Read Mizo_Old_version LEHKHABU PAKHATNA SAMUELA 28 Bible Online

LEHKHABU PAKHATNA SAMUELA 28 - Mizo_Old_version bible

LEHKHABU PAKHATNA SAMUELA 28

¹Tin, heti hi a ni a, chûng lai chuan Philistia mite chuan an sipaite chu Israel mite beia do tûrin an khâwm chiam mai a. Tin, Akisa chuan Davida hnênah, “Nang leh i mite chu sipaiho zîngah ka hnênah in kal ngei dâwn a ni tih hre rawh,” a ti a.

²Tin, Davida chuan Akisa hnênah, “Aw le, i chhiahhlawh thiltihtheih dân chu i hre mai ang,” a ti a. Tin, Akisa chuan Davida hnênah, “A ṭhat chu! Mi vêngtuah ka siam kumkhua ang che,” a ti a.

³Samuela chu a thi tawh a, Israel mi zawng zawng chuan an ṭah a, ama khua ngei Rama khuaah chuan an phûm tawh a. Tin, Saula chuan ramhuai aienthiam zâwlte leh dawithiamte chu a ram ata a hnawt chhuak vek tawh a.

⁴Tin, Philistia mite chu an pung khâwm a, Sunem-ah chuan ṭanhmun an va khuar a; tin, Saula chuan Israel mi zawng zawng a khâwm a, Gilboa-ah ṭanhmun an khuar ve a.

⁵Tin, Saulan Philistia sipaihote a hmuh chuan a hlau va, a rilru a khûr zawih zawih mai a.

⁶Tin, Saula chuan LALPA a han râwn pawhin LALPA chuan mang emaw, Urim emaw, zâwlnei emawin a chhâng lo rêng rêng a.

⁷Chutichuan, Saula chuan a chhiahhlawhte hnênah chuan, “Ramhuai aienthiam zâwl hmeichhia, a hnêna ka kala ka râwn tûrin mi zawnsak rawh u,” a ti a. Tin, a chhiahhlawhte chuan a hnênah, “Ngai teh, Endor khuaah ramhuai aienthiam zâwl hmeichhia a awm asin,” an ti a.

⁸Tin, Saula chu a inbâwl danglam a, puan danglam a inbel a, amah leh mi dang pahnih nên an kal a, zânah hmeichhe hnên chu an va thleng a; tin, “Ramhuai aienna chuan ai mi ensak la, i hnêna a hming ka lam apiang chu mi koh chhuahsak ang che,” a ti a.

⁹Tin, hmeichhia chuan a hnênah, “Ngai teh, Saula thiltih chu i hria a, a rama ramhuai aienthiam leh dawithiamte chu a tibo zo tawh a, engati nge ka thihna tûrin ka nunna thang i kam dâwn ni le?” a ti a.

¹⁰Tin, Saula chuan LALPA hming chhâlin, “LALPA nunna chhâlin ka sawi e, hemi thil avâng hian i chungah hremna a thleng lo vang,” tiin a hnênah chhia a chham a.

¹¹Chutichuan, hmeichhia chuan, “Tu nge ka han koh chhuahsak ang che?” a ti a. Tin, ani chuan, “Samuela mi han koh chhuahsak rawh,” a ti a.

¹²Tin, hmeichhia chuan Samuela a han hmuh chuan a au vak a; tin, hmeichhia chuan Saula hnênah, “Engati nge mi bum? Saula i ni reng si a?” a ti a.

¹³Tin, lal chuan a hnênah, “Hlau suh. Eng nge ni i hmuh tâk le?” a ti a. Tin, hmeichhia chuan Saula hnênah, “Lei aṭanga pathian lo chhuak ka hmu,” a ti a.

¹⁴Tin, a hnênah, “Eng ang nge a nih?” a ti a. Ani chuan, “Putar pui hi a lo chhuak a, kawrfual a ha,” a ti a. Tin, Saula chuan Samuela a ni tih a hria a, a hmaia lei siin chibai a bûk a.

¹⁵Tin, Samuela chuan Saula hnênah, “Engati nge hetianga mi koh chhuah buai ni?” a ti a. Tin, Saula chuan a chhâng a, “Ka mang a ang êm êm atin ni; Philistia mite chuan min do va, Pathian lah chuan mi hawisan a, zâwlnei emaw, mumang emaw pawhin mi chhâng ta lo rêng rêng a. Chu vâng chuan, ka tih tûr mi hrilh tûrin ka ko ta che a ni,” a ti a.

¹⁶Tin, Samuela chuan, “Chutia LALPAN a hawisan chia, i hmêlma a lo ni ta tih hre reng chung si chuan engah nge thu mi zawh?

¹⁷Keimah hmanga a sawi ang khân LALPA chuan i chungah a ti ta a nih chu. LALPA chuan i kut ata ram chu a chhuhsak che a, i ṭhenawm, Davida chu a pe ta a ni.

¹⁸LALPA thu i awih loh avâng leh Amalek-ho chunga a thinurna nasa tak i hlen loh avâng khân, tûnah hian i chungah he thil hi a ti ta a nih hi.

¹⁹Chu lo pawh chu, LALPA chuan nangmah leh Israel-hote chu Philistia mite kutah a pe ang che u a; tin, naktûkah hian nang leh i fapate chu ka hnênah in lo awm ang. LALPA chuan Israel sipaihote pawh chu Philistia mite kutah a pe ang,” a ti a.

²⁰Chutichuan, Samuela thusawi avâng chuan Saula chuan a hlau ta êm êm a, leiah a tlu ta dêr a. Tha leh zung rêng rêng a nei ta lo va, nilêng leh zankhuaa chaw ei lo a ni si a.

²¹Tin, hmeichhia chu Saula hnênah chuan a kal a, a lungngai êm êm tih a hria a, a hnênah, “Ngai teh, i chhiahhlawhnu hian i sawi chu ka awih a, thih leh thih tiin ka hnêna i thusawite chu ka pawm a ni.

²²Chuvângin, nang pawhin i chhiahhlawhnu thu chu awih ve thung ang che; chaw tlêm tal ka han hlui ang chia; tichuan, i hâwn huna thahrui i neih theih nân ei ang che,” a ti a.

²³Nimahsela, a duh lo va, “Ka ei lo vang,” a ti a. Nimahsela, a chhiahhlawhte chuan hmeichhia nên chuan an tîr lui a; an thu chu a awih ta a. Chutichuan, lei ata chu a tho va, khumah chuan a ṭhu a.

²⁴Tin, hmeichhia chuan sebâwngno châwm thau a inah chuan a nei a, a va talh thuai a. Tin, chhangphut a la a, a hmet a, dawidim tel lo chhang a siam a.

²⁵Tin, Saula leh a chhiahhlawhte hmaah chuan a va hlui a; tin, an lo ei ta a. Chutichuan, an tho va, chumi zân chuan an kal ta a.