Read Mizo_Old_version LEHKHABU PAKHATNA SAMUELA 26 Bible Online

LEHKHABU PAKHATNA SAMUELA 26 - Mizo_Old_version bible

LEHKHABU PAKHATNA SAMUELA 26

¹Tin, Ziph-ho chu Gibea-ah Saula hnênah an kal a, “Davida chu thlalêr dep Hakila tlângah chuan a biru a ni lâwm ni?” tiin an va sawi a.

²Chutichuan, Saula chu a tho va, Ziph thlalêrah chuan Israel mite zîng ata thlan ṭhiau mi sângthum hruaiin Ziph thlalêrah Davida zawng tûrin a zuk kal ta a.

³Tin, Saula chuan thlalêr dep, kawnglakah Hakila tlângah chuan ṭanhmun a khuar a. Davida erawh chu thlalêrah chuan a awm reng a; tin, Saula chu amah zawngin thlalêrah a lo kal tih a hria a.

⁴Chuvângin, Davida chuan enthlatute a tîr a, Saula chu a lo kal tak tak a ni tih a hre chiang ta a.

⁵Chutichuan, Davida chu a tho va, Saula ṭanhmun khuarnaah chuan a kal a. Tin, Davida chuan Saula leh a sipai hotu, Nera fapa Abnera mutna chu a hmu a. Saula chu tawlailîr hual chhûngah a mu a, a vêlin mite chuan awmhmun an rem a.

⁶Chutichuan, Davida chuan Hit mi Ahimeleka leh Joaba unau, Zeruii fapa Abisaia hnênah, “Saula ṭanhmunah chuan tu nge ka hnênah kal ve ang?” tiin a sawi a. Tin, Abisaia chuan, “Keimah i hnênah chuan ka zuk kal ve ang e,” a ti a.

⁷Tichuan, Davida leh Abisaia chu mipuiho awmnaah zânah chuan an kal a; tin, ngai teh, Saula chu tawlailîr hual chhûngah chuan a lo mu a, a lu lamah chuan a fei chu leiah a vit bûr a. Tin, Abnera leh mite chu a vêlah chuan an lo mu a.

⁸Chutichuan, Abisaia chuan Davida hnênah, “Vawiinah hian Pathianin i hmêlma chu i kutah a pe che a nih hi; chuvângin, fei hian vawi khatah leiah hian ka han chhun bet tlat mai teh ang aw? Ka chhun nawn leh tawh lo vang,” a ti a.

⁹Nimahsela, Davida chuan Abisaia hnênah, “Tiboral suh; LALPA hriak thih chunga kut thlâka thiam chang thei tu nge awm thei ngai?” a ti a.

¹⁰Tin, Davida vêk chuan, “LALPA nunna chhâlin ka sawi e, LALPA chuan a chungah kut a thlâk ang chu; a nih loh vêk leh a thih ni a lo la thleng mai ang a; a nih loh vêk leh indonaah a kal ang a, a boral mai ang.

¹¹LALPA hriak thiha chungah chuan kut ka thlâk loh tûrzia mai chu. A lu bula fei leh tuithâwl erawh hi chu la ila; tichuan, i kal ang,” a ti a.

¹²Chutichuan, Davida chuan Saula lu bula fei leh tuithâwl chu a la a, an kal leh ta a; tu mân an hmu lo va, tu mân an hriain harh an awm hek lo. LALPAN tui taka a muthilhtîr avângin an muhîl vek a ni.

¹³Chutichuan, Davida chu râl lehlamah chuan a kal a, hla feah tlâng chhîpah a ding a; an inkâr chu hla tak a ni a.

¹⁴Tin, Davida chuan mipuite leh Nera fapa Abnera chu, “Abner, mi han chhâng dâwn lâwm ni?” tiin a au va. Chutichuan, Abnera chuan a chhâng a, “Lal han au veitu chu tu nge maw i nih le?” a ti a.

¹⁵Tin, Davida chuan Abnera hnênah, “Mi huaisen i ni lâwm ni? Israel-te zîngah hian nang ang tu nge awm? Engtizia nge lal i pu i vên loh ni? Lal i pu chu tiboral tûrin tu emaw a lo kal kha le.

¹⁶I thiltih dân hi a ṭha lo a ni. LALPA nunna chhâlin ka sawi e, LALPA hriak thih i pu chu i vên ṭhat loh avângin thi mai tlâk i ni e. Lal lu bula fei leh tuithâwl kha khawiah nge a awm tâk han en teh rêng,” a ti a.

¹⁷Tin, Saula chuan Davida aw chu a han hria a, “Chu i aw elo ni, ka fapa Davida?” a han ti a. Tin, Davida chuan, “Aw lalpa, ka pu, ka aw a ni e,” a ti a.

¹⁸Tin, “Eng vângin nge ka pu hian a chhiahhlawh hi a ûm ni? Eng thil nge ka tih? Ka kutah thil sual eng nge awm?

¹⁹Chuvângin, lalpa, ka pu chuan a chhiahhlawh thu hi ngaithla teh se: mi do tûra i thinlung chawk thotu chu LALPA a nih chuan thilhlan chu lo pawm sela; mihring fate an nih erawh chuan LALPA hmaa ânchhe dawngin awm rawh se, ‘Kal la, pathian dangte rawng bâwl rawh,’ tia, LALPA ro ka luah theih lohna tûra vawiin hian min hnawt bo an ni si a.

²⁰Chuvângin, ka thisen chu LALPA hmuh phâk lohvah leilungah luang suh se. Varung veh tûra tlângahte mi a ramvâk angin Israel lal chu uihli lek zawng tûrin a kal chhuak a nih hi,” a ti a.

²¹Chutichuan, Saula chuan, “Thil ka lo tisual dêr mai a ni. Ka fapa Davida, lo haw leh rawh. I mit hmuhah ka nunna hi vawiinah hian a hlut êm avângin eng mah rêng rêng ka tih tawh hauh lo vang che. Ngai teh, thil âtthlâk tak ka lo ti ta a, ka lo tisual dêr mai a nih hi,” a ti a.

²²Tin, Davida chuan a chhâng a, “Aw lalpa, fei hi han en teh, tlangvâl pakhat lo kal sela, han la rawh se.

²³Tin, LALPA chuan mi tin an fel leh an rinawm man a pe dâwn a; vawiinah hian LALPAN nang hi ka kutah min pe na a, LALPA hriak thih chungah ka kut ka lek duh lo a ni.

²⁴Tin, ngai teh, vawiina i nunna ka ngaihhlutsak che ang bawk hian LALPA chuan ka nunna hi mi ngaihhlutsak sela, manganna zawng zawng ata hi mi chhanchhuak rawh se,” a ti a.

²⁵Chutichuan, Saula chuan Davida hnênah, “Ka fapa Davida, malsâwmin awm rawh khai. Thiltithei takin i awm ang a, i ngam zêl ang,” a ti a. Chutichuan, Davida chu a hâwng a; tin, Saula chu a hmun lamah chuan a haw leh ta a.