Read Mizo_Old_version LEHKHABU PAKHATNA SAMUELA 24 Bible Online

LEHKHABU PAKHATNA SAMUELA 24 - Mizo_Old_version bible

LEHKHABU PAKHATNA SAMUELA 24

¹Tin, heti hi a ni a, Saula Philistia mite a va ûm lo haw chu, “Ngai teh, Davida chu En-gedi thlalêrah a awm e,” tiin an hrilh a.

²Chutichuan, Saula chuan Israel mi zawng zawngte zîng ata thlan ṭhiau mi sângthum a hruai a, sathârte chênna lungpui zîng lamah chuan Davida leh a mite zawngin an kal ta a.

³Kawnglakah chuan berâm huang, pûk awmna hi a va thleng a; tin, Saula chu inthiarfihlîm tûrin a va lût a. Davida leh a mite chu pûk chhûngril lamahte chuan an awm a.

⁴Davida mite chuan a hnênah, “Ngai teh, LALPAN i hnênah, ‘Ngai teh, i hmêlma chu i kutah ka pe ang a, a chungah ṭha i tih ang angin ti ang che,’ a tih ni kha a nih tâk hi,” an ti a. Chutichuan, Davida chu a tho va, a rûk têin Saula puan fêm chu a va hlep a.

⁵Nakinah chuan Saula puan fêm a va hleh chuan Davida rilru chu a chhun ta hle a.

⁶A mite hnênah chuan, “LALPA hriak thih a ni tih hre reng chung sia, a chunga kut thawha LALPA hriak thih ka lalpa chunga he thil ka tih hi a âwm lo tawp mai,” a ti a.

⁷Chutichuan, Davidan chûng thu chuan a mite chu a khap bet a, Saula bei tûra an thawh chu a phal ta lo va. Tin, Saula chu pûk ata chu a chhuak a, a kal leh ta a.

⁸A hnu lawkah chuan Davida pawh chu a tho va, pûk ata chu a chhuak a, “Lalpa, ka lalpa,” tiin Saula chu a au zui a. Tin, Saula a han lehhawi chuan Davida chuan a hmaia lei siin chibai a bûk a.

⁹Tin, Davida chuan Saula hnênah, “Ngai teh, ‘Davidan i chhiatna a zawng a ni,’ tia miten i hnêna an sawi chu engah nge i âwih ṭhin?

¹⁰Ngai teh, vawiinah hian LALPAN pûkah hian ka kuta a hlanzia che hi i mit ngeiin i hmu a; ṭhenkhat chuan tihlum tûr chein min nawr a; nimahsela, ka zuah chia; ‘Ka LALPA hriak thih a ni si a,’ ka ti a.

¹¹Chu chauh pawh ni lovin, ka pa, en teh, hei i puan fêm pawh ka ken reng hi! I puan fêm ka hleh theih sia, ka tihhlum loh cheah hian ka kutah hian thil ṭha lo leh bawhchhiatna a awm lo tih leh, ka nunna lâk tumin mi zawng mi zawng mah la, i chungah ka sual lo tih hre ngei ngei rawh khai.

¹²LALPAN nang nêna kan chungthu hi rêl sela; tin, LALPA chuan i lakah phuba mi lâksak rawh se; mahse, kei chuan i chungah kut ka thlâk lo rêng rêng ang.

¹³Hmânlai thufingin, ‘Mi sual aṭangin sual a lo chhuak ṭhîn a,’ a ti a; nimahsela, i chungah kut ka thlâk lo vang.

¹⁴Israel lal chu tu zawngin nge a lo chhuah? Tu nge i ûm? Ui thisâwn, uihli lek.

¹⁵Chuvângin, LALPA chu rorêltu ni sela, nang nêna kan chungthu hi titlu sela, mi ngaihtuahsakin mi sawipui sela, i kut ata mi chhanchhuak rawh se,” a ti a.

¹⁶Tin, heti hi a ni a, Davidan Saula hnênah hêng thu hi a sawi zawh chuan Saula chuan, “I aw elo ni, ka fapa Davida?” a ti a. Tin, Saula chu aw chhuah meuhvin a ṭap ta a.

¹⁷Tin, Davida hnênah chuan, “Kei ai chuan i fel zâwk êm êm a ni; nang zawngin ka chungah thil ṭha i ti a, kei erawh chuan thil ṭha lo ka ti a ni.

¹⁸Tin, vawiinah hian ka chungah thil ṭha i tihzia i tilang a ni; LALPAN i kuta mi pêk pawha mi tihhlum lohvah hian.

¹⁹Miin a hmêlma hmu ang sela, him takin a chhuah duh ang em? Chuvângin, vawiina ka chunga i thiltihah hian LALPAN thil ṭhain rûl che rawh se.

²⁰Ngai teh, lal i la ni ngei dâwn a ni tih ka hre ta e.

²¹Chuvângin, ka hnua ka thlah lo awm tûrte chu tiboral lo tûr leh, ka pa chhûngkaw zîng ata ka hming tibo lo tûrin LALPA hmingin ka hnênah chhia chham rawh khai,” a ti a.

²²Chutichuan, Davida chuan Saula hnênah chhia a chham ta a. Tin, Saula chu a haw ta a; Davida leh a mite erawh chu kulhbîngah chuan an chho va.