin, Davida chu chuta ta chu Moab rama Mizpe-ah a kal a; Moab lal hnênah chuan, “Pathianin thil min tihsak tûr ka hriat hma loh chu ka nu leh ka pate i hnênah lo awm rawh se aw,” a ti a.

⁴Tin, Moab lal hmaah chuan a hruai a; tichuan, Davida chu kulhbîngah a awm chhûng zawng chuan a hnênah an awm a.

⁵Tin, zâwlnei Gada chuan Davida hnênah, “Kulhbîngah chuan awm reng suh; chhuak la, Judai ramah kal rawh,” a ti a. Chutichuan, Davida chu a chhuak a, Hereth ngawah chuan a lût ta a.

⁶Tin, Saula chuan Davida leh a hnêna awmte chu an hmu ta tih a lo hria a. Saula chu Gibea-ah Rama khuaah tamarisk thing hnuaiah a fei kengin a ṭhu a; tin, a vêlah chuan a chhiahhlawh zawng zawngte chu an ding a.

⁷Tin, Saula chuan a kiang vêla ding a chhiahhlawhte hnênah chuan, “Nangni Benjamin mite u, ngaithla rawh u; Jesaia fapa chuan lote leh grêp huante a pe ṭheuh dâwn che uin, a sipai sâng hotuah te, a sipai za hotuahte a siam vek dâwn che u em ni?

⁸In zain mi phiara, ka fapain Jesaia fapa hnêna thu a thlun ka hnêna tilang rêng rêng in awm lohva, ka fapain ka chhiahhlawh hi mi do tûr leh vawiin ni te pawha mi châng tûra a fuih thu ka hnêna tilang in awm loh ni?” a ti a.

⁹Chutichuan, Saula chhiahhlawhte kianga ding Edom mi Doega chuan a chhâng a, “Jesaia fapa chu Nob khuaah, Ahituba fapa Ahimeleka hnêna lo kal ka hmu a.

¹⁰Tin, ani chuan LALPA a râwnsak a, ei tûr a pe a; tin, Philistia mi Goliatha khandaih a pe bawk,” a ti a.

¹¹Chutichuan, lal chuan Ahituba fapa puithiam Ahimeleka leh a pa chhûngkua, Nob khuaa puithiam awm zawng zawngte chu a kohtîr a.

¹²Tin, Saula chuan, “Nang, Ahituba fapa, lo ngaithla rawh,” a ti a. Tin, ani chuan, “Ka pu, heta hi ka awm e,” a ti a.

¹³Tin, Saulan a hnênah, “Chhang leh khandaihte lo pea LALPA te râwnsakin, vawiin nia a tih anga mi do tûr leh mi châng tûra engati nge nangmah leh Jesaia fapa hian mi phiar vêl ni?” a ti a.

¹⁴Chutichuan, Ahimeleka chuan lal chu a chhâng a, “Lal mâkpa, i mi râwn ber ṭhin, in chhûngkuaa mi zahawm Davida ang rêng rênga mi rinawm hi i chhiahhlawh zawng zawngte zîngah tu nge awm?

¹⁵Vawiin hi Pathian ka biakrâwnsak ṭan ni em ni? A ni lo. Lal chuan a chhiahhlawh emaw, ka pa chhûngkuate rêng rêng emaw min puh lul suh se; i chhiahhlawh hian hêng thu zawng zawng hi a enga mah ka hre lo a ni,” a ti a.

¹⁶Tin, lal chuan, “Ahimelek, i thi ngei ngei tûr a ni, nang leh i pa chhûngkua zawng zawngte nên,” a ti a.

¹⁷Tin, lal chuan a kianga ding sipaite hnênah chuan, “Lehhawi ula, LALPA puithiamho hi that rawh u, Davida lamah an ṭang a, a tlân bo tih hre reng sia ka hnêna an sawi loh avângin,” a ti a. Nimahsela, lal chhiahhlawhte chuan LALPA puithiamte bei tûrin kut an lek duh lo va.

¹⁸Tin, lal chuan Doega hnênah chuan, “Nang lehhawi la, puithiamte hi bei rawh,” a ti a. Tin, Edom mi Doega chu a lehhawi a, puithiamte chu a bei a, chumi ni chuan puanzaisîn sin puithiam kawr ha, mi sawmriat leh panga a that a.

¹⁹Tin, Nob, puithiam khua chu khandaihin a bei a; a hmei a pain naupang leh hnute hne laite lamin, bâwng te, sabengtung te, berâmte nên khandaihin a sât hlum a.

²⁰Tin, Ahituba fapa Ahimeleka fapate zînga pakhat, a hming Abiathara chu a tlân chhuak a, Davida hnênah a tlân a.

²¹Tin, Abiathara chuan Saulan LALPA puithiamte a thah thu chu Davida a hrilh a.

²²Tin, Davida chuan Abiathara hnênah chuan, “Edom mi Doega chuta a awm ni ngei khân Saula a hrilh ngei ngei ang tih ka hre sa reng a ni; i pa chhûngkua zawng zawngte chu keimah avânga thi an ni a.

²³Nang chu ka hnênah awm la, hlau suh; kei mi thah tum chuan nang pawh thah an tum ang che; ka hnêna i awm erawh chuan i him ang,” a ti a.