Read Mizo_Old_version LEHKHABU PAKHATNA SAMUELA 4 Bible Online

LEHKHABU PAKHATNA SAMUELA 4 - Mizo_Old_version bible

LEHKHABU PAKHATNA SAMUELA 4

¹Tin, Samuela thu chu Israel mite zawng zawng zîngah a thang chhuak ta a. Tin, Israel mite chu Philistia mite do tûrin an kal chhuak a, Ebenezer kiangah ṭanhmun an khuar a; tin, Philistia mite chuan Aphek-ah ṭanhmun an khuar a.

²Tin, Philistia mite chu Israel mite dang tûrin an lo inzâr pharh a. Tin, an han inbeih chuan Philistia mite hmaah chuan Israel mite chu an tlâwm ta a, indona hmunah chuan sipai sângli emaw lai an that a.

³Tin, mipuite chu an riahhmuna an va kal chuan Israel upate chuan, “Eng vângin nge vawiinah hian Philistia mite hmaah LALPA chuan min tihtlâwm ni aw? Kan hnêna awma, kan hmêlmate kut ata min chhandam tûrin Silo ata LALPA thuthlung bâwm chu i han la ang u,” an ti a.

⁴Chutichuan, mipuite chuan Silo-ah chuan mi an tîr a, chuta ta chu cherub-ho chunga ṭhu, sipaihote LALPA thuthlunna bâwm chu an va la ta a. Tin, Pathian thuthlunna bâwm an lâknaah chuan Elia fapate pahnih, Hopnia leh Phinehasa an tel ve a.

⁵Chutichuan, LALPA thuthlunna bâwmin an riahhmun a lo thlen chuan, Israel mi zawng zawngte chu ring takin an au dur dur mai a, lei te lam pawh a nghawr ri dur dur mai a.

⁶Tin, Philistia miten an au thâwm an hriat chuan, “Hebrai-ho riahhmuna au thâwm ri ta dur dur mai chu engtizia nge ni le?” an ti a. Tin, an riahhmunah LALPA bâwm a lo thleng a ni tih an hre ta a.

⁷Tin, Philistia mite chuan an hlau ta a, “Riahhmunah pathian a lo kal ta a nih chu,” an ti a. “Kan chung a pik e! Tûn hma lamah chutiang a awm ngai si lo va.

⁸Kan chung a pik e! Chûng pathiante kut chak tak ata chu tuin nge min chhandam ang? Chûng pathiante chu an ni, Aigupta mite thlalêra hri chi tinrênga tihlumtu kha.

⁹Aw, nangni Philistia mite u, in chhiahhlawha an awm ang khân Hebrai-hote chhiahhlawha in awm loh nân chak takin awm ula, intimipa rawh u; intimipa ula, bei zêl rawh u,” an ti a.

¹⁰Tichuan, Philistia mite chuan an bei a, Israel mite chu an tlâwm a, an puan in lam ṭheuhvah an tlân ta vek mai a. An that nasa êm êm mai a, Israel-ho zînga sipai sîngthum an thi a ni.

¹¹Pathian bâwm pawh chu an lâksak a; tin, Elia fapate pahnih, Hophnia leh Phinehasa-te chu an that bawk a.

¹²Sipai zînga Benjamina thlah mi pakhat a tlân a, a puante ṭet phung leh a lûa lei kai luamin chumi ni la la chuan Silo a va thleng a.

¹³Tin, a va thlen chuan ngai teh, Elia chuan kawng sîra a ṭhutnaah ṭhu chungin a lo thlîr reng a, Pathian bâwm avâng khân a rilruin a khûr a khûr a. Tin, mi chuan khua a han thlena, chanchin chu a han sawi chuan a khuain an au ta chuah chuah mai a.

¹⁴Tin, Elian an au thâwm a lo hriatin, “Chu ri mur mur chu engtizia nge ni?” a ti a. Tin, mi chu hmanhmawh takin a va kal a, Elia chu a va hrilh a.

¹⁵Elia chu kum 98 mi a ni a, a mit a thim tawh a, khua a hmu thei tawh lo va.

¹⁶Tin, mi chuan Elia hnênah chuan, “Sipai zîng aṭanga lo kal ka nih hi, vawiinah hian sipai zîng ata lo tlân ka ni,” a ti a. Tin, ani chuan, “Ka fapa, eng angin nge thil a awm le?” a ti a.

¹⁷Tin, chanchin rawn thlentu chuan a chhâng a, “Israel mite chu Philistia mite hmaah chuan an tlânchhia a; tin, mipui zîngah inthahna nasa tak a awm bawk a; tin, i fapate pahnih, Hophnia leh Phinehasa pawh an thi a; tin, Pathian bâwm pawh an lâksak ta,” a ti a.

¹⁸Tin, heti hi a ni a, chutia Pathian bâwm thu a han sawi veleh chuan Elia chu kawngkhâr bula ṭhutphah ata a zangthalin a tlu a; a nghâwng a tliak a, a thi ta a, amah a tar tawhin a inzo tawh lo a ni. Tichuan, Israel-te chungah kum sawmli ro a rêl a ni.

¹⁹Tin, a monu, Phinehasa nupui chuan nau a pai a, a hrin a hnai tawh hle a; Pathian bâwm an lâksak tih thu a han hriata, a pu leh a pasal an thi tih a han hriat chuan a kaikûn a, nau a hring ta a, a nâ chuan a rawn nang ta nghâl si a.

²⁰Tin, a thih dâwn ṭêpa a kianga ding hmeichhiate chuan a hnênah, “Hlau suh, fapa i hrin tâk hi,” an ti a. Nimahsela, a chhâng hauh lo va, a ngaihsak hek lo.

²¹Tin, “Ropuina chuan Israel chu a chhuahsan ta!” tiin naupang hmingah chuan Ikaboda a sa a, Pathian bâwm chu an lâksak ta a, a pu leh a pasal pawh an thi ta si a.

²²“Ropuina chuan Israel-te chu a chhuahsan ta, Pathian bâwm chu an lâksak ta si a,” a ti a.