Read Mizo_Old_version LEHKHABU PAKHATNA SAMUELA 25 Bible Online

LEHKHABU PAKHATNA SAMUELA 25 - Mizo_Old_version bible

LEHKHABU PAKHATNA SAMUELA 25

¹Tin, Samuela chu a thi ta a; tin, Israel mi zawng zawngte chu an inko khâwm a, an ṭah a. Rama khuaa a inah chuan an phûm ta a. Tin, Davida chu a tho va, Paran thlalêrah a chhuk a.

²Maon khuaah chuan mi pakhat a awm a, a khawsakna chu Karmel tlângah a ni; mi ropui tak a ni a, berâm sângthum leh kêl sâng a nei a; Karmel tlângah chuan a berâm hmul a mêt a.

³Chu mi hming chu Nabala a ni a, a nupuia hming chu Abigaili a ni. Chu hmeichhia chu bengvâr tak, hmêlṭha tak a ni a; a mipa erawh chu mi tawhkhirh tak leh sual tak a ni a, Kaleba thlah a ni.

⁴Tin, Davidan thlalêr aṭang chuan Nabalan a berâm hmul a mêt tih a lo hria a.

⁵Tichuan, Davida chuan tlangvâl sâwm a tîr a, tlangvâlte hnênah chuan Davidan, “Karmel tlângah han chho ula, Nabala hnênah han kal ula, ka hmingin chibai han bûk ang che u.

⁶Tin, mi neinung taka hnênah chuan heti hian han sawi ang che u, ‘I chungah te, i chhûngkuate chungah te, i neih zawng zawng chungah te thlamuanna awm rawh se.

⁷I berâm hmul i mêt tih ka lo hria a. I berâm vêngtute chu kan hnênah an awm ṭhîn a, an pawi eng mah kan khawih lo va, Karmel tlânga an awm chhûng rêng rêngin an eng mah an chân lo va.

⁸I tlangvâlte zâwt la, an hrilh mai ang che. Chutichuan, tlangvâlte hi lo khawngaih ang che, ruaiṭheh ni takin kan lo thleng a nih hi. I neih ang ang chu i chhiahhlawhte leh i fapa Davida hi lo pe teh ang che, a ti e,’ va ti rawh u,” a ti a.

⁹Tin, Davida tlangvâlte chu an va thlen chuan, Davida hmingin chûng thu zawng zawng chu Nabala hnênah chuan an sawi a, an ngawihsan ta a.

¹⁰Tin, Nabala chuan Davida chhiahhlawhte chu a chhâng a, “Davida chu tu nge maw ni le? Jesaia fapa chu tu nge maw ni le? Tûnlai hian chhiahhlawh, pute tlân bosan hmang an tam mai a.

¹¹Ka chhang te, ka tui te leh ka berâm hmul mêttute tâna sa ka talh te chu tute nge an nih pawh hriat hleih lohte ka pe tehlul ang maw?” a ti a.

¹²Chutichuan, Davida tlangvâlte chu an lêt a, an kîr leh a; chûng thu zawng zawng chu an hrilh a.

¹³Tin, Davida chuan a mite hnênah chuan, “In khandaih pai ṭheuh rawh u,” a ti a. Tin, an khandaih an pai ṭheuh va, Davida pawhin a khandaih a pai a. Mi zali laiin Davida chu an zui chho va; tin, mi zahnih chu bungraw vêngin an awm a.

¹⁴Tin, tlangvâl pakhat chuan Nabala nupui Abigaili hnênah chuan, “Ngai teh, Davida chuan thlalêr aṭangin kan pu chibai bûk tûrin mi a rawn tîr a, ani chuan a lo hau va.

¹⁵Nimahsela, chung mite chu kan chungah an ṭha hle mai a, kan pawi eng mah an khawih lo va, phûla kan awm laia kan awm ho chhûng zawng zawng khân eng mah kan hloh lo va;

¹⁶berâm vênga an hnêna kan awm chhûng zawng zawngin chhûn leh zân kan tân kulh an ni ngawt mai a.

¹⁷Chuvângin, eng nge i tih dâwn ngun takin ngaihtuah teh khai; kan pu chungah leh a chhûngkua zawng zawngte chungah hian thil ṭha lo tih tum an awm a ni. Ani lah hi a Beliala fapa khawp a, tu ma biak theih loh a ni si a,” tiin a sawi a.

¹⁸Tin, Abigaili chuan hmanhmawh takin chhang hlâwm zahnih nên, berâm panga chhum tûra peih diam nên, vai bûk nga nên, grêp rah pho ro bâwr za nên, theipui hlâwm zahnih nên a la khâwm a, sabengtung a phurhtîr a.

¹⁹Tin, a chhiahhlawh tlangvâlte hnênah chuan, “Ka hmaah lo kal ta zêl ula, ngai teh u, ka rawn zui ang che u,” a ti a. Nimahsela, a pasal Nabala chu a hrilh lo.

²⁰Tichuan, chutiang chu a ni a, a sabengtung chungah chuan a chuang a, leisekawtah a chhuk laiin, ngai teh, Davida leh a mite chuan an rawn pan a; tichuan, an intâwk ta a.

²¹Davida chuan, “A eng mah a hloh loh nân thlalêrah he pa neih zawng zawngte hi a thlâwn mai maiin ka vênsak a lo nih ngei hi le; thil ṭha chu thil ṭha lovin mi thungrûl ta mai si a.

²²Naktûk zîng khaw ên thlenga a ta zawng zawng zînga mipa naupang pakhat chauh pawh ka zuah vaih chuan, Pathianin Davida hmêlmate chu a tih tihin ti rawh se, chu aia nasa pawhin ti rawh se,” a ti tawh si a.

²³Tin, Abigaili chuan Davida a hmuh chuan a sabengtung ata chu a chhuk thuai a, Davida hmaah chuan a hmaia lei siin chibai a bûk a.

²⁴Tin, a ke bulah chuan a bawkkhup a, “Keiman, ka pu, keimah ngeiin khawlohna chu ka hlawh mai ang e. Tin, i chhiahhlawhnu hian i beng hriatah thu sawi sela, i chhiahhlawhnu thusawi chu khawngaih takin ngaihthlâksak ang che.

²⁵Ka pu, Beliala mi Nabala chu engah mah ngai suh khai. A hming ang chiah chiah hi a ni a, Nabala tih takah a â a nih hi. Kei i chhiahhlawhnu hi zawngin ka pu tlangvâl rawn tirhte chu ka lo hmu lo a ni.

²⁶Chuvângin, tûnah hian ka pu, LALPA nunna leh i nunna chhâlin ka sawi e, LALPAN thisen chhuah lo tûr leh i kuta phuba la lo tûrin a siam si chia, i hmêlmate leh ka pu ṭhat lohna zawngtute chu Nabala ang ni mai rawh se.

²⁷Tin, hei ka pu tâna i chhiahhlawhin lâwmman ka rawn ken hi ka pu rawn zuitu tlangvâlte hi pêk ni rawh se.

²⁸I chhiahhlawhnu sualna hi khawngaih takin ngaidam ang che. LALPA chuan ka pu chu chhûngkaw nghet tak a dinsak ngei ngei ang a, ka pu chuan LALPA indonaahte a dopui si a; i dam chhûng zawngin nangmahah chuan sualna rêng rêng hmuh tûr a awm lo vang.

²⁹Nangmah ûm tûr leh i nunna tibo tûrin mite lo thawk mah sela, ka pu nunna chu LALPA i Pathian nêna nunna têl zinga têl a ni ang a; i hmêlmate nunna erawh chu virvawm phana vawm ang daihin a vawm bo vang.

³⁰Tin, heti hi a ni ang a, LALPAN i chungchâng thua a thil ṭha tiam ang zawng zawng ka pu chungah a tih huna Israel-te lala a siam hun che chuan,

³¹a chhan awm lova thisen i chhuah lohva, ka pu chuan phuba i lâk hek loh hi i tân lungngaihna rêng rêng a ni lo vang a, ka pu tân lungnih lohna rêng rêng a ni hek lo vang. Tin, LALPAN ka pu chunga thil ṭha a tih hunah chuan i chhiahhlawhnu hi hre reng ang che,” a ti a.

³²Tin, Davida chuan Abigaili hnênah chuan, “Vawiina mi lo hmuak tûra tîrtu che LALPA, Israel-te Pathian chu fakin awm rawh se.

³³Tin, i remhriatna chu malsâwmin awm sela; tin, nang, thisen chhuah thiam loh channa laka mi humtu leh, keima kuta phuba la lova mi siamtu chu malsâwmin awm bawk ang che.

³⁴Nang chuan mi lo hmuak thuai suh la chuan, LALPA, Israel-te Pathian nunna chhâlin ka sawi e, naktûk khaw ên thleng chuan Nabala chu naupang pakhat chauh pawh ka zuahsak lo tawp ang,” a ti a.

³⁵Chutichuan, Davida chuan a thil rawn kensakte chu a la a; tin, a hnênah chuan, “Thlamuang takin i in lamah haw chho ta la; tin, i thu chu ka awih a, i dîl chu ka pawmsak a che aw,” a ti a.

³⁶Tin, Abigaili chu Nabala hnênah a han kal a; tin, ngai teh, a inah chuan lal ruai ṭheh ang maiin ruai a lo ṭheh a. A ruih hle avângin Nabala chu a hlim huam mai a; chuvângin, a tûk khaw ên hma loh chuan eng mah a hrilh lo va.

³⁷Tin, heti hi a ni a, zîng lama Nabala uain rui chu a lo harh chuan a nupui chuan chûng thu chu a han hrilh a, a rilru a mit ta sulh a, lung ang maiin a lo awm ta a.

³⁸Tin, heti hi a ni a, ni sâwm hnuah chuan LALPAN Nabala chungah kut a thlâk a, a thi ta a.

³⁹Tin, Davidan Nabala chu a thi tih a han hriat chuan, “Ka hmingchhiatna tûra Nabala thiltih laka mi sawipuia, a chhiahhlawh thil ṭha lo ti lova mi khaptu LALPA chu fakin awm rawh se. Nabala thil ṭha lo tih chu LALPAN ama chung ngeiah a tlâktîr ta a ni,” a ti a. Tin, Davida chuan Abigaili chu a nupui atâna va be tûrin mi a tîr a.

⁴⁰Davida chhiahhlawhte chuan Karmel tlânga Abigaili hnên an han thlen chuan, “Davida chuan a nupui atâna hruai tûr chein min tîr a ni,” tiin ani chu an bia a.

⁴¹Tin, a tho va, a hmaia lei siin chibai a bûk a, “Ngai teh u, in chhiahhlawhnu hi ka pu chhiahhlawhte ke sil tûra chhiahhlawh ka ni e,” a ti a.

⁴²Tichuan, Abigaili chu a tho thuai a, sabengtung chungah a chuang a, a hnungzui nula pangate nên chuan Davida mi tirhte chu an zui a, a nupuiah a awm ta a.

⁴³Davida chuan Jezreel-a mi Ahinoami a lo nei tawh bawk a; tichuan, a nupuiah an awm ta ve ve a.

⁴⁴Saula chuan a fanu Mikali, Davida nupui kha Galim khuaa mi Laisa fapa Paltia a lo neihtîr tawh a ni.