Read Mizo_Old_version LEHKHABU PAKHATNA SAMUELA 30 Bible Online

LEHKHABU PAKHATNA SAMUELA 30 - Mizo_Old_version bible

LEHKHABU PAKHATNA SAMUELA 30

¹Tin, heti hi a ni a, ni thum nia Davida leh a miten Ziglag an thlen chuan, Amalek-hovin Chhim lam leh Ziglag khua chu an lo rûn tawh reng a, Ziglag khua chu an lo sawisa a, an lo hâl a;

²hmeichhiate leh chumi khuaa awm apiangte chu a lian a têin salah an man a; tu mah that lovin an hruai a, an hâwnpui tawh a.

³Tin, Davida leh a miten khua an va thlen chuan, ngai teh, a lo kâng fai vek tawh a; tin, an nupuite, an fapate, an fanute chu salah an lo man tawh a.

⁴Chutichuan, Davida leh a hnêna awmte chuan an aw an chhuah a, an ṭah hleih theih loh thlengin an ṭap a.

⁵Tin, Davida nupuite pahnih Jezreel mi Ahinoami leh Karmel-a mi Nabala nupui Abigaili-te pawh salah an hruai a.

⁶Tin, Davida chu a mangang hle mai a; an fapate leh an fanute avânga mi zawng zawng an thin a nat êm êma, amah chu lunga den thu an sawi avângin. Nimahsela, Davida chu a Pathian LALPAah chuan a intichak a.

⁷Tin, Davida chuan Ahimeleka fapa puithiam Abiathara hnênah chuan, “Puithiam kawr mi va lâksak teh khai,” a ti a. Tin, Abiathara chuan Davida chu puithiam kawr chu a va lâksak a.

⁸Tin, Davida chuan, “Chûngho chu ûm ila ka la ûmpha ang em le?” tiin LALPA a zâwt a. Ani chuan a chhâng a, “Um rawh, i ûmpha ngei ngei ang a, i chhanchhuak vek ngei ngei ang,” a ti a.

⁹Chutichuan, Davida chu a kal ta a, amah leh a hnêna mi zarukte nên; tin, Besor lui chu an va thleng a, an mi hnutchhiahte chu chutah chuan an awm ta a.

¹⁰Davida erawh chuan a ûm zêl a, amah leh mi zalite nên chuan, mi zahnih chu an chauh tawh avângin Besor lui chu an kân ve thei ta lo va, an lo awm ta a ni.

¹¹Tin, phûlah hian Aigupta mi an va hmu a, Davida hnênah an hruai a; chhang an pe a, a lo ei a; tin, tui in tûr an pe a.

¹²Tin, theipui hlâwm tlang khat leh grêp rah pho ro bâwr hnih an pe a. Chûng chu a han ei chuan a lo harh leh ta a; ni thum leh zan thum chaw ei lo leh tui in lo a ni si a.

¹³Tin, Davida chuan a hnênah, “Tu mi nge i nih? Khawi aṭanga lo kal nge i nih?” a ti a. Tin, ani chuan, “Aigupta ram tlangvâl, Amalek mi chhiahhlawh ka ni a; tin, ni thum a ni ta a, ka damloh avângin ka puin mi kalsan ta mai a ni.

¹⁴Kereth Chhim ram leh Juda chan Chhim ramte kan rûn a, Kaleb Chhim ram kan rûn bawk a; tin, Ziglag khua kan hâl bawk a,” a ti a.

¹⁵Tin, Davida chuan a hnênah, “Chûnghote awmnaah chuan min zuk hruai thei ang em?” a ti a. Tin, ani chuan, “Min that lo tûr leh ka pu kuta mi pe leh lo tûrin Pathian hming chhâlin ka hnênah chhia chham la; tichuan, chûngho awmnaah chuan ka zuk hruai ang che,” a ti a.

¹⁶Tin, a zuk hruai thlâk chuan, ngai teh, Philistia ram leh Judai rama râllâk tam tak an lâk avângin ruai an ṭheh a, an eiin an in a, an lo awm darh nuaih mai a.

¹⁷Tichuan, Davida chuan ni tlâk aṭanga a tûk tlai lam thlengin a bei ta a, tlangvâl zali, sanghâwngsei chunga chuanga tlânchhehote chauh lo chu tu mah dama chhuak rêng rêng an awm lo va.

¹⁸Tin, Davida chuan Amalek miten an lâk zawng zawng chu a la leh vek a; tin, Davida chuan a nupui pahnihte chu a chhanchhuak a.

¹⁹Chutichuan, a lian a têin, an fapate, an fanute, an râllâk leh an thil lâk rêng rêng eng mah chân an nei lo va, Davida chuan a lâksak leh vek a.

²⁰Tin, Davida chuan berâm rual leh ran rual zawng zawngte chu a la a, ran dangte hmaah an khalh a, “Hêng hi Davida râllâk a nih hi,” an ti a.

²¹Tin, mi zahnih, an chauh avânga Davida zui thei ta lova Besor luia an awmtîrte hnên chu Davida chuan a va thleng a. Tin, anni chu Davida hmuak tûr leh a hnêna awmte hmuak tûrin an kal chhuak a. Tin, Davidan mipuite kiang a va thlen chuan chibai a bûk hlawm a.

²²Chutichuan, Davida hnêna kalhote zînga mi sualte leh Beliala mi zawng zawngte chuan an chhâng a, “Kan hnêna an kal ve loh avângin râllâk thil kan va chhuh leh rêng rêng chu kan pe ve lo vang a, an hruaia, an kal theih nân an nupuite leh an fate ṭheuh erawh chu an hruai kan phal ang,” an ti a.

²³Chutichuan, Davidan, “Unaute u, LALPA, min humsaka, min do tûra lo thawkho kan kuta petu thil min pêkte chu chutiang chuan in ti lo vang.

²⁴Tuin nge he thu-ah hian in thu pawm ang? Indonaa zuk kalte chan ang bawk chu bungraw vênga lo awmte chuan an chang ve tûr a ni alâwm; inang vekin chan tûr a ni,” a ti a.

²⁵Tichuan, chumi ni aṭanga tûn thleng hian Israel-te tân thupêkah leh dâna luang tûrin a siam ta a.

²⁶Tin, Davidan Ziglag khua a thlen chuan râllâk ṭhenkhat chu, “Hei, LALPA hmêlmate laka râllâk, lâwmman atân ka thawn a che u,” tiin,

²⁷Bethel-a awm te, Chhim Ramoth-a awm te, Jatir-a awm te,

²⁸Aroer-a awm te, Sipmoth-a awm te, Estemo-a awm te,

²⁹Rakal-a awm te, Jerameel khuatea awm te, Ken khuatea awm te,

³⁰Horma-a awm te, Borasan-a awm te, Athak-a awm te,

³¹Hebron-a awmte leh Davida leh a mite chêttlatna ṭhin hmun zawng zawnga awm Juda upa, a ṭhiante hnênah chuan a thawn a.