Read Mizo_Old_version LEHKHABU PAKHATNA SAMUELA 31 Bible Online

LEHKHABU PAKHATNA SAMUELA 31 - Mizo_Old_version bible

LEHKHABU PAKHATNA SAMUELA 31

¹Chutichuan, Philistia mite chuan Israel-hote chu an bei a; tin, Israel mite chu Philistia mite lakah chuan an tlânchhia a, Gilboa tlângah chuan thahin an awm ta zul mai a.

²Philistia mite chuan Saula leh a fapate chu an ûm zui ta ngat ngat a. Tin, Philistia mite chuan Saula fapate - Jonathana leh Abinadaba leh Malkisua chu an that a.

³Saula chu an bei nasa ta êm êm mai a. Thal kâp mite chuan an kâp fuh a, na takin an hliam ta a.

⁴Chutichuan, Saula chuan a râlthuam kengtu hnênah chuan, “I khandaih phawi la, mi han chhun tlang rawh; chuti lo chuan, hêng serh tan lohhote hi an lo kal ang a, mi rawn chhun tlang ang a, mi uankhum dah ang e,” a ti a. Nimahsela, a râlthuam kengtu chuan a ti duh lo va, a hlau êm êm si a. Chuvângin, Saula chuan a khandaih chu a la a, a bawh ta a.

⁵Tin, a râlthuam kengtu chuan Saula a thi tih a hriat chuan a khandaih chu a bawh ve a, an thi dûn ta a.

⁶Chutichuan, Saula nên, a fapate pathum nên, a râlthuam kengtu nên, a mite zawng zawng nên, chumi ni ngei chuan an thi za ta a ni.

⁷Tin, ruam râl lehlama Israel mi awmte leh Jordan râla awmten, Israel mite an tlânchhia tih leh Saula leh a fapate an thi tih an hriat chuan, khuate chu an chhuahsan a, an tlân bo ta a; tin, Philistia mite chuan an va luah ta a.

⁸Tin, heti hi a ni a, a tûkah chuan Philistia-hoten an râl thahte thuam hlihsak tûra an va kal chuan Saula leh a fapate pathum Gilboa tlânga an lo thi chu an va hmu a.

⁹Tin, a lu chu an tan a, a râlthuam chu an hlîp a, chanchin chu an milem biakna inah leh mite hnêna puang tûrin Philistia ramah chuan an thawn vêl a.

¹⁰Tin, a râlthuam chu Astarothi inah an dah a; a ruang chu Beth-san kulh bangah an târ a.

¹¹Tin, Jabes-gilead-a awmten Philistia miten Saula an tih dân chungchâng thu chu an lo hriat chuan,

¹²mi huaisen zawng zawngte chu an tho va, zankhuain an kal a, Saula ruang leh a fapate ruang chu Beth-san kulh bang ata chu an la a; tin, Jabes an lo thleng a, chutah chuan an hâl a.

¹³Tin, an ruhte chu an la a, Jabes-a tamarisk thing hnuaiah an phûm a; tin, ni sarih chaw an nghei a.